3 Zã 1 - KÃAB-PAALGÃ KOE-NOOGO

Pʋʋsem

¹ Kãsmã n tʋmd seb-kãnga ba-bi-nongr a Gayus sẽn ya ned mam sẽn nong sɩdã pʋgẽ wã.

² Mam zo-nongre, mam bõsda Wẽnd tɩ fo yɛlã fãa na kẽnd sõama, la tɩ fo yĩnga tar laafɩ wala f sɩɩgã yɛlã sẽn ya sõma wã.

³ Ba-biisã sẽn wa n kɩs kaset ne sɩd ninga sẽn be fo pʋgẽ, la fo sẽn kẽnd sɩdã pʋgẽ to-to wã, mam maana sũ-noog wʋsgo.

⁴ Bũmb ka kõt maam sũ-noog n yɩɩd mam sẽn na n wʋm tɩ b gomd tɩ mam kambã kẽnda sɩdã pʋgẽ ye.

B pẽgda a Gayus

⁵ Mam zo-nongre, bũmb ning fo sẽn maand ba-biisã yĩngã, fo maanda ne sɩda, baa ne ba-bi-sãamsã.

⁶ Bãmb kɩsa fo nonglma kaset tẽedba taoore. Fo sã n sõng-b so-toakã wɛɛngẽ, wa sẽn zems Wẽnnaam yam ned sẽn tog n maane na yɩ neere.

⁷ Bala yaa a Zu-soabã yʋʋrã yĩng la b kẽng-yã, la b ka reeg baa fɩ neb nins sẽn ka pʋʋsd Wẽnnaama nengẽ ye.

⁸ Dẽ, tõnd tog n deega nin-bãmba-rãmba, tɩ tõnd tõe n yɩ tʋmd-n-taas ne bãmba, sɩdã yĩnga.

A Diyotɛrf kɩɩsgo

⁹ Mam gʋlsa koees bilf n tʋm a Zezi tẽedbã, la a Diyotɛrf sẽn nong n yɩ taoor soab bãmb sʋkã ka sakd n deeg ye.

¹⁰ Yaa woto yĩng tɩ mam sã n wa wa, mam na n tẽega tʋʋm nins yẽ sẽn maandã, a sẽn saad n gomd tõnd yell-wẽngã. Tɩ rẽ ka sek-a ye. Yẽ mengã ka reegd ba-biisã ye, la yẽ gɩdgda neb nins sẽn dat n deeg-bã, la a rigd-b n yiisd a Zezi tẽedbã sʋka.

B pẽgda a Demetiryus

¹¹ M zo-nongre, da maan togs-n-taar ne sẽn ya wẽng ye, maan togs-n-taar ne sẽn ya neere. Ned ning sẽn maanda neer yaa Wẽnnaam neda, la ned ning sẽn maand wẽng ka yã Wẽnnaam ye.

¹² Neba fãa ne sɩdã meng kɩta a Demetiryus kaset sõngo. Tõnd me kɩta yẽ kaset sõngo, la fo miime tɩ tõnd kaset yaa sɩda.

Yaoolem pʋʋsem

¹³ Mam tara bũmb wʋsg m sẽn da tõe n gʋlsẽ foom, la m ka rat n gʋls-b ne gʋls-koom la ne gʋlsdg ye.

¹⁴ Mam maanda tẽeb tɩ sã n yɩ bilfu, m na n yãa foom, la d na n goma ne taab neng ne nenga.

¹⁵ Bɩ laafɩ zĩnd ne foom. F zo-rãmba pʋʋsda foom, pʋʋs d zo-rãmba fãa yembr yembre.