Yaya 9 - Ala la kitabuenu Mɔgɔfin kuma tɔ

Ɲabɔnɛ ɲa laka koe

¹ Isa be tanbila wagate min tɔ, a ka kaye do yen min be sɔtɔren ɲabɔnɔya tɔ.

² Isa la talibenu ka a maɲininka, anu ko: «Karamɔgɔ, ɲɔmɔ le ka junubu koe ma han kɛ kaye ni sɔtɔ ɲabɔnɔya tɔ, ale ba, ka a sɔtɔlanu?»

³ Isa ka anu jaabi, a ko: «Kɛ kaye la junubu koe le ma de, a sɔtɔlanu tugun na junubu koe le ma de! A be sɔtɔren de ɲabɔnɔya tɔ alako Ala la walenu ni yita le a la ko tɔ.

⁴ Fanni ɲɔ be kɛnɛren, a fɛrɛ bele fɔ n ni n Kiilá tɛn wale ma. Sue tini don, mɔgɔ yo te nɔ walila wo tɛmuɛ.

⁵ Fanni n be dunuya, n mu dunuya kɛnɛ la.»

⁶ A to banta wo fɔla, a ka daje tutɛ duge tɔ, a ka bɔra sogin a daje la, a ka a madon ɲabɔnɛ ɲanu ma.

⁷ A ka a fɔ a ye: «Taga i ɲanu ko Silɔmu ji madɛndula tɔ.» A fɔla Silɔmu, wo be fɔren de «Kiilá». Wo butɔ, ɲabɔnɛ tagata, a ka a ɲanu ko. A saagi tɛmuɛ, a be ɲɔ tayenna.

⁸ A sigiɲɔgɛnu nun minnu be kɛnɛ a yenna tarile ma tɔ, wonu be a fɔla: «Min be sigiren nun tarili mala, wolo ma kɛ la ba?»

⁹ Donu ko: «Ale le mu.» Donu tugun ko: «Ale ma, anu mulunta le.» Kɔnɔ a yɛtɛ ko: «Nde le yati mu.»

¹⁰ Wo butɔ, anu ka a maɲininka: «I ɲanu lakata kama le?»

¹¹ A ka anu jaabi, a ko: «Anu be kaye min ma Isa, wolo ka bɔra sogin, a ka a madon n ɲanu ma, a ka a fɔ aa n ni taga n ɲanu ko Silɔmu ji madɛndula tɔ. N tagata n ɲanu ko ɲɔ le, n naata ɲɔ tayen.»

¹² Anu ka a maɲininka: «Ale kaye be mina le?» A ko: «N ma a lɔn.»

¹³ Kɛ kaye min mu ɲabɔnɛ la nun, mɔgɛnu ka a doni Farisinu dula.

¹⁴ Wo ka a taran, wo luŋɛ Isa ka bɔra sogin lun min na, a ka kaye ɲanu laka, wo mata sulen lɔ́gɛ́ le la.

¹⁵ Awa, Farisinu tugun fɔlɔta a maɲininkala, a ɲa lakata ki min na. A ka a fɔ anu ye: «Ale kaye ka bɔra madon n ɲanu ma, n ka anu ko, kɔtɛ n be ɲɔ tayenna.»

¹⁶ Farisi donu ka a fɔ: «Kɛ kaye bele fatanden Ala la, bayi a bele sulen lɔ́gɛ́ makantaren.» Kɔnɔ donu ko: «Junubutɔɛ si nɔ kɛ kabanakoenu mɔɔle mala ba?» Wo butɔ, Isa la ko ka anu tafatan fila la.

¹⁷ Anu mɛn ka a fɔ ɲabɔnɛ ye, min ɲanu lakata, anu ko: «A to bata i ɲanu laka, i be fen de fɔla a la ko tɔ?» A ko: «A mu nabiyonmɛ do le la.»

¹⁸ Wo bɛ, Yahude kuntigenu bele laaren a la, ka a mu ɲabɔnɛ le la nun, a ɲanu naata laka. Wolo mu, anu ka kiilá sɔ a sɔtɔlanu ma, wonu ni na.

¹⁹ Anu la kereŋɛ ɲɔ, Farisinu ka anu maɲininka, anu ko: «Wo la den kayireŋɛ ma kɛ la ba? Wo be a fɔla, a sɔtɔta le a ɲa bele? Ka a ɲɔgɔnna le, a ka ɲɔ tayen kama le?»

²⁰ A sɔtɔlanu ka anu jaabi, anu ko: «Mɔ ka a lɔn mɔ la den kayireŋɛ le mu kɛ la, mɔ mɛn ka a lɔn a sɔtɔta le a ɲa bele.

²¹ Kɔnɔ a ka ɲɔ tayen ki min na, mɔle ma wo lɔn. Min ka a ɲanu laka, mɔ ma wo tugun lɔn. Wo ale maɲininka bayi denden ma a la bitugun. A ka a kunma koe bɛ lɔn.»

²² A sɔtɔlanu ka wo fɔ le, anu to be kilanden Yahude kuntigenu la, bayi wonu dun bata bɛn a ma, ka a fɔla, min yo ka a fɔ Isa mu Ala la mɔgɔ masubɛreŋɛ le la, anu ni wo tigi latɔn a kana don kawandi ma boŋɛ butɔ.

²³ Wolo ka a ma, a sɔtɔlanu ka a fɔ aa denden ma a la bitugun, anu ni ale maɲininka.

²⁴ Awa, kaye min mu ɲabɔnɛ la nun, anu ka wo kele mɛn tugun, anu ka a fɔ a ye: «Tɔɲa fɔ i nun Ala tɛma. Mɔle ka a lɔn ale kaye mu junubutɔɛ le la.»

²⁵ A ka anu jaabi: «Ka junubutɔɛ le mu a la, nde ma a lɔn. N ka ko dɔndɔ kan lɔn: n mu ɲabɔnɛ le la nun, kɔnɔ kɔtɛ n ɲanu bata laka.»

²⁶ Anu mɛn ka a fɔ a ye: «A ka fen ma i la? A ka i ɲanu laka kama le?»

²⁷ A ka anu jaabi, a ko: «N ɲan bata wo fɔ wo ye nun, kɔnɔ wo ma a bita. Fen de wo mɛn be diren a mɔɛla tugun? A sɔgɔ be wo la le ba wo ni ma a la talibenu la?»

²⁸ Wo butɔ, anu ka a nani, anu ka a fɔ a ye: «Ile le mu kɛ kaye la talibe la. Mɔle kan mu Musa le la talibenu la.

²⁹ Bayi mɔle ka a lɔn, Ala kumata le Musa la, kɔnɔ mɔ ɲan ma kɛ kaye kan bɔɔdula lɔn feu.»

³⁰ Kaye ka anu jaabi, a ko: «Ee, awa kabanako banba le mu kɛ la, a fɔla wo ma a bɔɔdula lɔn, adun bata n ɲanu laka.

³¹ Mɔ ka a lɔn Ala te junubutɔɛ kulɛ lamɔɛ. Kɔnɔ ka mɔgɔ min mu Ala batulá la, ka i ka a sagoe ma, Ala si i tigi kulɛ lamɔɛ le.

³² Bɔɔla dunuya data, a bele mɔɛren mɔgɔ do ka ɲabɔnɛ ɲanu laka, min sɔtɔta ɲabɔnɔya tɔ.

³³ Ka kɛ kaye bele fatanden Ala le la nun, a te nɔ fenfen mala nun.»

³⁴ Anu ka a jaabi: «Ile sɔtɔta junube le yati tɔ. Ile nɔn be diren mala mɔ karamɔgɔ le la ba?» Anu ka tɔŋɛ sigi a la, a kana don bitugun kawandi ma boŋɛ butɔ.

Ɲabɔnɔya yati

³⁵ Isa ka a mɔɛ ka a fɔla ɲabɔnɛ min ɲanu lakata, anu bata a latɔn a kana don kawandi ma boŋɛ butɔ bitugun, wo butɔ Isa tagata a ɲini. A ka a yen wagate min tɔ, a ka a fɔ a ye, a ko: «I be dɛnkɛnɛyaren Adamadeŋɛ ma ba?»

³⁶ A ka a jaabi, a ko: «N Marige, ɲɔmɔ le mu wo la? Alako n ni dɛnkɛnɛya a ma.»

³⁷ Isa ka a fɔ a ye: «I ɲan be a yenden. I nun nde min be kumala ka, wolo mu.»

³⁸ A ko: «N Marige, n bata dɛnkɛnɛya i ma.» A naata sujudu a ye.

³⁹ Isa ko: «Nde be naren de kɛ dunuya n ni mɔgɛnu makiiti mɔɔle do la: wolo si a ma minnu mu ɲabɔnɛ la, wonu ɲanu si laka, minnu tugun be ɲɔ tayenna, wonu si ma ɲabɔnɛ la.»

⁴⁰ A nun Farisinu minnu be ɲɔgɔnna, wonu donu ka kɛ kuma mɔɛ, anu ka a fɔ a ye: «Bɔ, mɔle tugun mu ɲabɔnɛ le la ba?»

⁴¹ Isa ka a fɔ anu ye, a ko: «Ka ɲabɔnɛ le mu wo la nun, junubu yo te to wo ma nun. Kɔnɔ kɔtɛ wo to ko wo be ɲɔ tayenna, wo la junubenu te kafari.»