Luka 24 - Dân Thar NT (BSI)

Thounoknâ

¹ Ryngam ni kynte dân ai awm kan yng ryngam a; imyitinung saptâ kyntâ ni mysâchem zinga yi yi a vâr kale, tharo mirim yng sym ngyi choinin thâna yng sê ta.

² Thân atâ lung chu resennin ai awm yng va mu ta.

³ Imyitinung a sunga yng lut nung a rok ha mu khâi ma ngyi.

⁴ Hikhanin hi â chang a, hamâsiknin yng sung a rêng lâi tak kyn en raw, mi lu nika pon a pilik zât silnin yng dema yng hawng ding a,

⁵ chinin yng mêl nênga yng byinâ kyn yngni ha yng kyn, “Itâ maw âthi ngyi bylap kynte âdammi rang nyng rawk?

⁶ Hinân awm khâi mak, a thou nok ta; Galili rama a awm lâi nyng kyn a chawngril ha ryvak nok rou.

⁷ Maniâ Sapâ rang hi mi thamak ngyi kuta miman chang at, Kros kyn târ yng a, imyitinung ni thum ni tikân nung a la thounok lom a ti ha,” a ti.

⁸ A chawng rang chu yng ryvak nok a.

⁹ Thân kyntâ chu yng kir nok a, sawm lyi khatka ngyi le midang â awm tenka ngyi rang hâ retep chu yng nyng va ril tâk.

¹⁰ Hâ nupang ngyi chu Magdalini Mari, Joani, Jakob nu Mari ngyi yng chang a; yng bylap â awm nupang dang ngyi khawm a nungzui ngyi rang hâ retep chu yng nyng va ril tâk.

¹¹ Imyitinung hâ chawng chu chawng rawnawk kykyi kuvang yng nâ chang pêk a, khym pêk ma ngyi.

¹² Imyitinung Peter chu â ding a, thâna a va rytou a; khunnin a en nung a ponsil ngyi reng ai mu tâk, hanung thâna awm dân chu chawp pêk taknin a in tyng a kir ta.

Emmau tyng pannin â sê ngyi

¹³ En raw, hani rêlê kyn yng bil kyntâ mi lu nika chu kho khatka Emmau tyng yng pan a, Emmau ha Jerusalem kyntâ mel sawm rukka kuvang a rylak.

¹⁴ Tharo ai hawng awm kipka chu mun kân thyi yng chet a.

¹⁵ Khanung, hikhan hi â chang a, chetnin yng roson lâi tak kyn Jisu rêlê ngan yng dema hawngnin yng bylap a va rechel ta.

¹⁶ Imyitinung atak rang yng risin thyi mak rang kânin yng mitphil â chang a.

¹⁷ Yng kyn chu, “Lam sê bylamnin nyng roson ha, i retep maw?” a ti. Ngui bylampâ dingnin yng awm ta.

¹⁸ Khanung, yng bil kyntâ a riming Kleopa yng ti mi chu atak rang, “Jerusalem kyn nyngma reng maw â awmmi ni chang, atun tâ tharo awm dân hi atun tenka hoi lounin ny lâ awm?” tinin a ril.

¹⁹ Atak chu yng kyn, “I tharo maw?” a ti. Yngni chu a kyn, “Nazaret Jisu, Pathyn le maniâ kipka mit mu kyn a chunga le a tul sinnâ kân zawlnyi riming thang takmi retep ha;

²⁰ awchai ulyn ngyi le kyi ulyn ngyi that rang tâsiknin yng roi a, Krosa yng târ retep ngyi ngan ha.

²¹ Imyitinung kyini te Israel ngyi rang a mawzawk lom tinin kyi khym le kytâ. Zê khawm chang synang, hâ tharo ai tung chu avyni le ni thumka a chang ta.

²² Hamâ reng tek lou khawm kyi champui lu nik thumka nupang ngyi, zing kân a thâna yng sê ia, kyi mulung yng hawng michukrypak a;

²³ a rok rang chu mu lou katânin, ‘Pathyn ryvânpilâi ngyi rang yng na kyi mu ia, hangyi ha a dam nok ta tinin yng ril,’ yng hawng ti.

²⁴ Kyi champui ngyi kyntâ lu nik thumka thâna yng sê ia, nupang ngyi yng ti kân rêlênin ngan yng vâ mu ia; imyitinung atak rang chu va mu ma ngyi,” yng ti.

²⁵ Atak chu yngni rang, “Aw tok ngyi yi! zawlnyi ngyi yng ti kipka khym rang tâ nathawng ngyi!

²⁶ Krista chu hangyi tornin a roulynnâ kyn a lut lom rang ngan chang mak maw?” a ti.

²⁷ Mosi le zawlnyi ngyi kipka lekhâ kyntâ a phut a, Pathyn Lekhâ kipka kyn a retep ai rusui kipka chu pheng mireselnin yng na ril a.

²⁸ Yng sênâ kho kyn yng tung kale nung; atak chu hanung âla sê rang tânin a rylang a.

²⁹ Yng mur chawng thum le, “Kyi bylap ngan awm tar bai; khylou tou tâk hi, ni khawm ai ta tou tâk hi,” yng ti a. Hanung yng bylap awm rang tâ a va lut ta.

³⁰ Hikhanin â chang a, yng bylap bu khylai kawp rang tâ a vâ lut a, bai a lâk a, bor a pêk a, a kham a, yng na pêk tâk.

³¹ Khanung chu, yng mit a hawng mu ta, a mêl yng hawng risin ta; atak chu a rymang ta.

³² Yngni chu, “Lampuia yi na mosonnâ kyn Pathyn lekha chawng yi na ril lâi ha yi mulung phut lum mak maw ha?” yng ri ti tâk.

³³ Hanin ngan yng ding a, Jerusalem kyn yng kir nok a, sawm lyi khatka ngyi le yng champui ngyi le munkân yng awm yng nyng va mu ta.

³⁴ “Pumâ chu chawngtak ngan a thou nok ta, Simon kyn khawm a rylang ta,” yng hai ti ia.

³⁵ Yngni khawm lampuia tharo ai chang ngyi le bai ai kham, a mêl yng hawng risin thyi dân khawm yng nyng ril vang.

Jisu a nungzui ngyi kyn a rylang

³⁶ Hâ chawng ha yng ril lâizing kyn atak rêlê yng bila a hawng ding a, yng kyn, “Nyng chunga sungdâinâ awm se,” a ti.

³⁷ Imyitinung chichai luk yng na awm pêk a, luk yng chi ta, rythâ yng mu kân yng rohoi a.

³⁸ Atak chu yng kyn, “Itâ maw nyng mulung nyng miryhal? Itâ maw nyng mulunga khymryhalnâ a hawng sok?

³⁹ Ky kut ngyi, ky phyi ngyi hi en rou, kyima rêlê ki chang hi! Kyi methem nang en rou; ky nyng mu kuvang rythâ chu mê le ru nyi mak,” a ti.

⁴⁰ Hamâ a ril zou nung a kut le a phyi ngyi yng na rumu tâk.

⁴¹ Yng zâipâr zabit tâsiknin la khym sêk ma ngyi a, chawp pêk taknin yng awmnâ kyn chu yng kyn, “Hinân atika sa lom nyng nyi maw?” a ti.

⁴² Atak rang ngâ meem sai bawngka yng pêk a,

⁴³ hamâ lanin yng makunga a sâk tâk.

⁴⁴ Atak chu yng kyn, “Hingyi hi ky chawng â chang, Mosi Dân le, Zawlnyi ngyi lekhâ ngyi kyn, mawsawrnâ labu ngyi kyn ky retep a rusuinâ mun tinka kyn a hawng tung lom nyng kyn ky awm lâi nyng na ki ril ta sin ha,” a ti.

⁴⁵ Pathyn Lekha Chawng yng hoi thyinâ rangnin yng mulung a mawhawng a;

⁴⁶ yng kyn, “Hikhanin sui â chang, ‘Krista chu tornâ nyi at a, ni thum ni kyn nung âthi kyntâ thou nok at a,

⁴⁷ Jerusalem atâ phutnin zât tinka kyn a rimingnin mulung risirnâ le rono kyntâ zawk thyinâ chawng la ril yng,’ tinin.

⁴⁸ Hingyi tâsiknin nyngni â hoi lom nyng chang.

⁴⁹ En rou, ky Pâ samâiton chu nyng na la hawng dep ket; imyitinung chung tyng tâ kutnyinânin nyng nyng thawm mak tenka chu khopuia ngan awm rou,” a ti.

Jisu rang ryvâna roi â chang

⁵⁰ Bethani dâikung tenka yngni rang chu yng na roi a; hakhanung, a bân a dawm a, bor yng na pêk a.

⁵¹ Hikhanin hi â chang a, bor yng na pêk lâizing kyn chu yngni le a rytyi a, ryvân tyng roi a chang ta.

⁵² Yng lau a, zâipârnin Jerusalema yng kir nok ta ia;

⁵³ Pathyn byk ina awmnin Pathyn pat yng mypâk sin.