1 Zã 2 - KÃAB-PAALGÃ KOE-NOOGO

Kiristã yaa tõnd sɛ-yõakda

¹ Mam kom-bõonego, m gʋlsda yãmb bõn-kãngã sẽn na yɩl tɩ y ra maan yel-wẽn ye. La ned sã n maan yel-wẽna, tõnd tara sɛ-yõakd sẽn be d ba wã nengẽ: Yaa tɩrlem soab a Zezi Kirist.

² B talla a Zezi meng n maan maoong tõnd yel-wẽna sugr kũun yĩnga, la ka tõnd bal yel-wẽnã yĩng ye, la dũni neba fãa me yel-wẽna yĩnga.

³ Tõnd sã n sak Wẽnnaam tõodã, dẽ tõnd miime tɩ d bãnga bãmba.

⁴ Ned ning sẽn yet t'a mii Wẽnnaam la a yaool n ka sakd b tõodã, yẽ soab yaa zĩrĩ yagda la sɩd ka be yẽ pʋgẽ ye.

⁵ La ned ning sẽn sakd Wẽnnaam goamã, a wilgdame t'a nonga Wẽnnaam sɩd-sɩda. Ad tõnd sẽn tõe n bãng to-to tɩ d bee bãmb pʋgẽ:

⁶ Sẽn yet-a tɩ yẽ paada Wẽnnaam pʋgẽ tog n kẽnda wa a Zu-soabã sẽn dag n kẽndã.

⁷ M kom-nongdse, ka tõ-paalg la mam gʋlsd yãmb ye, yaa tõ-kʋdg yãmb sẽn dag n paam hal sɩngrẽ wã. Tõ-kʋdg kãnga yaa koɛɛg ning yãmb sẽn dag n wʋma.

⁸ Mam sẽn gʋlsd yãmbã yaa tõ-paalg me. Yel-kãng yaa sɩd Zu-soabã pugẽ, la yãmb pʋse. Bala, lik bida wã loogdame, la vẽenem sɩd-sɩdã zoe n yãgdame.

⁹ Ned ning sẽn yet t'a bee vẽenemẽ n yaool n kis a ba-biiga, a ket n bee lik bida pʋgẽ.

¹⁰ Ned ning sẽn nong a ba-biig bee vẽenemẽ bũmb ka be n na n lub-a ye.

¹¹ La ned ning sẽn kis a ba-biig bee lik bida pʋgẽ. Yẽ kẽnda likã pʋgẽ, n ka mi a sẽn dabdẽ ye, bala likã kɩtame t'a ninã ka ne ye.

¹² Kom-bõonego, mam gʋlsda yãmb tɩ bala, Kirist yʋʋrã yĩnga yãmb paama y yel-wẽna sugri.

¹³ Ba-rãmba, mam gʋlsda yãmb tɩ bala, yãmb sẽn bãng soab ning sẽn be-a hal sɩngr wẽndẽ wã yĩnga. Kom-bɩɩse, mam gʋlsda yãmba, tɩ bala, yãmb tõoga wẽng soabã. Kom-bõonego, mam gʋlsa yãmba, tɩ bala, yãmb bãnga d ba wã.

¹⁴ Ba-rãmba, mam gʋlsa yãmba, tɩ bala, yãmb bãnga soab ning sẽn be hal sɩngr wẽndẽ wã. Kom-bɩɩse, mam gʋlsa yãmba, tɩ bala, yãmb tara pãnga, tɩ Wẽnnaam goamã be yãmb pʋgẽ, la tɩ y tõoga wẽng soabã.

¹⁵ Da nong-y dũni wã, wall bũmb ning sẽn be a pʋgẽ wã ye. Ned sã n nong dũni wã, d ba wã nonglem ka be a soab pʋgẽ ye.

¹⁶ Bala, bũmb nins fãa sẽn be dũniyã pʋgã, sã n ya yĩng ratem wẽngã, la ninã sẽn get bũmb nins n datã, la wilg-m-meng arzegs sẽn wat-ne wã ka yit Wẽnnaam nengẽ ye, a yita dũni nengẽ.

¹⁷ Dũni loogdame la a ratem wẽngã me loogdame. La ned ning sẽn maand Wẽnnaam daab paada wakat sẽn kõn sa.

Kirist kɩɩsda

¹⁸ Mam kom-bõonego, moasa yaa yaoolem wakate. Wa yãmb sẽn dag n wʋm tɩ Kirist kɩɩsd n watã, ad Kirist kɩɩsdb wʋsg n be moasã. Rẽ kɩtame tɩ tõnd miẽ tɩ yaa yaoolem wakate.

¹⁹ Bãmb yii tõnd sʋka la b rag n ka tõnd neb ye. Tɩ bõe, bãmb sã n dag n yaẽ tõnd neba, b dag n na n paa ne tõndo. La b sẽn maan to-to wã wilgda vẽeneg tɩ ka neba fãa n yaa tõnd neb ye.

²⁰ Yãmb mensã paamame tɩ soab ning sẽn welg-a toorã kõ yãmb b Sɩɩgã, la yãmb fãa tara bãngre.

²¹ Mam sẽn gʋls yãmbã, ka tɩ yãmb ka mi sɩdã ye, la yaa yãmb sẽn mi-a wã yĩnga, la zĩrĩ sẽn ka yit sɩd pʋgẽ wã yĩnga.

²² Ãnna la zĩrĩ yagdã, sã n ka ned ning sẽn kɩɩsda t'a Zezi ka Kiristã? Ned ning sẽn yet t'a ka mi d Ba ne b Bi-riblã yaa Kirist kɩɩsda.

²³ Ned ning fãa sẽn yet t'a ka mi Bi-riblã ka tar Ba wã me ye, la ned ning sẽn yet t'a mii biigã, a tara Ba wã me.

²⁴ Sã n ya ne yãmba, koɛɛg ning yãmb sẽn dag n wʋm hal sɩngrẽ wã tog n paa yãmb pʋse. Bũmb ning yãmb sẽn wʋm hal sɩngrẽ wã sã n pa yãmb pʋse, yãmb me na n paa Bi-riblã ne Ba wã pʋga.

²⁵ Ad bũmb ning Kirist sẽn kãab tõndã: Yaa vɩɩm sẽn kõn sa.

²⁶ Mam gʋlsa yãmb bõn-kãense, neb nins sẽn belgd yãmba wɛɛngẽ.

²⁷ La ne yãmba, Sɩɩg-sõng ning yãmb sẽn deeg bãmb nengẽ wã bee yãmb pʋse, la yãmb ka baood tɩ b zãms yãmb ye. La wa bãmb Sɩɩgã sẽn zãmsd yãmb bũmb fãa wã, tɩ yaa sɩdã, la ka zĩrĩ wã, woto, bɩ y pa ne Kirist wa Sɩɩg-sõng sẽn zãms yãmb to-to wã.

²⁸ La moasã, mam kom-bõonego, bɩ y pa Kirist pʋga, tɩ bãmb sẽn na n wa pukã wakate, bɩ tõnd paam pɛl-kɛgenga, tɩ bãmb waoongã daare, yãnd kõn yõk tõnd bãmb taoor ye.

²⁹ Yãmb sã miẽ tɩ Kiristã yaa tɩrlem soaba, bɩ y bãng tɩ ned ning fãa sẽn maand sẽn ya tɩrg yaa Wẽnnaam biiga.