Luka 9 - Dân Thar NT (BSI)

Jisu lu sawm lyi nika ngyi rang yng nai dep

¹ Lu sawm lyi nika ngyi rang munkân yng na kou a, rythâ thamak tinka ngyi chunga kutnyinâ le chuknâ, dam mak midam rang tânin yng na dep tâk.

² Khanung chu Pathyn ram chawng ril rangnin le rikhonyi ngyi rang yng na min dam rangnin yng na dep tâk.

³ Yng kyn, “Nyng pêtnâ lampuia lâthâ, sawlâ, bai, sum i rawkawl ma rou; pâk nika tenka kanchili khawm rawkawl chang mar se.

⁴ Nyng tungnâ ina, ngan pat awm ta rou, nyng sok tikân khawm ha in atâ sêk nyng sok rang kân.

⁵ Nyng na lawm makmi ngyika chu hâ kho kyntâ nyng sok tikân yngni rang yng na mihoinâ rangnin nyng phyi myzâ kyntâ philphut chu thiknin ma rou,” a ti.

⁶ Khanung chu, yng sê ta, a kho a kho yng lêng a, mun tinka kyn Pathyn chawng yng ril a, dam mak khawm thyi yng nyng min dam.

Herod mulung chukrypak

⁷ Mylal Herod a kâm tho tinka chu a hoi ta; atu tu mychang Johan ha âthi kyntâ a hawng thou nok ta, yng ti.

⁸ Atu tu mychang, “Elija ai hawng rylang tou tâk hi,” yng ti tâsiknin a mulung a chukrypak ta.

⁹ Herod chu, “Johan lu te ky tan ta ha; imyitinung hikhanin hi ai chang ki hoi sin hi atu maw ai?” a ti. Khanung chu, atak rang mu rang a rawthawk tâk.

Jisu sasi ryngâka ngyi rang a mikhawp

¹⁰ A nungzui ngyi yng hawng kir nok nung, a kyn yng kâmtho ngyi yng hawng ril. Atak chu yngni rang yng na hoinin Bethsaida kho yng ti kyn a chawrainin a sê ta.

¹¹ Imyitinung mipui ngyi hamâ yng hoi a pylat yng ruzul tâk a, hanung, atak chu yngni rang yng na hai lawm a, Pathyn ram retep yng na ril a, dam rang â nang khoka rang chu yng na midam tâk.

¹² Khylou a hawng chang tyng tâk nung, lu sawm lyi nika ngyi yng hawng a, a kyn, “Yi kol atâ kho ngyi le lou ngyi kyn sênin, tungnâ le nêk sâk yng man thyi rang kânin hi mipui ngyi rang yng na dep ta raw; asik chu hi ram hi awm maknâ mun â chang hi,” yng ti.

¹³ Imyitinung atak chu yng kyn, “Nyngni lam nêk sâk yng na pe rou,” a ti. Yngni chu, “Hingyi pheng tâsik nêk sâk kyi va rochok mak nung chu, bai lep ryngâka le pum nika ngâ reng chang lou chu i ngan nyi mung,” yng ti.

¹⁴ Asik chu (ulyn hawl ngan sasi ryngâka kuvang yng chang.) Khanung a nungzui ngyi rang, “Lu sawm ryngâ lu sawm ryngâ kân a tâng a tângnin yng na misung rou,” a ti.

¹⁵ Hakhanin pheng rang yng nyng min sung tâk.

¹⁶ Baitêp têp ryngâka le ngâ pum nika rang a lâk a, ryvân tyng rawdawnnin bor a pêk a, a kham a, mipui ngyi kyn sem rang tânin a nungzui ngyi kyn a pêk tâk.

¹⁷ Yng sâk nung, pheng yng na khawp ta, hanung, yng sâknâ bân adinawi ngyi ha rutnin tapawng sawm lyi nika a lâ bit.

Peter Jisu a changnâ a mopong

¹⁸ Vawika hikhanin â chang a, Jisu amân dyk chawng a mychainâ kyn a nungzui ngyi a bylap yng awm a; yng kyn, “Mi ngyi atu maw â chang ky iyng bê?” tinin yng na rythang.

¹⁹ Yng ti chu, “Baptisma â pemi Johan ni chang yng ti; imyitinung atu tu mychang Elija, atu tu mychang nung Zawlnyi mului ngyi sung atâ luka ai hawng thou nok tâk yng ti,” tinin yng ril.

²⁰ Atak chu yng kyn, “Khanung, nyngni te atu maw ky nyng bê?” a ti. Khanung, Peter chu, “Krista Pathyn ni chang,” tinin a ril tâk.

Jisu a tor rang le a thi rang a ril

²¹ Hâ chawng chu atu rang khawm ril mak rang tânin rikimnâ chawng a pêk;

²² “Maniâ Sapâ hi tamka a tor lom â awm a, ulyn ngyi, awchai ulyn ngyi, lekhasuimi ngyi pawm lounin la awm at, that la chang at, ni thum ni kyn nung a la thou rang â chang,” a ti.

²³ Atak sêk mi awm tenka kyn, “Mi atu khawm ky nung zui rang â nom khoka chu atak rang rinilnin, nitin a Kros ruputnin kai zui chang se.

²⁴ Mi atu khawm amân tâ amân rurung rang â ti khoka chu sal at a; imyitinung kyima tâsik a rypai khoka chu rurung at.

²⁵ Maniâ khawmol pumpui mannin khawm a nun chem salnin la rymang ta synang atak tâsiknin imaw a lungnâ â awm?

²⁶ Mi atu khawm kyima tâ le ky chawng tâ kâ zakpui khoka chu, Maniâ Sapâ a roulynnâ le, a Pâ roulynnâ le, a ryvânpilâi rythyng ngyi roulynnâ le a hawng tika chu hamâ chu hawng zakpui at.

²⁷ Dik taknin nyng na ki ril hi, hinân â ding ngyi atu mychang ngyi hi Pathyn ram yng mu mak tenka chu thinâ dep retem nâ ni ngyi,” a ti.

Mêl rethengnâ

²⁸ Hikhanin hi â chang a, hi chawng ngyi ai ril zou tâ ni rytka deng nung, Jisu chu Peter, Johan, Jakob ngyi rang yng na roinin chawngmychai rangnin tânga a vâ lui.

²⁹ Khanung chawng a mychainâ kyn nung a mêl awm dân a hawng dang a, ai sil ngyi tenka khawm a hawng ngou a, mit rêêl rak kân a awm ta.

³⁰ Khanung, en raw, lu nika maniâ atak le yng rosonpui a, hangyi ha Mosi le Elija yng chang;

³¹ Rysângnâ le rawthawmnin yng rylang a, Jerusalem kyntâ a thinâ le a rytannâ chawng yng roson.

³² Imyitinung Peter le a champui ngyi yng in rumu a sê ta ia; imyitinung yng hawng sang kale nung a rysângnâ le a bylap lu nika â ding ngyi rang khawm yng nyng mu ta.

³³ Hikhanin hi â chang a, hâ maniâ ngyi ha Jisu kyntâ yng tyinâ rang kyn Peter chu Jisu kyn, “Pumâ, yini tâsiknin hinân yi awm hi â tha; pâk thumka thâmtê sym kyi a, nyngma tâsik pâkka, Mosi tâsik pâkka, Elija tâsik pâkka,” a ti, imaw a ril ngan hoi mak.

³⁴ Hâ chawng a rilnâ kyn rozing â hawng a, yngni rang yng na hawng mukhup tâk; hâ rozinga yng lutnâ kyn chu yng chi ta.

³⁵ Khanung, rozing sung atâ chawng a hawng sok a, “Himâ hi ky Sapâ, ki zen sai â chang a chawng ryngâi rou,” a ti.

³⁶ Chawng a mawng kale chu Jisu rang a mân reng yng mu tâk. Khanung, siring yng chang a, hanântâ yng tharo mu chu atu rang khawm i ril ma ngyi.

Rythâ thamak lut nâupang rang Jisu a midam

³⁷ Aninok tyng tâng atâ yng hawng chum nung mipui tamka yng va rawtawngpui.

³⁸ Khanung, en raw, mipui bil atâ luka mawrawngnin, “Pumâ, ky sapâ rang en rang tâ nyng ki u hi, sapâ luka dyk ki nyi â chang.

³⁹ En raw, rythâ thamak a man sin nung, vawikazawk a mêhêt sin; a michil mohon ngyi chul rak kânin a ron sin, sadim kân mirymangnin a mâk sin.

⁴⁰ Ny nungzui ngyi rang misoknin um rang tâsik yng na ky rep a; imyitinung thyi ma ngyi,” a ti.

⁴¹ Khanung, Jisu chu, “Hi kusungthar atâ khym bou a rymang lom ngyi hazika maw awmnin, nyng na la ryvak thyi ket? Ny sapâ rang hinân hawng roi raw,” tinin a ril.

⁴² Khanung, a hawngnâ kyn rythâ thamak chu atak rang a man a, sadim kân mehernin a tet tâk. Imyitinung Jisu chu rythâ rono rang a hal a, hâ nâupang rang a midam a, a pâ kyn a dep nok tâk.

⁴³ Khanung pheng ngan Pathyn roulynnâ chu luk yng na chawp pêk ta. Khanung chu mi awm tenka pheng a kâmtho tinka yng na chawp pêk lâi tak kyn, Jisu a nungzui ngyi kyn,

Jisu a thi rang tâ chawng a ril nok

⁴⁴ “Hâ chawng chu nyng nâ kyn ai lut chang se; asik chu Maniâ Sapâ hi maniâ ngyi kuta mylân chang at,” a ti.

⁴⁵ Imyitinung a chawngril hi i hoi thyi ma ngyi a, yng hoi thyi mak rang kân a thup a, hâ a chawngril retep atak rang rythang ngam ma ngyi rêk.

Atu maw a rysângchem

⁴⁶ “Yng bil atâ atu maw rysâng chem at?” tinin yngni le yngni rykhalnâ yng nyi a.

⁴⁷ Khanung, Jisu chu yng mulung ryvak dân hoinin, nâupangtê rang a kâi a, a dema a miding a,

⁴⁸ yng kyn, “Mi atu khawm ki riming tâsiknin hi nâupangtê rang hi â lawm khoka chu kyima rang ky iyng lawm chang at; mi atu khawm kyima rang â lawm khoka chu kâ depmi rang yng lawm chang at; nyng bil atâ âtom chemmi hi, a rysângchem â chang,” a ti.

Nyng na rydoupui makmi chu nyng khakmi â chang

⁴⁹ Johan chu, “Pumâ, mi luka ni rimingnin rythâ thamak ngyi rang misoknin ai um kyi mu, kyi bylap â zuimi chang mak siknin kyi khap tâk ha,” tinin a ril.

⁵⁰ Imyitinung Jisu chu a kyn, “Khap ma rou, atu khawm nyngni rang nyng na khâl makmi chu nyng khakmi â chang,” a ti.

Samari kho khatka Jisu rang pawm mak

⁵¹ Hikhanin hi â chang a, atak rang chungtyng roi rang zo atuk kale nung, Jerusalem sê rang tâ rawthawknin â ngat a,

⁵² a mâna pilâi ngyi rang yng na dep a; hanung chu yng sê ia, atak tâsik hai va rotok rangnin Samari mi ngyi kho khatka kyn yng vâ lut.

⁵³ Khanung, Jerusalem tyng mâi ai sak tâsiknin mi ngyi atak rang hai pawm khâi ma ngyi.

⁵⁴ Khanung chu a nungzui Jakob le Johan chu hamâ ha munin, “Pumâ, hi ngyi hi pheng yng na kâng rang kân ryvân atâ myi muchum nang ni nom maw?” yng va ti.

⁵⁵ Imyitinung atak chu yng tyng â ngat a, yng na hal tâk.

⁵⁶ Khanung, kho danga yng sê ta.

Jisu rang ruzul rang â nom ngyi

⁵⁷ Lampui danga lam yng sêna kyn atu mychang luka a kyn, “Ny sêna khoka kyn nyng hawng ruzul ket,” a ti.

⁵⁸ Jisu chu a kyn, “Sial ngyi te khur yng nyi, chungrêl vâ ngyi khawm rubu yng nyi; imyitinung Maniâ Sapâ chu a lu tetnâ rang ngan mun nyi mak,” a ti.

⁵⁹ Khanung, a dang luka rang, “Kyi ruzul raw,” a ti. Imyitinung atak chu, “Pumâ, mânsâ sênin ky pâ rang kyi la va miphum raw,” a ti.

⁶⁰ Imyitinung Jisu chu a kyn, “Athi le âthi ruphum ngyi se; imyitinung nyngma chu Pathyn ram chawng lam va ril ta raw,” a ti.

⁶¹ Hanung luka khawm, “Pumâ, nyng ruzul ket; imyitinung mânsânin ki in mi ngyi le rytyinâ kyi la va minyi raw,” a ti.

⁶² Imyitinung Jisu chu a kyn, “Mi atu khawm langkhyn mannin a nung tyng â enmi chu Pathyn ram tâsik chu chuk mak,” a ti.