2 Korin 6 - Dân Thar NT (BSI)

¹ Pathyn ryngmunâ chu lappui lou kytâ nyng man a chang mak rang kânin, kyini a tulsin champui ngyi sazeknin nyng na kyi u hi.

² “Zo thâ kyn nyng ky ryngâi a, Zawknâ ni kyn nyng ky chang,” a ti ha. En rou ta, atun ngan tâk zo thâ chu â chang a; en rou atun ngan tâk zawknâ ni chu â chang.

³ Kyi tulsinnâ hi yng mêtêk thyi mak rang kânin, atu rang khawm mirukhupnâ sym mung a,

⁴ Pathyn tulsinmi ngyi kuvang atinka kyn mi mit tâinin tou kyi awm sin, luk tipsawinâ ngyi kyn, rawkhawlnâ ngyi kyn, sungminlounâ ngyi kyn, mechepmannâ ngyi kyn,

⁵ hêmnâ ngyi kyn, Jil lut kyn, rutuknâ kyn, solnin sinnâ ngyi kyn, in lounin ngyi kyn, ngyichâm ngyi kyn,

⁶ rythyngnâ ngyi kyn, hoinâ ngyi kyn, rawdawlthyinâ ngyi kyn, mulungsyinâ ngyi kyn, Rythâ Rythyng kyn, mawawlnâ tytak ngyi kyn,

⁷ chawngtak tyngtâ ngyi kyn, Pathyn sinthothyinâ ngyi kyn; bunêk debyra tyng diknâ ruzumngai meleknâ ngyi le,

⁸ roulynnâ le mawsawr maknânin, riming mysytnâ le riming mithanânin; mêkhêlmi kuvangnin, maniâ diktak chang koroknin;

⁹ mi ngyi risin kâi mak kuvangnin, rimingthang tak changnin; thi ton kuvangnin; en rou ta, kyi dam a; ron tawngnin, that lou kytânin;

¹⁰ ryngâisy kuvangnin, imyitinung pat zâipâr koroknin; ryng kuvangnin, imyitinung mi tamka rang yng na minyi koroknin; i nyimak kuvangnin, imyitinung atinka nyi koroknin.

¹¹ Aw, Korinth kyntâ maniâ ngyi, kyi mulung pheng mysamnin nyng kyn chawng kyi ril hi,

¹² kyini te kyi rawhawng a, imyitinung nyngni chu rawhawng mak chou.

¹³ Hamâsiknin nyng chunga kyi tho kuvangnin ha nyngni khawm kyi kyn nyng rawhawng rangnin synâu ngyi kuvangnin nyng na kyi u.

Pathyn ring byk in tou nyng chang

¹⁴ Khym makmi ngyi le ryang lou taknin zuval rybângnin awm ma rou; rono thonâ le diknâ chu imaw rêmênâ yng nyi? Achang mak kale âzing le âvâr te imaw rawbawmnâ yng nyi?

¹⁵ Belial le Krista khawm imaw ryngyinâ yng nyi? Achang mak le khym makmi le khymmi chu imaw munkân man lom yng nyi?

¹⁶ Rimil ngyi le Pathyn byk in khawm hi imaw rawzawmnâ yng nyi? Yini te Pathyn ring byk in tou yi chang a; Pathyn chu, “Kyima yng kyn awm ket a, Yng kyn lêng khawm lêng ket; Hanung, yng Pathyn chang ket a, Yngni khawm kimi ngyi chang yng,” ai ti kuvang ha.

¹⁷ Hamâsiknin, “ ‘Yng kyn tâ hawng sok nang, Achawrainin awm rou, Tharo rono reng khawm hi ton ma rou.’ Pumâ a ti,” hanung chu, “ ‘Nyng na lawm ket a,

¹⁸ Nyngni tâ Pâ chang ket a, Nyngni khawm ky tak tâsiknin sanu sapâ chang nyng,’ Pumâ Atinkathothyimi hikhan a ti.”