Yaguba 4 - Ala la kitabuenu Mɔgɔfin kuma tɔ

Dunuya diyanankoe anun fan nakoloya

¹ Sɔnkɔsɔnkɛ nun kɛlɛ min be mala wo tɛma, wo lawule mu fen de la? Kaa, a bele lawulila wo diyanankoe koroŋɛnu le la, minnu be ɲɔgɔn kɛlɛla wo juse tɔ?

² Fondo sɔgɔ be wo la, kɔnɔ wo bele a sɔtɔla. Wolo be a maren, wo be sɔnden mɔgɛ nɛ falinna fondo la. Wo be miilala wo kafuɲɔgɛ la fondo ma, kɔnɔ wo te nɔ wo diyanankoe sɔtɔla, wolo mu wo be sɔnkɔla, wo be kɛlɛla. Kɔnɔ wo bɛ, wo te fenfen sɔtɔ bayi wo te Ala mataran.

³ Wo tini Ala mataran tugun, wo mɛn te fenfen sɔtɔ, bayi wo la tarile maɲin. Wo be tarile mala alako wo tini min yo sɔtɔ, wo ni naa a lawali wo diyanankoenu tɔ.

⁴ Wole, minnu bele maren lannanteya lakamalilá la Ala ye, wo ma a lɔn ba min be dunuya makanula, wo tigi bata Ala ma a jague la? Ka min be diren mala dunuya makanulá la, wo bata ma Ala kɔnnɛlá la.

⁵ Kaa, a bɛnta kɛ mira ni to wo ye ba, ka a fɔla min be sɛbɛren kitabue tɔ, Ala be wo fɔren fufafu le la? A ko, a bata hakkile min dii wo mɔ ma, a sɔgɔ be a la yati, wo hakkile ni sɔ a dɔrɔn de kɔma.

⁶ Wo bɛ butɔ, Ala la hinnɛnteya ɲan kolo tanbi koe bɛ la. Bayi, kitabue ko: «Ala be fan nakoloyalanu kɛlɛla, kɔnɔ a be hinnɛla fan majigilanu kan na.»

⁷ Awa, wo ni wo fan majigi Ala ye. Wo ni sɔ Sentanɛ kɛlɛ koe la, ale tugun si bori le wo la.

⁸ Wo madon Ala la, ale tugun si a madon de wo la. Wole junubutɔɛnu, wo yɛtɛ lasaniyan. Wole filankafuenu, wo juse labeya.

⁹ Wo ni di, ka suunu, ka jusu makasa belebele layɛlɛ. Wo la jele ni masara wo ye dire la, wo la sɛɛwa ni ma suunɛ banba la.

¹⁰ Wo majigi Marige ye, ale tugun si wo la ko mayɛlɛ le.

I yɛtɛ ma koe sariya salá la i nun i nɛɛnɛdɔndɛnu tɛma

¹¹ N nɛɛnɛdɔndɛnu, wo kana ɲɔgɔn tɔgɔtiɲa. Mɔgɛ min be a nɛɛnɛdɔndɛ tɔgɔtiɲala, a ni a yɛtɛ lafisaya a ko, wo tigi bata Ala la sariya tiɲa. A be a yɛtɛ lafisayaren wo Ala la sariya ko. Ka i bata wo ma, i bele Ala la sariya labaturen de, i be i yɛtɛ le maren sariya salá la wo la.

¹² Adun, Sariya Salá dɔndɔ pɛti le be ɲɔ, Kiiti Salá tugun dɔndɔ pɛti. Ale le si nɔ mɔgɛ lakisila, ale le si nɔ mɔgɛ lasamala. Kɔnɔ ɲɔmɔ le mu ile la, i to be i yɛtɛ maren i kafuɲɔgɛnu makiitilá la?

Natá jigan koe wasumanteya la

¹³ Kɔtɛ, wo wo tolomasɔ, wole min be a fɔla, «Bi nun sinan, mɔ si taga le saa do tɔ, mɔ ni san dɔndɔ ma julaya la ɲɔ, mɔ ni geenɛ sɔtɔ.»

¹⁴ Wo be wo koe mɔɔle fɔla, kɔnɔ wo ɲan ma a lɔn min be nala mala sinan. ⸂Kaa⸃, wo la dunuya takunte be toren wo ye kama le? A be toren de iko wuyeŋɛ min be yenna donden, wo kɔma a ni muttɛ.

¹⁵ Wo bɛnta kɛ-lɛ fɔla nun: «Ka Ala sɔnta, ka mɔ ka sinan yen, mɔ be kɛ-lɛ nun kɛ mala.»

¹⁶ Kɔnɔ kɔtɛ, wo be wo wasula ka fan nakoloya kuma fɔ. Adun, wo wasumanteya mɔɔle maɲin de!

¹⁷ Wo butɔ, ka mɔgɛ ka ko ɲinma lɔn a bɛnta a ni min ma, kɔnɔ a ma a ma, wo bata ma wo tigi ye junube la.