Tirhthalahle 16 - Dân Thar NT (BSI)

Timothi khawm Paul le Sila rang a ruzul

¹ Darbe le Lustra kyn khawm a vâ lut a; hanân Timothi rimingnin luka nungzuimi â awm; atak chu â khymmi Juda nupang sapâ â chang a, imyitinung a pâ chu Grik â chang a;

² Lustra le Ikonion kyntâ sokpui â awm ngyi atak rang ha yng mawsawr sin.

³ Paul chu atak rang a bylap roi rang a nang ta; hantyng â awm Juda ngyi tâsik reng atak rang roinin a chukmor a ât pêk tâk, asik chu a pâ ha Grik â chang tinin pheng yng hoi.

⁴ A kho a kho sê bylamnin Jerusalem atâ koudep ngyi le ulyn ngyi chawng bosai ha zawm rangnin sokpui ngyi chunga thyi chawng yng va mâk a.

⁵ Hikhanin kouchawrai ngyi chu khymnâ tyng yng hawng nget a, a ni yng hawng pung rylyk ta.

Troas kho kyn Paul rylangnâ ai mu

⁶ Rythâ Rythyng le Asia rama chawngril rang ai khap tâsiknin Phrugia le Galatia ram kân yng sê ta;

⁷ Musia ram dema yng hawng tung kale nung Bithunia rama lut rang yng rawthawk a, imyitinung Jisu rythâ yng na phal mak.

⁸ Hamâsiknin Musia ram rykannin Troas kho kyn yng sê ta.

⁹ Zâna nung Paul rymang kuvang rylangnânin Makedonia ram kyntâ mi luka dingnin, “Makedonia rama hawng rykan nang, kyi na hawng chang raw,” tinin ai mêthêm kân a mu ta.

¹⁰ Hâ rylangnâ rymang chu a mu kale nung Makedonia rama sê rangnin tyk kyi rawthawk ta ia, nyng kyn Retep Thâ ril rangnin Pathyn kyi na kou tinin kyi hoi ta.

Philipi kho kynta Ludia rizir thar

¹¹ Troas kyntâ mawlawng le kyi sok a, Samothraki tyng thylyng kyi pan tâk a, aninok tyng nung Neapoli kyn kyi sê nok ta;

¹² hanântâ chu Philippi tyng kyi sê ia, hamâ chu Makedonia rama khopui mysâ chem â chang, hamâ rawhawi kyntâ chu kho nang tak khatka â chang, Rom kho kyntâ a hawng resen ngyi awmnâ â chang, hanân chu ni nik thumka kyi awm.

¹³ Ryngamni kyn kho baryi mawkawt pên tyng tuikola chawngmychainâ mun chang rang tinin kyi khymnâ muna kyi sê ia; kyi vâ sung a, nupang â hawng ngyi kyn chawng kyi ril,

¹⁴ khanung, a ryngâi ngyi kyntâ Thuatira khomi, Ludi rimingnin luka nupang â awm a, atak chu ponsenduk â zormi â chang a, Pathyn â bykmi khawm â chang; Paul chawngril mulung a pêk thyi rang kân Pumâ chu a mulung a mawhawng pêk a.

¹⁵ Atak le a inmi ngyi baptisma yng chang zounin, “Pathyn khymmi ky nyng ti a chang nung ki ina hawng tung rou,” tinin kyi na mêthêm a, kyi na roi tâk.

Philippi kho kyn jil lut

¹⁶ Chawngmychainâ muna kyi sênâ kyn, luka nungâk thikynâ â en thyimi le kyi rawtawng a, hamâ ha a thikynâ en thyinâ le a pumâ ngyi rang tamka sum yng na miman sin.

¹⁷ Hamâ ha Paul le kyini rang kyi na ruzul a, “Hi ngyi hi kumkhoka damnâ lam nyng nâ ril ngyi hi, Arysângchem Pathyn sokro yng chang hi,” tinin thyi a mêhêt a.

¹⁸ Hikhanin ni tamka a tho ta. Hanung Paul te a mulung kân chang khâi mak a, a tyng â ngat a, rythâsy rang, “Jisu rimingnin a sung kyntâ sok raw,” a ti a. Hanung, vawikazawk ngan a sok ta.

¹⁹ A pumâ ngyi chu yng sum mannâ ha a hek ta tinin yng hoi kale, Paul le Sila rang ha yng nyng man a, bâzar muna ulyn ngyi makunga yng nyng va kâi a.

²⁰ Abo ngyi kyn yng nyng roi a, “Hingyi hi Juda mi yng chang a, kyi bam a, luk yng hawng mirawkhawl tâk.

²¹ Dân imaw la rang le yi zawm rangnin tha mak ngyi hi yng hawng ril sin, Rom mi yi chang,” yng ti.

²² Mipui ngyi khawm munkân yng na del rangnin yng hawng rawthawk a, â bomi ngyi chu yng pon ngyi yng nyng lik pêk a, lâthâ le yng na hêm rangnin chawng yng nyng pêk.

²³ Chenek yng nyng hêm zou kale jila yng nyng khum a, a myryk ngyi kyn sadim kân myryk rangnin yng nyng rep a;

²⁴ hi repnâ rik tak a man kale nung jil sung thuk takka kyn yng na khum a, yng phyia thingbâk yng nyng mirubun a.

²⁵ Imyitinung, zân lâia Paul le Sila chu Pathyn kyn chawng yng mychai a, lâ yng sak a, a rukhum dang ngyi yng nâ thirnin yng nyng ryngâi tâk;

²⁶ hanungchu, harawkhra likhitê put taknin â hawng a, jil inphâ tenka a ringing ta ia; dawrkylam ngyi tenka pheng a rawhawng ta, yng na rikhitnâ khawm pheng a rusut zou ta.

²⁷ A myrykmi chu ai in atâ a hawng sang nung jil in pheng rawhawngnin a mu ta, a rukhum ngyi chu yng rawt zou ta val a ti a, a khendai a pawt a, rythat rang a rawthawk ta.

²⁸ Imyitinung Paul chu a mêhêt a, “I rotho ma raw; pheng hinân kyi lâ awm hi,” a ti.

²⁹ A myrykmi chu myiser â zawng a, a sunga a vâ lut a, ai chi le chun bylampânin Paul le Sila makunga a va rukhup ta;

³⁰ atak chu yngni rang pêna yng na hawng roi a, “Ku pu ngyi, zawknâ ky man thyi rangnin imaw tho ket?” a ti a.

³¹ Yngni chu, “Pumâ Jisu rang khym raw, hanung chu nyngma le ni in mi ngyi kynang pheng zawknâ man nyng,” yng ti.

³² A kyn le a ina â awm kipka kyn chu Pumâ Retep yng nyng ril tâk.

³³ Hâ zâna, tyk ngan yng na roi a, yng nyng hêmnâ bê ngyi a rusuk a; hanung, atak le a inmi awm tenka pheng baptisma vawikazawk yng chang ta.

³⁴ A in chunga yng na vâ luipui a, nêk sâk yng na dar a, hanung, Pathyn yng khym tâsiknin, a in sungmi ngyi le pheng luk yng zâi a pâr ta.

³⁵ Aninokni zinga nung, âbomi ngyi ha, “Hâ maniâ ngyi rang ha yng na mawzawk rou,” tinin kyi nâ man sipai ngyi rang yng nyng hawng dep tâk.

³⁶ Jil in a myrykmi chu Paul kyn yng chawng a ril a, “Abomi ngyi ha nyng na misok rang tâ maniâ yng hawng dep a; hamâsiknin atun hawng sok nang, sungdâi taknin sê ta rou,” a ti a.

³⁷ Imyitinung, Paul chu yng kyn, “Rom mi kyi chang a, kyi dik maw dikmak maw mipui makunga kyi nyng hêm a, jil ina kyi nyng khum a; atun nung a ruthupnin kyi na misok rang yng ti tâk maw? Hikhante dep chang thyi nâni; yngni rêlê hawngnin kyi na hawng misok ngyi se,” a ti tâk.

³⁸ Kyi nâ manmi sipai ngyi hâ chawng âbomi ngyi rang yng nyng ril nung, Rom mi yng chang tinin yng hoi kale yng chi ta;

³⁹ hanung, yng sê ia, sadim kân yng na mêthêmnin yng nyng misok a, kho kyntâ rykâng rangnin yng nyng rep tâk;

⁴⁰ hanung jil in atâ chu yng sok a, Ludi ina yng lut a; sokpui ngyi le rawtawngnin, sungdâi taknin, yng sê ta.