Johan 8 - Dân Thar NT (BSI)

Myngnang mi nupang luka rang yng man

¹ Imyitinung, Jisu chu Olive tâng tyngmi a sê ta ia.

² Khanung, zing sisi kyn Tempula a hawng lut nok a, maniâ awm tenka a kyn yng hawng a; atak chu â sung a, yngni rang yng na rysyi.

³ Khanung, lekhasui ngyi le Pharisai ngyi a myngnangmi nupang luka rang mannin yng hawng roi a, hanung, yng lâia yng miding a,

⁴ Jisu kyn, “Mastawr, nupang hi a myngnang lâi yng man a, a myngnang lâizing ngan tâk.

⁵ Dân lekhabu kyn, Mosi chu hingkytâ maniâ rang chu lung le thênnin that rang tâ chawng kyi na pêk a; nyngma te imaw ni ti?” yng ti.

⁶ Hâ chawng chu atak rang miridiknâ rangnin yng ti â chang a, a rysylnâ man thyi rang kân. Hanung, Jisu chu, â khun a, a kutmar le nênga a sui.

⁷ Khanung, kyryng ngytnin yng sungkhut tâsiknin â ding a, yng kyn, “Nyng bil atâ rono nyi makmi khoka mânsâ atak rang lung le thên se,” a ti.

⁸ Khanung, â khun nok a, a kutmar le nênga a sui nok.

⁹ Khanung, yngni chu a chawngril hoinin, ulyn chem atâ phutnin a mawng tenka, lu lu kân soknin, yng rek ta ia; hakhanung chu Jisu reng ai awm tâk, nupang chu a lâia a awmnâ nining kyn ngan â awm.

¹⁰ Jisu â ding a, a kyn, “Nupang, hakyn maw yng awm tâk? Mi atu khawm nyngma rang nyng mitem ma ngyi maw?” a ti.

¹¹ Atak chu, “Pumâ, atu ngan kyi mitem ma ngyi hi,” a ti. Hanung, Jisu, “Kyi khawm nyng mitem ming; sê raw, atun kyntâ chu a dang awm rono tho khâi ma raw,” a ti.

Jisu khawmol myivâr

¹² Jisu yng kyn chawng a ril nok. “Kyima khawmol vâr ki chang; kyima rang ka ruzul khoka chu âzinga dep lêng nâ ni, damnâ vâr mitou man at,” a ti.

¹³ Khanung chu, Pharisai ngyi a kyn, “Ny tak tâ chawng nyngmân tâ nyngmân ni ril â chang; ny chawngril dik mak,” yng ti.

¹⁴ Jisu yng kyn, “Ky tak tâ chawng ki ril khawm, ky chawngril âdik, ky hawng soknâ le ky sênâ lom tenka khawm ki hoi; nyngni te ky hawng soknâ le ky sênâ tenka rang khawm hoi mak chou.

¹⁵ Nyngni te mê tyngtânin nyng bo sin a; kyima te atu rang khawm bo ming.

¹⁶ Ki bo chang tar synang khawm ky bonâ dik at; kyimân hawl chang mak a, kyima le kâ depmi kyi chang.

¹⁷ A chang, nyng dân lekha kyn khawm, ‘Lu nika chawng âdik,’ tinin sui khawm â chang ha.

¹⁸ Kyima hi ky tak tâ chawng â rilmi ki chang, Pâ kâ depmi khawm kâ hoipuimi â chang,” tinin yng na ril.

¹⁹ Yngni chu a kyn, “Ny Pâ chu hakykyn maw?” yng ti a; Jisu chu, “Nyngni kyi risin mak chou, ky Pâ rang khawm risin mak chou; kyima rang ky nyng risin nung chu ky Pâ rang khawm risin nyng,” tinin yng na ti pêk.

²⁰ Hi chawng ngyi chu Tempula yng na rysyi bylamnin, tholom syknâ muna a ril a; a zo la tung mak tâsiknin, mi atu khawm atak rang man ma ngyi.

Ky sênâ rang kyn sê thyi nâ chynyu

²¹ Atak chu yng kyn, “Kyima te sê ta ket hi, nyngni kyi rawk nyng a, nyngni te nyng na thi iat a, ky sênâ lom kyn chu hawng thyi nâ chynyu,” a ti nok.

²² Khanung, Juda mi ngyi, “ ‘Ky sênâ lom kyn hawng thyi nâ chynyu,’ ai ti hi, rythat rang maw a rawthawk ai?” yng ti.

²³ Khanung, atak chu yng kyn, “Nyngni noi atâ â sok nyng chang; kyima chu chung tyngtâ â sokmi ki chang; nyngni te hi khawmol atâ â sok mitou nyng chang. Kyima te hi khawmol atâ â sokmi chang ming.

²⁴ Hamâtâsiknin nyng kyn, ‘Nyng rysylnâ nyinin thi nyng,’ nyng na ki ti ha; hamâ ha atak ngan ki chang tinin nyng khym mak nung chu nyng rysylnâ nyinin kybyi bawrawk la thi nyng,” a ti.

²⁵ Khanung, yngni chu a kyn, “Atu maw ni chang a?” yng ti. Jisu chu yng kyn, “Aphut kale nyng kyn ki ril ta sin ha.

²⁶ Nyngni tâ hi chawng tamka ril lom le bo lom ki nyi; zê khawm chang se, kâ depmi chu midik tak â chang; a kyntâ chawng ki hoi kipka khawmol kyn ki ril hi,” a ti.

²⁷ Pâ chawng yng kyn ai ril tinin hoi ma ngyi.

²⁸ Khanung chu, Jisu sêk, “Nyngni Maniâ Sapâ rang nyng mykhâi tika, kyima hi atak ki chang tinin le, kyimân tâ chawng le i tho ming a, zê Pâ kai ril kuvangnin tou hi chawng hi ki ril sin tinin la hoi nyng.

²⁹ Kâ depmi chu ky bylap â awm a, kyimân dyknin kyi ma mak; asik chu ai nomtê kân tou pat ky tho sin,” a ti.

³⁰ Khanung, hâ chawng ngyi a rilnâ kyn mi tamka atak rang yng khym ta.

Sokro le sokro chang mak

³¹ Khanung chu, Jisu rang â khymmi Judami ngyi kyn chu, “Ky chawng kân pat nyng awm nung ky nungzuimi tytak chang nyng.

³² Chawngdik hoi nyng ti a, chawngdik chu sokro kyntâ nyng na mawzawk at,” a ti.

³³ Khanung, yngni chu a kyn, “Abraham rui tou kyi chang hi, atun tenka khawm atu sokro kyn ngan la awm mung, ‘Sokro kyntâ nyng na mawzawk tiat,’ te hakhanin tâ maw ni ti thyi ai?” yng ti.

³⁴ Jisu yng kyn, “Chawngtaktênin, chawngtaktênin nyng na ki ril hi, mi khoka kâm tha mak â tho khoka chu, a rono sokro a chang ta.

³⁵ Sokro chu kumkhoka tâ in nget nyi mak a, imyitinung sapâ chu kumkhoka tâ in nget â nyi.

³⁶ Hamâsiknin, Sapâ chu sokro kyntâ nyng na misok nung chu kybyi ngan sok ta nyng.

³⁷ Abraham rui nyng chang tinin ki hoi; nyng chang khawm synang kyi that rang nyng rawthawk a, ky chawng hi nyng mulunga mun ai nyi mak tâsiknin.

³⁸ Kyima chu ky Pâ kyntâ tharo ki mu chu ki ril sin; nyngni khawm nyng pâ kyntâ tharo nyng hoi chu nyng tho sin,” a ti.

³⁹ Khanung, yngni chu a kyn, “Kyi pâ Abraham â chang,” yng ti a. Hanung, Jisu chu yng kyn, “Abraham synâu ngyi nyng chang nung te Abraham ai tho kuvang tho nyng ha.

⁴⁰ Imyitinung, atun kyi that rang tou nyng rawthawk ha, Pathyn kyntâ chawngtak ki hoi nyng nâ rilmi tou ki chang hi; Abraham te nyng tho kuvang tho mak.

⁴¹ Nyngni te nyng pâ kâm nyng tho sin,” a ti. Hanung, yngni chu a kyn, “Myngnangnin zâu chang mung a, Pâ luka reng kyi nyi, hamâ chu Pathyn,” yng ti.

⁴² Jisu chu yng kyn, “Pathyn ngan nyng Pâ a chang nung nyngni te kyi mawawl nyng ha; Pathyn kyntâ ki hawng â chang a; kyimân tâ nomnâ le ki hawng chang mak, ataknin kai dep tou â chang.

⁴³ Itâ maw ky chawng hoi thyi mak chou? Chawngtaknin ky chawng nyng ryngâi thyi mak tâsiknin â chang.

⁴⁴ Nyngni te nyng pâ diabol â chang, ai nom kân â tho nyng nom a. Atak te tyn kaletâ ngan maniâ thatmi â chang, chawngtak reng awm mak, a sunga chawngtak dep awm mak tâsiknin. Lêmchawng nung atak ai misok kuvang a ril sin; lêmsy â chang a, lêmsymi khawm â chang.

⁴⁵ Chawngtak ki ril tâsiknin nyngni kyi khym mak chou.

⁴⁶ Nyng kyntâ atu maw rysyl lampuia temnin kâ sym thyi awm nyng? Chawngtak ki rilnâ kyn khawm nyngni itâ maw kyi khym mak chou?

⁴⁷ Pathyn kyntâ â sokmi chu Pathyn chawng a pawm sin; himâtâsiknin hi nyng pawm mak â chang, Pathyn kyntâ â sokmi nyng chang mak tâsiknin,” a ti.

Jisu le Abraham

⁴⁸ Juda mi ngyi a kyn, “Samari mi, rythasy â zolmi ni chang kyi ti ha dik mak maw?” yng ti.

⁴⁹ Jisu chu, “Rythasy zolmi chang ming; ky Pâ rang tou ki zâ ia, nyngni te ki riming tou nyng mysyt hi.

⁵⁰ Imyitinung, kyimân tâ rypâknâ â rawkmi chang ming; â rawkmi le â bomi chu luka â awm.

⁵¹ Chawngtaktênin, chawngtaktênin nyng na ki ril chu mi atu khawm ky chawng â zawmmi chu thinâ retem nâ ni,” a ti.

⁵² Khanung, Judami ngyi a kyn, “Rythasy â zolmi ni chang tinin atun kyi hoi ta. Abraham a thi ta, zawlnyi ngyi khawm yng thi ta ia, nyngma chu, ‘Mi ngyi ky chawng yng lâk nung kumkhoka thinâ retem nâ ni,’ ni ti nung te.

⁵³ Kyi rubul Abraham nêknin maw na rysâng? Atak khawm â thi, zawlnyi ngyi khawm yng nâ thi a; ny tak te atu kuvangnin maw ny rysym ai?” yng ti.

⁵⁴ Jisu chu, “Kyimân tâ kyimân rawsawr nang, ky rawsawrnâ chu i chang nâ ni, kyi Pathyn, nyng ti ky Pâ ha kyima rang ka mypâkmi â chang;

⁵⁵ nyngni atak rang hoi mak chou; imyitinung kyi te ki hoi; atak rang hoi ming ti tar nang, nyngni kuvang lêmsy dyn chang ket; hamâsiknin atak rang ki hoi a, a chawng khawm ky zawm sin.

⁵⁶ Nyng rubul Abraham ha, ky zo mu rang tâsiknin luk a zâi â pâr sin, hanung, â mu rêlê ia, luk a zâi â pâr,” tinin yng na ril.

⁵⁷ Khanung, Juda mi ngyi chu a kyn, “Nyngma te kum sawm ryngâka khawm la bit mak che, Abraham rang maw ny mu ta?” yng ti a.

⁵⁸ Jisu chu yng kyn, “Chawngtaktênin, chawngtaktênin nyng na ki ril hi, Abraham awm mâna khawm ki awm,” a ti.

⁵⁹ Hakhanung chu, thênnâ rang lung yng rut a; imyitinung Jisu a ribi ia, Pathyn byk in kyntâ chu a sok ta.