1 Korin 14 - Dân Thar NT (BSI)

Rythâ tyngtâ tharopêk rilnâ

¹ Mawawlnâ hi thyi ruzul rou, rythâ tyngtâ tharopêk ngyi khawm nom rou, imyitinung chawng nyng ril thyinâ lom rêlê zât rang chu nom lek rou.

² Chawng rohoi lounin chawngril chu maniâ kyn ril chang lounin, Pathyn kyn tou ril â chang a, mi atu khawm a chawngril chu â hoi awm mak a; imyitinung rythâ kyn chu chawng ruthup a ril.

³ Imyitinung chawng â rilmi chu maniâ kyn rysym thanâ chawng, sungdâinâ chawng ngyi tou a ril sin.

⁴ Chawng rohoi lounin chawngril chu amân tâ amân reng a rysym sin, imyitinung chawng â rilmi chu kouchawrai ngyi rang tou a sym sin.

⁵ Khanung, nyng châknin chawng rohoi lou ngyi chawng nyng ril nyng na ki nom a, imyitinung hamâ nêknin hanungzika chawng nyng pong mitou ki nom; kouchawrai ngyi rysym thanâ yng nyi thyi rangnin, resel taknin tyk ril a chang mak nung chu, chawng â pongmi chu chawng mopong rohoi lou ngyi â rilmi nêknin dyu a rysâng.

⁶ Atun sokpui ngyi, chawng rohoi lounin chawng ril rangnin nyng kyn hawng tar nang, mihoinâ tyng maw, hoinâ tyng maw, chawngrilnâ tyng maw, rysyinâ tyng maw nyng kyn ril lou ta mar nang, imaw nyng na ki milapnâ awm at?

⁷ Tharo dam mak, a ryhâu thyi ngyi khawm, sukmul maw, chawngpereng ngyi khawm hi awmzy nyinin a ryhâu mak nung, i lâ maw yng tuma yng per, hakhanin maw rohoi thyi at?

⁸ Muri ryhâu hi sadim kân a chang mak nung atu maw mâitem le rutuk rang tânin la rawthawk at?

⁹ Hakhavangnin nyngni khawm mylyi hi chawng hoi awl le nyng ril mak nung i chawng maw nyng ril hakhanin maw rohoi thyi at? A rawngkawdawk kyn chawng nyng ril tou chang at.

¹⁰ Hi khawmola chawng dydang tamka awm synang khawm a awmzy boute khatka ngan awm mak.

¹¹ Imyitinung a chawng awmzy ky hoi thyi mak nung kyima hi â rilmi tâsik chu ramdangmi chang ket a; â rilmi tâ khawm ky tak tâte ramdangmi rusuk at.

¹² Khanung, nyngni khawm rythâ tyngtâ tharopêk ngyi chunga zâl nyng sawng tâsiknin kouchawrai ngyi rang yng na symnâ rangnin tamnin nyng nyi thyi rang kân rawk rou.

¹³ Hamâsiknin, chawng rohoi lou tâ chawng a ril thyi rang kân chawngmychai se.

¹⁴ Chawng rohoi lou tâ chawng ky mychai nung ky rythâ rêlê te chawng a mychai a, imyitinung ky hoinâ tâsik chu lap lêm mak.

¹⁵ Imaw chang tiat ha? Rythânin chawngmychai ket a, a rohoi thyi rangnin khawm chawngmychai ket; rythânin lâ sak ket a, a rohoi thyinâ le khawm sak ket.

¹⁶ Hamaknung chu rythânin bor ny pêk khawm synang, la hoi makmi ngyi bila awmnin ny lawmchawng ril kyn chu hakhanin maw “Amen” la riti thyi at, ny chawngril hoi thyi lou koroknin te?

¹⁷ Nyngma te sadim kân ngan lawmchawng ni ril a, imyitinung midang rang chu yng na sym khâi mak.

¹⁸ Nyngni ngyi nêknin chawng rohoi lounin chawng ki ril ai tam tâsiknin Pathyn kyn lawmchawng ki ril a,

¹⁹ imyitinung kouchawrai ngyi Pathyn byknâ kyn chu chawng rohoi lounin sasi sawmka chawngril nêknin midang ngyi rang yng na ky rysyi thyi rang kân ki hoi thyi le chawng ryngâka dyk ril mitou ki nom.

²⁰ Sokpui ngyi, mulung tyng chu nâupang chang ma rou; imyitinung chu thamak lam tyng chu nâusentê chang nang, imyitinung mulung tyngnin chu ulyn chang rou.

²¹ Dân Lekhabu kynte, “ ‘Chawng dang mur le ram danga mi ngyi mur kân hi maniâ ngyi kyn hi chawng ril ket a; ato khawm ky chawng ryngâi nâ ni ngyi,’ Pumâ a ti,” tinin sui â chang.

²² Hamâtâsiknin chawng rohoi mak ngyi hi â khymmi ngyi tâsik ridiknâ chang mak a, khymmakmi ngyi tâsik tou â chang; imyitinung chawngril chu khymmakmi ngyi tâsiknin ridiknâ chang mak a; â khymmi ngyi tâsik tou â chang.

²³ Hamâsiknin kouchawrai ngyi kipka byk rangnin nyng rubum nung, nyng châknin chawng rohoi mak le chawng nyng ril nung chu la hoi mak ngyi maw, khymmakmi ngyi maw hawng lut ta ngyi sylâ, âtok nyng na ti nâ ni ngyi maw?

²⁴ Imyitinung nyng châknin chawng nyng ril a chang nung khymmakmi maw, la hoimakmi maw hawng lut ta synang, nyng châknin kân chu a dikmaknâ mirylang chang at a, nyng châk kânin bo man tiat;

²⁵ a mulunga chawng ruthuptê chu mirylangnin awm tiat; khanung chu khupnin Pathyn chibai buk at a, Pathyn chu nyng kyn â awm tinin mopong at.

Kouchawraia âdik kân tho dân

²⁶ Hanungte sokpui ngyi, hakhanin maw chang tiat ha? Munka nyng hawng rusungnâ kyn mypâknâ lâ maw, chawng rysyi maw, mihoinâ chawng maw, chawng rohoi mak maw, chetnin mireselnâ maw pheng nyng nyi sin a. Atinka rysymnâ rangnin tho chang se.

²⁷ Mi atu khawm chawng rohoi lounin chawng yng ril nung lu nika maw, â tam tyng lu thumka maw chang sylâ, retheng zylainin mi chang se; hanung luka chu ridiknin hai ril se,

²⁸ ridiknin â ril yng awm mak nung chu kouchawrai ngyi byknâ kyn chu dâireknin awm synang, atak le Pathyn kyn reng ril se.

²⁹ Chawng â pong ngyi khawm lu nika maw, lu thum kân maw ril ngyi synang, midang ngyi chu sazek kân ryngâi ngyi se.

³⁰ Imyitinung a dem atâ kyn mihoinâ chawng penin ai hawng awm a chang nung chu, mânsâ tâ mi chu dâireknin ai awm chang se.

³¹ Mi kipka rysyi thyinâ rang le mi kipka pheng sungdâinin yng awm thyinâ rangnin, nyng châknin lu lu kân tou chawng nyng ril thyi.

³² Chawngril ngyi rythâ ngyi chu chawngril ngyi nom dân kânin yng awm.

³³ Pathyn chu rawkhawlnâ Pathyn chang mak a, ryngyinâ Pathyn mitou â chang a, mi rythyng kouchawrai ngyi kipka kyn ai awm kuvang.

³⁴ Kouchawrai ngyi rusungnin byknâ kyn chu nupang ngyi chu siring changnin awm ngyi se; yngni rang te chawngril yng na phal chang mak; Dân Lekha kyn ai ti kuvang ha chawng zawmnin mi lam awm ngyi se.

³⁵ Khanung, zê rysyi rang yng nom chu yng in ngyi kyn yng lompu ngyi rang yng na rythang ngyi se; kouchawrai ngyi rusungnin yng byknâ kyn nupang chawngril hi zakyrai â awm a.

³⁶ Pathyn chawng hi nyng kyntâ ai sok maw? Achangmak kale nyng kyn reng maw a hawng tung?

³⁷ Mi atu khawm Pathyn chawng â pongmi maw, rythami kân maw ai rohoi a chang nung nyng kyn ki sui hi Pumâ chawng pheng â chang tinin hai hoi se.

³⁸ Imyitinung, mi atu khawm a risin mak nung chu risin lounin ngan ai awm tâk.

³⁹ Hakhanung ky sokpui ngyi, chawngril hi luk nom rou, chawng rohoi lounin chawngril khawm khap ma rou;

⁴⁰ imyitinung atinka rooi taknin le resel taknin tho chang se.