A Luk Sõng 12 - KÃAB-PAALGÃ KOE-NOOGO

Gũus-y ne zãmbo

¹ Wakat kãnga, neb tus tus tigma taaba, n sẽbg taaba, tɩ ya wa b na n fẽda taaba. A Zezi deng n goma ne b karen-biisã n yeel-b yaa: Gũus-y y mens ne Fariisẽ-dãmbã rã-bɩllã sẽn ya zãmbã.

² Bũmb ka be sẽn ludi, sẽn kõn puk ye. La bũmb ka be sẽn solge, b sẽn kõn bãng ye.

³ Yaa woto yĩng tɩ bũmb ning fãa yãmb sẽn na gom lik bida pʋgẽ, b na n wʋm-a-la vẽenemẽ. La bũmb nins yãmb sẽn na n walem tʋbẽ, rot pʋsẽ, b na n moon-b-la rot zutu.

Nebã sẽn tog n zoe a soaba

⁴ M zo-rãmba, mam yeta yãmb tɩ y ra zoe neb nins sẽn kʋʋd yĩngã n yaool n ka tõe n maan bũmb a to n paasã ye.

⁵ Mam na n wilga yãmb y sẽn tog n zoe a soaba. Zoe-y soab ning sẽn tõe n kʋ, la b tõe n kẽes bug-tẽngẽ me wã. N-ye! Mam yeta yãmb tɩ yaa soab kãng la yãmb tog n zoe.

⁶ B ka koosd yirs a nu su a yiib sɩda? Baoosgo, Wẽnnaam ka yĩmd b baa a yembr yell ye.

⁷ Baa yãmb zugã zoobd fãa sõdame. Dẽ yĩngã, bɩ y ra zoe rabeem ye. Yãmb bee yõod n yɩɩd yirs wʋsgo.

Kɩs Kirist kaset nebã taoore

⁸ Mam yeta yãmb tɩ ned ning fãa sẽn na n kɩs kaset nebã taoor t'a yaa mam neda, Ninsaal Bi-riblã me na n kɩsa kaset Wẽnnaam malegsã taoor tɩ soab kãng yaa bãmb neda.

⁹ La ned ning fãa sẽn na n kɩɩs nebã taoor t'a ka mi maam, Ninsaal Bi-riblã me na n kɩɩsa Wẽnnaam malegsã taoor tɩ bãmb ka mi-a ye.

¹⁰ Ned ning fãa sẽn goma Ninsaal Bi-riblã wẽng tõe n paama sugri. La ned ning sẽn na n paoog-a Sɩɩg-sõng kõn tol n paam sugr ye.

¹¹ B sã n tall yãmb n kẽng karen-dotẽ wall bʋ-kaoodba la pãn-soaadbã taoore, bɩ y da maan yɩɩr ne yãmb sẽn na n gom to-to n yiis y menga, wall y sẽn na n yet tɩ bũmb ning ye.

¹² Tɩ bõe, wakat kãng bala, Sɩɩg-sõng na n wilga yãmb bũmb ning y sẽn tog n yeelã.

Arzɛk soab sẽn ka yam yel-bũndi

¹³ Ned a yen zĩnda kʋʋngã sʋk n yeel a Zezi yaa: Karen-saamba, yeel-y m ba-biigã t'a pʋɩ tõnd dogem pʋɩɩrã n yãk m dẽnd n kõ-ma.

¹⁴ A Zezi leok-a lame yaa: Dao wa, ãnna n yãk maam tɩ m yɩ yãmb bʋ-kaooda, wall y te-pʋɩta?

¹⁵ Dẽ, a Zezi yeela nebã yaa: Gũus-y y mens ne rat wʋsgã. Bala, hal baa naar pʋgẽ, ninsaal vɩɩmã ka tũud ne bũmb nins a sẽn tarã ye.

¹⁶ La a Zezi wẽe bãmb yel-bũnd n yeele: Arzɛk soab a yen pʋt n da sak sõama.

¹⁷ La a da tagsda a sũurẽ n yetẽ yaa: Mam na n maana a wãna? Bala, mam ka tar zĩig n na n bĩng m koodã ye.

¹⁸ A yeelame yaa: “Ad bũmb ning mam sẽn na n maane: Mam na n wãa m bao wã n lebs n me sẽn ya bɛd n yɩɩda, n bĩng m koodã fãa ne m teedã be.

¹⁹ La mam a n yeela m meng yaa: Fo tara paoong wʋsg sẽn sekd yʋʋm wʋsg yĩnga. Bɩ f vʋʋse, n dɩ la f yũ, la f maan sũ-noogo.”

²⁰ La Wẽnnaam yeela yẽnda yaa: “Yalma! Yʋn-kãngã bala, mam na n deega fo vɩɩmã. La bũmb nins fo sẽn seglã na n yɩɩ ãnna rẽnda?”

²¹ Yaa a woto ne ned ning fãa sẽn tigsd paoong a meng yĩnga, n yaool n ka tar Wẽnnaam arzegsã.

Yɩɩr yell

²² Dẽ poore, a Zezi yeela b karen-biisã yaa: Yaa woto yĩng tɩ mam yet yãmb tɩ y ra maan yɩɩr ne y vɩɩmã yelle, yãmb sẽn na n dɩ bũmb ninga, wall ne y yĩngã yelle, y sẽn na n yeelg bũmb ning ye.

²³ Bala, vɩɩm yɩɩda rɩɩbo, la yĩng yɩɩda futu.

²⁴ Ges-y gãabdã! B ka bʋta, b ka tigsda, b ka tar pilgu wall baoor ye. La Wẽnnaam rɩlgd-b lame. Yãmb ka be yõod n yɩɩd bõn-yɩgdɩ wã sɩda?

²⁵ Ãnna yãmb sʋkã n tõe n paas a vɩɩmã woglem kãntɩɩg a yembre, a sẽn maand yɩɩr yĩnga?

²⁶ Dẽ, yãmb sã n ka tõe n maan bũmb sẽn ya bilf n yɩɩda, bõe yĩng tɩ yãmb maand yɩɩr ne bũmb nins sẽn ketã?

²⁷ Ges-y rulg-lɛlem sẽn bɩt to-to. B ka tʋmda, la b ka wĩid lamdo. Baoosgo, mam yeta yãmb t'a Salomo mengã ne a naamã fãa ka tõog n maneg a meng ne fut n yɩ neer wa rulg-lelemd a yembr ye.

²⁸ Yãmb tẽeb bilf rãmba, sã n yaa tɩ Wẽnnaam nagsa mood sẽn be weoogẽ rũnna, tɩ b na n tugl-b bugum beoogã a woto, bãmb kõn ges yãmb fut yell n yɩɩda?

²⁹ Dẽ wã, bɩ y da nams y mens n baood y sẽn na n dɩ bũmb ninga, wall y sẽn na n yũ bũmb ning ye.

³⁰ Tɩ bõe, yaa dũni neb nins sẽn ka pʋʋsd Wẽnnaamã n baood bõn-kãense. Yãmb ba wã miime tɩ yãmb dat-b lame.

³¹ Bas-y rẽ la y bao Wẽnnaam soolmã, la b na n kõo yãmb bõn-kãensã n paase.

Arzegs arzãn pʋga

³² Mam piisi, da zoe-y dabeem ye. Bala, a taa yãmb ba wã yam tɩ b kõ yãmb b soolmã.

³³ Koos-y yãmb sẽn tarã n dɩk a ligdã n kõ naong rãmba. Bao-y kord sẽn ka sãamda, la paoong sẽn ka sat arzãn pʋga, zĩig ning wagdr sẽn ka kolgda, la mogd sẽn ka sãamda.

³⁴ Bala, yãmb paoong sẽn beẽ wã, yãmb sũurã me na n zĩnda be.

Tʋmtʋmd-sõamy sẽn gũud b zu-soab waoongo

³⁵ Bɩ y sẽb y sees sẽbdse, la y yõgen y fɩtɩl-dãmba,

³⁶ la y yɩ wa neb sẽn gũud tɩ b zu-soab yi pʋg-peegr kibs n lebg n wa, t'a sã n ta bal n wẽ bɩ b pak t'a kẽ.

³⁷ Bark bee tʋmtʋmd kãens zutu, b zu-soabã sẽn na n wa n ta n mik tɩ b neeme. Mam yeta yãmb sɩd-sɩd tɩ b zu-soabã na n sẽba a sẽbdga, n kɩt tɩ b zĩnd rɩɩb zĩigẽ, t'a wa n kõ-b rɩɩbo.

³⁸ Yẽ wat yʋn-sʋk tɩ ya no-kɛlenga, a sã n wa n mik tɩ b ka gõe, b sũur na yɩ noogo.

³⁹ Bãng-y neer tɩ roog soab sã n dag n miẽ wakat ning wagdr sẽn na n wa, a rag n na n neendame n ka bas t'a poog a roogã ye.

⁴⁰ Bɩ yãmb me segl n sɛ. Bala, Ninsaal Bi-riblã na n waa wakat ning yãmb sẽn ka tagsd tɩ b na n waame wã.

Tʋmtʋmd sẽn ka segl a zu-soabã waoong yĩnga

⁴¹ Dẽ, a Pɩyɛɛr soka a Zezi yaa: Zu-soaba, yaa tõnd bal la yãmb wẽ yel-bũn kãngã bii, bɩ yaa neba fãa?

⁴² T'a Zezi leok yaa: Dẽ, ãnna n ya tʋmtʋmd sẽn maand sɩda la a tar yam, t'a zu-soabã yeel-a t'a ges a tʋmtʋmdbã yelle, n kõt-b rɩɩb wakat fãa sẽn zemse?

⁴³ Tʋmtʋmd kãng zu-soabã sã n wa n mik t'a maanda a woto, tʋmtʋmdã sũur na yɩ noogo.

⁴⁴ Mam yeta yãmb sɩd-sɩd t'a zu-soabã na n kɩtame tɩ yẽ ges a arzegsã fãa yelle.

⁴⁵ La tʋmtʋmd kãng sã n yeel a sũurẽ t'a zu-soabã kaoosda waoongo, n sɩng n pãbd tʋmtʋmd daopã la tʋmtʋmd pogsã, n dɩtẽ la a yũud n gãeemdẽ,

⁴⁶ tʋmtʋmd kãng zu-soabã na n waa daar ning yẽ sẽn ka gũud-a, la wakat ning a sẽn ka mi. A zu-soabã na n sɩbga yẽ sõama, n kɩt tɩ bũmb nins sẽn paamd neb nins sẽn ka maand sɩdã paam yẽnda me.

⁴⁷ Tʋmtʋmd ning sẽn mi a zu-soab raabo, n yaool n ka segl bũmbu, la a ka maan a zu-soabã sẽn datã, b na n pãb-a la wʋsgo.

⁴⁸ La ned ning sẽn ka mi a zu-soabã raabo, n maan tʋʋmd sẽn tog ne sɩbgre, b na n pãba yẽ bilfu. B sã n kõ ned bũmb wʋsgo, b na n sok-a-la bũmb wʋsgo. La b sã n gũnug ned bũmb wʋsgo, b na n sok-a-la wʋsg n yɩɩda.

A Zezi wata ne welgre

⁴⁹ Mam waame n na n lob bugum dũni zugu. La mam nonga a sã n da zoe n widgẽ!

⁵⁰ La lisg n be mam sẽn tog n deege, la a yellã na n namsa maam hal t'a wa n pidsi.

⁵¹ Yãmb tẽedame tɩ mam waame tɩ laafɩ na zĩnd tẽng zugu? Mam yeta yãmb tɩ ayo. La yaa tɩ welgr na zĩndi.

⁵² Bala, sẽn sɩng ne moasã, neb a nu sẽn be zak a yen pʋg na n welga taaba, tɩ tãabã kɩɩs yiibã, tɩ yiibã kɩɩs tãabã.

⁵³ Ba na n welga ne a bi-ribla, tɩ bi-ribl welg ne a ba. Ma na n welga ne a bi-pugla, tɩ bi-pugl welg ne a ma. Sɩd ma na n welga ne a bi-paga, tɩ bi-pag welg ne a sɩd ma.

Bãn sẽn wilgd wakate

⁵⁴ A Zezi leb n yeela neb kʋʋngã yaa: Yãmb sã n yã sawadg sẽn yikd nin-taoore, tao-tao bala, yãmb yetame tɩ saagã na n niime, la a yɩta a woto.

⁵⁵ La yãmb sã n yã tɩ sobg yita wĩndg goabga, yãmb yetame tɩ zĩigã na n yɩɩ tʋʋlgo, la a yɩta a woto.

⁵⁶ Zãmb-dãmba, yãmb mii tẽng yɛla, la yĩngr yɛl sẽn ya to-to. Bõe tɩ yãmb ka mi moasã wakatã yɛl n welge?

Maneg f yell ne f zabd-n-taaga

⁵⁷ La yaa bõe tɩ yãmb ka tõe n bãng sẽn ya tɩrg y toor n bake?

⁵⁸ Fo sã n dabd bʋʋd zĩigẽ ne f zabd-n-taaga, bɩ f modg n maneg f yellã ne-a, yãmb sẽn ket sorã zug wakate, tɩ yẽ ra wa tall foom n kẽng bʋ-kaoodba taoore, tɩ bʋ-kaoodbã yõk foom n kõ bi-bees roog gũud t'a kẽes-f bi-bees roog ye.

⁵⁹ Mam yet-f lame tɩ fo kõn yi be hal tɩ f yao a samdã yaoolem lagf ye.