Luki 14 - Ala la kitabuenu Mɔgɔfin kuma tɔ

Mɔgɔ yitireŋɛ lakendeya koe

¹ Sulen lɔ́gɛ́ do tɔ, Isa tagata don Farisinu la kuntige do la boŋɛ tɔ dɔmɔ dɔmɔ koe la. Minnu be dɔmɔri dula tɔ ɲɔ, wonu bɛ tota a lakɔrɔsila koola.

² Awa, bandibaga do be a ɲakɔtɔ tabɛŋɛ tɔ. Bande bata a bale bɛ layiti.

³ Wo butɔ, Isa ka kuma da bita a ka a fɔ sariya karamɔgɛnu anun Farisinu ye, a ko: «A be kama le? Mɔgɛ lakendeya koe sulen lɔ́gɛ́ tɔ, wo be dagɛren de mɔ la sariya tɔ ba ka ade?»

⁴ Anu ka anu mɔdɛ. Wo butɔ, Isa ka a bole sa bandibaga ma, a ka a lakendeya, a ka a boloka.

⁵ Isa ka anu maɲininka wo butɔ, a ko: «Ka wo la den kayireŋɛ, ka wo ma wo la ninge jigita kɔlɔŋɛ tɔ, mɔgɛ be wo tɛma yan ba min te a layɛlɛ kisanna hali sulen lɔ́gɛ́?»

⁶ Anu ma nɔ a jaabila wo la.

I fan majigi koe

⁷ Mɔgɛnu minnu be keleren dɔmɔ dɔmɔ koe la, Isa be wonu bɛ lasagala anu to be jindɛren kuntigenu sigidula masubɛla anu yɛtɛ ye. Wo butɔ, a ka taale do sa anu ye, a ko:

⁸ «Ka mɔgɔ do ka i kele a la musu jigan murade tɔ, i kana taga sigi kuntigenu sigidula dɔmɔ dɔmɔ tɛmuɛ, bayi tumado wo si a taran, mɔgɛ do be keleren ɲɔ, min fisa ile ko.

⁹ Kɔtɛ, min ka wo fila bɛ kele, ka wo nata a ni a fɔ i ye: ‹I ni wuli, i si naa wo sigidula dii doe ma.› Wo butɔ, i si wuli i be maluren, i ni sigidula do ɲini jama kɔma.

¹⁰ Awa, ka i bata kele murade tɔ, taga sigi kɔma. Wo butɔ, min be wo bɛ keleren, wo tini na, a ni a fɔ i ye: ‹Kayi, i madon yan, i ni na sigi kuntigenu sigidula tɔ.› Wo butɔ, i si biliya sɔtɔ muradilanu bɛ ɲala.

¹¹ N ni a fɔ wo ye: mɔgɔ yo be a fan mayɛlɛla, Ala si wo majigi le, kɔnɔ mɔgɔ yo be a fan majigila, Ala si wo mayɛlɛ le.»

Tɔɔrɔbaga kele koe

¹² Isa mɛn ka kuma do fɔ Farisi ye, min be a keleren, a ko: «Ka i be mɔgɛnu kelela kɔɔjɔbɔɛ la ka wo ma kimaŋɛ, hali i ma i kafuɲɔgɛnu kele anun i baaba dɔndɛnu, anun i bareŋɛnu, anun i sigiɲɔgɔ nafulu tigenu, bayi wonu tugun si nɔ i kelela le lun do, anu ni i la wale lasaagi i ma.

¹³ Ka i be mɔgɛnu kelela dɔmɔ dɔmɔ koe la, i be fugarenu le kelela, anun mɔgɔ mabɛndeŋɛnu, anun minnu be jigila a ma, anun ɲabɔnɛnu.

¹⁴ I si hɛra sɔtɔ wo tɔ, bayi fondo bele wonu bolo anu ni i la wale lasaagi i ma. I si i sɔŋɛ sɔtɔ Ala be telenbaganu lawulila lun min na.»

Muradi banba la ko taale

¹⁵ Isa dɔmɔri maɲɔgɛ do ka kɛ kuma mɔɛ, a ka a fɔ a ye, a ko: «Min be dɔmɔre mala Ala la mansabaya tɔ, hɛra si to le wo tigi ye.»

¹⁶ Isa ka a fɔ a ye, a ko: «Kaye do le be ɲɔ, a be muradi banba tabɛnna, a ka mɔgɔ siyama kele.

¹⁷ Dɔmɔri ma wagate to bata ke, a ka a la jon kaye kii mɔgɛnu kɔma a be minnu keleren nun, anu ni na, bayi dɔmɛ bata tabɛn.

¹⁸ Kɔnɔ anu bɛ ka bɔɔ ɲa ɲini a bolo kɛɲa dɔndɔ la. A tagata mɔgɔ fɔlɛ min keledula, wo ka a fɔ, a ko: ‹N bata duge do san, a fɛrɛ bele fɔ n ni taga a fɛlɛ. N bata i táran, i ni hakkɛ to n ɲɛ, n te nɔ tagala.›

¹⁹ Mɔgɔ filaɲɔgɛ tugun ko: ‹N bata sarin ningi fila sigidula loolu san, n be tagala wondelen mafɛlɛdula. N bata i táran, i ni hakkɛ to n ɲɛ, n te nɔ tagala.›

²⁰ Mɔgɔ sabaɲɔgɛ tugun ko: ‹N be bɔɔren muse jiganna kɔtɛ. Wolo be a maren n te nɔ tagala.›

²¹ Jon kaye la saagireŋɛ a ka wo lasaagi a tige ma. Wo butɔ, bon tige dumɛnta koola, a ka a fɔ jon kaye ye: ‹I teriya i ni taga saa butɔ fɛfɛ bɛ tɔ, kila banbanu anun kila mɛsɛŋɛnu. Ka i ka fugare minnu yen, anun mɔgɔ mabɛndeŋɛnu, anun ɲabɔnɛnu, anun minnu be jigila a ma, i ni anu bɛ nati yan.›

²² Jon kaye tagata, a nata. A la nareŋɛ a ka a fɔ a tige ye: ‹N tige, i ka n yamɔri min na, n bata wo ban mala, kɔnɔ han bi i la boŋɛ ma fa betun.›

²³ A tige ka a fɔ a ye, a ko: ‹I mɛn ka taga saa fɛfɛ tɔ. I ka mɔgɔ min yo taran kilanu tɔ ɲɔ anun daakanu tɔ, i ni anu karahan anu ni don, alako anu ni na n na boŋɛ lafa.

²⁴ N mɛn ni a fɔ wo ye, n ka minnu fɔlɛ kele nun dɔmɔ dɔmɔ koe la, wonu hali dɔndɔ te n na dɔmɛ mafɛlɛ.› »

Sɔ ɲa Isa kɔma

²⁵ Wo tɛmuɛ, jama banba be Isa jokkiren. A ka a firifiri anu ma, a ko:

²⁶ «Ka mɔgɔ min be diren sɔla n kɔma, ka a ma n kanu tanbi a baaba la nun a nɛɛnɛ la nun a la muse la nun a la deŋɛnu la nun a kɔtɔnu la nun a dɔgɛnu la, ka a ma n kanu tanbi hali a yɛtɛ nɛ la, wo te nɔ mala n na talibe la.

²⁷ Min ma sɔn a tɛn lɔgɔ bangalandeŋɛ jiganna a faga koe la, a ni sɔ n kɔma, wo te nɔ mala n na talibe la.

²⁸ Ɲɔmɔ le be wo tɔ yan, min be diren bon toireŋɛ sɔla, a ni to a ma sigi betunna a ni a mira, a ni a sɔ sɔŋɛ kɔnti, a ni a lɔn min be a bolo ka wo si a ban?

²⁹ Ka a ma wo fɔlɔ ma, ka a ka boŋɛ fondoma kɔɔrin, a si bon sɔ koe to ɲɔ, awa mɔgɛnu tini a yen, anu bɛ si a majele le wo tɔ,

³⁰ anu si a fɔ: ‹Wo kaye ka bon toireŋɛ sɔɛ fɔlɔ, kɔnɔ a ma nɔ a labanna feu!›

³¹ Mansa miniman tugun si sɔn, sɔɔri mɔgɔ wulu tan be min bolo, a ni taga mansa do kɛlɛ, min be nala sɔɔri mɔgɔ wulu mugan fɛ, a ni gali sigila betunna a ni fɛrɛ ɲini, alako a ni a lɔn ka a si a nɔ?

³² Ka a ka a yen a te a nɔ, yannun wo mansa ni sutuya a la, a si kiila lasanba a ma, alako kɛlɛ si nɔ makimala ki min na.

³³ Awa, mɔgɔ yo mɔgɔ be wo tɛma, ka i te i bolofeŋɛ bɛ boloka, i te nɔ mala n na talibe la.

³⁴ I ka a lɔn kɔɔkɛ mu ko ɲinma le la. Kɔnɔ ka a bata sɛɛya, a si kunaya kama le bitugun?

³⁵ A te ma fenfen na duge tɔ, hali suntukuŋɛ tɔ; mɔgɛnu si a lafili tun. Awa, tole be minnu la a mɔɛ koe la, anu ni anu tolomasɔ kɛ taale la koola.»