Tirhthalahle 2 - Dân Thar NT (BSI)

Rythâ Rythyng a tungnâ chawng

¹ Penticost ni a hawng tung nung, yng châknin mun khatka kyn rubumnin munkân rusungnin yng awm.

² Mitkharap kân ryvân atâ a ryhâu, thirthisêm kuvang phut a hawng tung ta. Hanân ha yng sungnâ ina pheng a bit ta,

³ myidawng mylyi kuvang amân tâ amân resemnin myichawk kuvangnin a mi lu rim chunga a va kawp ta.

⁴ Yng châknin pheng Rythâ Rythyng yng na bit ta, Rythâ Rythyngnin chawng yng nai miril kânin chawng dangnin chawng chu yng ril a.

⁵ Ryvân noia zât tin kyntâ Pathyn rang â hoimi Juda mi ngyi Jerusalema yng ryk a.

⁶ Hâ ryhâu ha yng hoi kale mi ngyi tamka yng hawng rubum a, mi kipka yng chawng ngyi ha yng chawng tak kuvang yng hoi thyi tâsiknin yng mulunga rawkhawlnâ a hawng awm ta.

⁷ Yng châknin pim yng na thim ta, luk yng na chawp pêk a, “En rou ta, hinân chawng â ril kipka ngyi hi pheng Galili ram atâ mi ngyi chang ma ngyi maw?

⁸ Hakhanungte hakhanintâ maw yi rizirnâ chawng kuvangte yi hoi thyi tâk?

⁹ atu mychang chu Parthai, Medei, Elamit zât yi chang a; atu mychang chu Mesopotamia rama â awm ngyi, Judai rama â awm ngyi, Kappadokia, Ponto rama â awm ngyi, Asia rama â awm ngyi,

¹⁰ Phrugia rama â awm ngyi, Pamphulia rama â awm ngyi, Aigupta rama â awm, Kurini dema Libua rama â awm ngyi yi chang a; atu mychang te Rom atâ khol Juda le yng byk kuvang â byk ngyi yi chang,

¹¹ atu mychang te Krit mi le Arab ram mi yi chang a; imyitinung Pathyn sinchawp yng ril ngyi hi yi chawng le rêlê yi hoi thyi hi!” yng ti.

¹² Yng châknin luk yng na chawp pêk a, azezo hoi lounin, “Hingyi hi i zât maw tâk ai?” yng ti.

¹³ Atu tu mychang chu nawkawl yng na thonin, “Uain thar yng nai murui tou hi,” yng ti.

Peter chawngril

¹⁴ Imyitinung Peter chu lu sawm lyi khatka ngyi le munkân yng ding a, hê rysâi taknin yng kyn chawng a ril a, “Nyngni Juda ram kyntâ mi ngyi, Jerusalem kyn â awm kipka ngyi, hingyi hi hoi nang, ky chawng khawm hi ryngâi rou.

¹⁵ Hingyi rang yng na nyng khym kuvangnin yng na murui mak, asik chu atun khawm nusun dâr kokka reng tou a lâ chang hi.

¹⁶ Imyitinung himâ hi tyna Zawlnyi Joel ai ril sai tou hi;

¹⁷ Pathyn ai ti chu, ‘Nung chem atâ ni tika chu hikhanin chang at, Maniâ kipka kyn ky rythâ bok ket; Hanungchu nyng sapâ ngyi, nyng sanu ngyi ky chawng mopong yng; Nyng tangval ngyi rylangnâ mu iyng,

¹⁸ Achang, hâ ni chu ky sokropâ ngyi, Ky sokronu ngyi chunga khawm, Ky rythâ bok ket, yngni ky chawng ril yng.

¹⁹ Ryvân chung tyng â chawp tharo, Noi tyng nêng chunga ridiknâ mirumu ket; Thisen ngyi, myi ngyi, Myikhu ruhu ngyi le ile:

²⁰ Ni âzing la rêlê iat, Thâpâ thisen la rêlê iat, Pumâ ni rysâng tak le riming thang tak chu A hawng tung mân a;

²¹ Khanung, hikhanin chang at, mi atu khawm Pumâ riming â hêt khoka chu rung man at,’ tinin ai ti ha.

²² “Aw Israel mi ngyi, hi chawng ngyi hi ryngâi rou; Pathyn chu Nazaret Jisu rang mangnin nyng kyn tharo lyn ngyi, tharochawp ngyi, ridiknâ ngyi le nyng nai mihoi ha; nyngni rêlê ngan ha ngyi chu nyng hoi sai:

²³ hamâ ha Pathyn chu ai bo sai le hoi sai kuvang yng miman a, nyngni ngan tou thamak ngyi kut kân Krosa nyng târ a, nyng that tâk.

²⁴ Imyitinung hamâ ha thinâ le rikhitnâ kyntâ chu Pathyn a musut ta, a mythou ta ia, asik chu atak rang chu thinâ le rikhitnin a mook thyi zât chang mak.

²⁵ Asik chu David a chawng a ril a, ‘Pumâ rang kumkhonin ky makunga ki mu sin. Ky sung a rêng mak rang kân ky bunêk khak tyng â awm;

²⁶ Hamâsiknin ky mulung a zâi â pâr a, Ky mylyi khawm a mypâk; Hamâsiknin ky mê khawm khym taknin awm at.

²⁷ Asik chu ky rythâ hi thinâ kho kyn ma nâ chini ia, Ny mi rythyng rang chu thunin rysyt rang tâ chu phal nâ chini tinin,

²⁸ Nyngma damnâ lam ki ni mihoi a Nyngma ny mêl le ky zâipârnâ kyi mibit pêk net,’ tinin.

²⁹ “Sokpui ngyi, yi rubul David retep ring lounin nyng kyn ki ril thyi. Atak chu a thi ta, phum khawm a chang ta, a thân khawm atun tenka yi kyn a lâ awm.

³⁰ Atak chu zawlnyi â chang a, Pathyn chu a rui kyntâ atu rang mychang a sungmuna misung at tinin samâitonnin a ril tinin â hoi;

³¹ hanungchu hamâ ha amâna ai hai hoi reng tâsiknin Krista a thounok rang tâ chawng ai ril â chang, “Thi kho kyn manin awm mak a, a rok khawm thunin kawlê nâni,” tinin,

³² Hâ Jisu rang chu Pathyn a mithou nok a, hamâ â hoi ngyi chu yini pheng yi chang.

³³ Pathyn bunêk tyng khak mawsawrnin â awm a, Rythâ Rythyng samâiton sai chu Pâ kyntâ â man a, nyng mu le nyng hoi sai ai hawng bok tou hi.

³⁴ David rêlê ryvâna te lui mak a, imyitinung atak rêlê ngan, Jehova chu ky Pumâ kyn ‘Ky bunêk tyng sung reng raw,

³⁵ Ny mâitem ngyi rang chu ny phyi bângnâ Ky sym mak tenka chu,’ a ti, tinin mitou a ril ha.

³⁶ “Hanungchu, hâ Jisu nyng târmi rêlê ha, Pathyn chu atak rang Mylal le Krista a sym tâk tinin Israel mi kipka yng hoi rêlê chang se,” a ti.

³⁷ Hâ chawng yng hoi kale chu yng mulung kyn sun kuvang a chang ta, Peter rang le koudep dang ngyi kyn, “Sokpui ngyi imaw tho ta kyi?” yng ti tâk.

³⁸ Peter chu yng kyn, “Risir nang, nyng rysylnâ kyntâ zawknâ rangnin Jisu Krista rimingnin baptisma chang rou; hanungchu Rythâ Rythyng pêk ai chang hi man nyng.

³⁹ Asik chu a samâiton ha nyngni tâ le, nyng nâu ngyi tâsik khawm, mun la tak kyn â awm kipka ngyi tâsik khawm, yi Pumâ Pathynnin ai kou kipka tâsik â chang,” a ti.

⁴⁰ Chawng tamka le yng na ril a, “Hi kusung atâ mulung koi â nyi ngyi kyntâ rurung rou,” tinin yng na rysyi.

⁴¹ A chawng â zawm khoka chu baptisma yng chang a; hani ha sasi thumka â khym yng hawng pung ta.

⁴² Koudep ngyi rysyinânin munkân awmnin, bai khamnin, chawngmychainin munkân sadim kân yng awm.

A khymmi ngyi awm dân

⁴³ Mi ngyi pheng yng nyng chi ta; koudep ngyi mi a chang ta kâmchawp le ridiknâ tamka yng tho.

⁴⁴ A khym khoka chu yng tharo ngyi munkân mang rangnin yng syk a.

⁴⁵ Yng rou ngyi, yng tharo ngyi yng zor a, yng nai nang lam kânin yng resem sin.

⁴⁶ A nitin mulung munkân Pathyn byk ina munkân yng awm sin a, yng in tyng khawm bai yng kham a, zâipâr tak le sungdâi taknin bu yng nêk sin.

⁴⁷ Pathyn yng mypâk a, mi kipka nom dân kân yng awm sin. Hanung, thyi zawknâ â man khoka ngyi rang Pumâ chu nitin yng bylap yng na mirechel sin.