Luki 15 - Ala la kitabuenu Mɔgɔfin kuma tɔ

Saaka samareŋɛ la ko taale

¹ Duuti makelelanu nun junubutɔɛnu bɛ be anu madonna Isa la anu ni anu tolomasɔ a la.

² Farisinu anun sariya karamɔgɛnu be Isa la ko fɔla anu da kɔtɔ: «Kɛ kaye be junubutɔɛnu labɛnna a ɲinma la, a mɛn be dɔmɛ dɔmɔla anu fɛ.»

³ Wo butɔ, Isa ka kɛ taale fɔ anu ye, a ko:

⁴ «Ka saaka kɛmɛ tota mɔgɔ dɔndɔ bolo wo tɔ yan, dɔndɔ samata anu tɛma, wo tigi te wo saaka bi kɔnɔntɔ nun kɔnɔntɛ to wɔɔrɛ tɔ ɲɔ, a ni taga wo saaka dɔndɛ ɲinidula han a ni a yen?

⁵ A tini a yen, a ni sɛɛwa. A ni a jigan a ni a wakkɛ a ni a nati.

⁶ A la dondeŋɛ a bata, a ni a kafuɲɔgɛnu nun a sigiɲɔgɛnu kele, a ni a fɔ anu ye, a ko: ‹Wo mɔ bɛ ka sɛɛwa. N bata n na saaka yen min be samaren nun!›

⁷ Wo butɔ, n ni a fɔ wo ye, junubutɔɛ mɔgɔ dɔndɔ tini tuubɛ, sɛɛwa be tola saŋɛ tɔ tugun ɲɔgɔnna le, a si tanbi mɔgɔ telendeŋɛ bi kɔnɔntɔ nun kɔnɔntɔ la ko la minnu haju bele tuubɛ ko ma.»

Kaalise kolo samareŋɛ la ko taale

⁸ Isa mɛn ko: «Ka kaalise kolo tan tota muse do bolo, dɔndɔ samata, a te lanpue labita le ba, a ni boŋɛ butɔ mafitan a ni wo kaalise kole ɲini a ɲini ɲa yati ma, han a ni a yen?

⁹ A tini a yen, a ni a kafuɲɔgɛnu nun a sigiɲɔgɛnu kele, a ni a fɔ anu ye: ‹Wo mɔ bɛ ka sɛɛwa. N bata n na kaalise kole yen, min be samaren n na nun.›

¹⁰ Wo butɔ, n mɛn ni a fɔ wo ye, junubutɔɛ mɔgɔ dɔndɔ tini tuubɛ, sɛɛwa be tola Ala la malekanu tugun tɛma ɲɔgɔnna le.»

Den kayiren samareŋɛ la ko taale

¹¹ Isa mɛn ka taale do tugun fɔ, a ko: «Den kayiren fila be kaye do bolo.

¹² Lun do, den dɔgɔmaŋɛ ko a baaba ma: ‹Baaba, a bɛnta n ni min sɔtɔ i bolofeŋɛ tɔ, n mafanna dii n ma.› Wo butɔ, a baaba ka a bolofeŋɛ fatan anu fila ma.

¹³ A ma mɛ, den kayiren dɔgɔmaŋɛ ka a bolofeŋɛ min sɔtɔ, a ka a mafalin nafule la, a tagata jamanɛ yanfama tɔ, a ka a bolofeŋɛ bɛ ban kunnatiɲala dunuyanteya la.

¹⁴ A to ka a bɛ ban dɔmɔla, kɔnkɔ banba donta wo jamanɛ la, wo kɔma a fɔlɔta fola balue la.

¹⁵ Wo butɔ, a tagata a fan yita ɲɔ dugudeŋɛ do la wali koe la. Wo ka a jigan a ka a lasanba a la wɔɔrɛ tɔ kɔsɛnu kantadula.

¹⁶ A la toreŋɛ ɲɔ, a sɔgɔ tota a bitala a ni balu hali sɔsɔ foroŋɛnu la, kɔsɛnu be min dɔmɔla, kɔnɔ mɔgɔ yo ma a kɔ anu la.

¹⁷ Wo butɔ, a ka a hakkile latagaman a fan na ko ma, a ko a fan ma: N baaba la walilanu bɛ be dɔmɛ dɔmɔla han anu ni a tɔɛ to, nde nɔn be fagala yan kɔnkɛ la.

¹⁸ N si wuli le, n ni tasaagi n baaba ma, n mɛn si naa a fɔ a ye: ‹Baaba, n bata junube sɔtɔ Ala la anun ile.

¹⁹ A ma dagɛ bitugun i ni n kele iko i la deŋɛ, kɔtɛ i ni n ma iko i la walila do.›

²⁰ Wo butɔ, a wulita, a tagata a baaba bata. A to be yanfayaren, a baaba ka a yen nala, kinikinɛ ka a baaba bita, a borita a tagata a labɛn, a milinta a kaŋɛ la, a ka a sunbu.

²¹ Deŋɛ ka a fɔ a ye, a ko: ‹Baaba, n bata junube sɔtɔ Ala la anun ile. A ma dagɛ bitugun i ni n kele iko i la deŋɛ.›

²² Kɔnɔ a baaba ka a fɔ a la joŋɛnu ye, a ko: ‹Wo teriya doroki banba ɲinma labɔɔla, wo ni a lajigi n na deŋɛ ma. Wo ni bolo solinta kurunda don a bolo soliŋɛ tɔ, wo ni samata don a kɛŋɛ tɔ.

²³ Wo ni tuura deŋɛ nati min be kɛnden, wo ni a faga. Wo mɔ ni dɔmɔre ma, wo mɔ ni sɛɛwa,

²⁴ bayi n na kɛ deŋɛ be faga le butɔ nun, kɔnɔ a bata kisi. A be samaren nun, kɔnɔ a bata yen ma.› Wo butɔ, anu fɔlɔta sɛɛwala a ɲinma la.

²⁵ Wo ka a taran, kaye la den fɔlɛ be sɛnɛ tɔ. A la saagireŋɛ, a sutuya tɛmuɛ boŋɛ la, a ka sigi sa kulɛ mɔɛ anun dɔŋɛ kulɛ.

²⁶ A ka joŋɛ do kele a ka a maɲininka, fen min be maren.

²⁷ Wo ka a fɔ a ye, a ko: ‹I dɔgɛ bata na. I baaba ka tuura den kɛndeŋɛ faga a ye, bayi a bata a la deŋɛ yen, a be kendeyaren.›

²⁸ Wo butɔ, den fɔlɛ dumɛnta, a bele sɔnden donna boŋɛ tɔ. Wolo ka a ma, a baaba bɔɔta boŋɛ tɔ, a tota a madiyala a ni don.

²⁹ Kɔnɔ a ka a baaba jaabi, a ko: ‹I ka a lɔn, a bata san siyama bɔɔ n be tɔɔrɔla i ye, n bele balanna i la yamɔre hali dɔndɔ la feu. Kɔnɔ hali baa deŋɛ yati i ma a dii n ma, alako n ni murade sɔ n nun n kafuɲɔgɛnu ye.

³⁰ Kɔnɔ i la kɛ deŋɛ to nata, min ka i bolofeŋɛ bɛ kunnatiɲa feu anun musu jeenantenu, i ka tuura den kɛndeŋɛ faga wo kan ye.›

³¹ A baaba ka a jaabi, a ko: ‹N na deŋɛ, ile nun nde le mu tɛmu bɛ, n bolofeŋɛ bɛ ile le tan mu.

³² Kɔnɔ a bɛnta wo mɔ ni dɔmɔre ma, mɔ ni ɲagalin a ɲinma la, bayi i kɛ dɔgɔ kayima be faga le butɔ nun, kɔnɔ a bata kisi. A be samaren nun, kɔnɔ a bata yen.›»