1 Zã 5 - KÃAB-PAALGÃ KOE-NOOGO

Tẽeb ne tõogr dũniyã zugu

¹ Ned ning fãa sẽn tẽed t'a Zezi yaa Kiristã, yaa Wẽnnaam n dog yẽ soaba. La ned ning fãa sẽn nong soab ning sẽn dog-a bãmbã, nonga bãmb sẽn dog a soabã me.

² Ad bũmb ning sẽn kɩted tɩ tõnd bãng tɩ d nonga Wẽnnaam kambã: Yaa tõnd sẽn na n nong Wẽnnaam la d sakd bãmb tõodã.

³ Bala, tɩ nong Wẽnnaam yaa tɩ sak bãmb tõodã. La bãmb tõodã ka toog ye.

⁴ Bala, Wẽnnaam sẽn dog a soab fãa tõogda dũniyã. Ad tõogr ning sẽn tõogd dũni wã: yaa tõnd tẽebã.

⁵ Ãnna n tõogd dũni wã, sã n ka ned ninga sẽn tẽed t'a Zezi yaa Wẽnnaam Bi-riblã.

Sɩɩg-sõng kaseto

⁶ Yaa a Zezi Kirist n wa ne koom, la zɩɩm, la ka ne koom bal ye, la yaa ne koom la zɩɩm, la yaa Sɩɩg-sõng n kɩt kaseto, Sɩɩg-sõng sẽn ya sɩd soabã yĩnga.

⁷ Bala, yaa neb a tãab n kɩt kaset [arzãn pʋga: yaa ba wã, la gomdã, la Sɩɩg-sõngo. La bãmb b tãabã yaa yembre.

⁸ La bũmb a tãab n be n kɩt kaset tẽng zugu:] yaa Sɩɩg-sõngo, la koom, ne zɩɩm. La bãmb b tãabã kaset zemsda taaba.

⁹ Tõnd sã n deegd ninsaalb kaseto, Wẽnnaam kaset n ya kãsẽng n yɩɩda. Tɩ bõe, ad Wẽnnaam kaseto: Yaa tɩ Wẽnnaam kɩta b Bi-riblã kaseto.

¹⁰ Ned ning sẽn tẽed Wẽnnaam Bi-riblã tara kaset kãngã a meng pʋgẽ. Ned ning sẽn ka tẽed Wẽnnaam, a maanda bãmb tɩ b yɩ wa zĩrĩ yagda yẽ sẽn ka tẽed kaset ninga Wẽnnaam sẽn kɩs b Bi-riblã wɛɛngẽ wã yĩnga.

¹¹ Kaset kãng la woto: Wẽnnaam kõo tõnd vɩɩm sẽn kõn sa, la vɩ-kãng bee b Bi-riblã pʋgẽ.

¹² Ned ninga sẽn tar-a Bi-riblã tara vɩɩmã, la ned ninga sẽn ka tar-a Wẽnnaam Bi-riblã ka tar vɩɩmã ye.

Vɩɩm sẽn kõn sa bãngre

¹³ Mam gʋlsa yãmb bõn-kãngã, sẽn na yɩl tɩ yãmb bãng tɩ yãmb sẽn tẽed Wẽnnaam Bi-riblã yʋʋrã, yãmb tara vɩɩm sẽn kõn sa.

¹⁴ Ad pɛl-kɛgeng ning tõnd sẽn tar bãmb taoorã: Tõnd sã n kos bũmb sẽn zems ne bãmb daabo, b kelgda tõndo.

¹⁵ La tõnd sã n miẽ tɩ b kelgda tõndo, sẽn ya bũmb ninga la tõnd kos-yã, tõnd miime tɩ d paama bũmb ninga tõnd sẽn kos bãmbã.

¹⁶ Ned sã n yã a ba-biig sẽn maan yel-wẽnd sẽn ka wat ne kũum, bɩ a pʋʋse, la Wẽnnaam na kõ-a vɩɩm. Yaa neb nins sẽn maand-b yel-wẽn sẽn ka wat ne kũuma yĩnga la y tog n pʋʋse. Yel-wẽnd n be n wat ne kũum, ka yel-wẽn kãng yĩng la mam sẽn yet tɩ y pʋʋsã ye.

¹⁷ Tʋʋm-wẽng fãa yaa yel-wẽnde, la yel-wẽn n be n ka wat ne kũum ye.

¹⁸ Tõnd miime tɩ Wẽnnaam sẽn dog ned ning fãa ka maand yel-wẽn ye, la Wẽnnaam Bi-riblã gũuda yẽnda, la wẽng soabã ka sɩɩsd yẽ ye.

¹⁹ Tõnd miime tɩ d yaa Wẽnnaam dẽnda, la dũniyã zãng bee wẽng soabã nugẽ.

²⁰ Tõnd miime me tɩ Wẽnnaam Bi-riblã waame, la b kõo tõnd bãngr tɩ d bãng soab ning sẽn yaa sɩdã. La tõnd bee sẽn ya-a sɩdã pʋgẽ, b Bi-ribl a Zezi Kirist maasem yĩnga. Yaa bãmb la Wẽnnaam sɩd-sɩda la vɩɩm sẽn kõn sa.

²¹ Mam kom-bõonego, lak-y y mens ne wẽn-naandsã.