Lewi bɔnsɛnu la sariya 21 - Ala la kitabuenu Mɔgɔfin kuma tɔ

Sarika lakelá la saniyaŋɛ la ko

¹ Alatala kumata Musa ye, a ko: «A fɔ Harona la deŋɛ sarika lakelanu ye, sarika lakelá kana a fan ma saniyanbale la a la mɔgɔ do la fure la ko la de.

^2-3 Kɔnɔ sarika lakelá si nɔ mala saniyanbale la ka maga a balima mɔgɛ do fure kan na, iko a nɛɛnɛ, a baaba, a la den kayireŋɛ nun a la den musereŋɛ, a dɔgɔ kayima nun a kɔtɔ kayima, anun a barenmusu den musereŋɛ, min ma sigi kayi dugu a be a bata betunna. A si nɔ magala wonu fure kan na.

⁴ Sarika lakelá ma bɛn a ni ma saniyanbale la a la muse fure maga koe la, ka wo ma a la muse la mɔgɛnu fure maga koe la.

⁵ Sarika lakelanu ma bɛn anu ni anu kuŋɛ kan donu masi a yita koe la anu be suunɛ le tɔ, anu kana anu bɔɔra fɛfɛ masi, anu kana anu bale mafara.

⁶ Anu ni saniyan nde anu Marige Ala ye. Nde Alatala anu Marige, anu kana n tɔgɛ tiɲa, bayi ande le be sarika bintannɛŋɛnu bɔɔla nde Alatala ye, minnu be toren iko dɔmɛ n be min dɔmɔla. Wolo mu anu bɛnta saniyanna.

⁷ Sarika lakelá ma bɛn langbe muse sigila, anun den musereŋɛ min fute bata tiɲa, anun kaye bata muse min aɲɛ. Bayi sarika lakelá saniyanta nde a Marige Ala ye.

⁸ Bani Isirayila kaanu ni a bita saniyan mɔgɛ la, bayi ale le be sarikanu diila nde Ala ma minnu be toren iko dɔmɛ n be min dɔmɔla. Wo ni a lɔn a saniyanta. Bayi nde Alatala min be wo lasaniyanna, n saniyanta.

⁹ Ka sarika lakelá la den musereŋɛ do ka a yɛtɛ lamalu langbeya ma koe la, a bata a baaba lamalu. Fɔ ale den musereŋɛ ni bintan ta la.

¹⁰ Sarika lakelá kuntige min be masubɛren a nɛɛnɛdɔndɛnu tɛma, anu be tulu saniyandeŋɛ saren min kuŋɛ ma a kɛrɛkɛrɛ koe la, anu be kuta saniyandeŋɛ donden a ye, ka wo tigi be suunɛ tɔ, a kana a kunsige laboloka, a kana a la kutanu fara.

¹¹ A kana a yɛtɛ ma saniyanbale la don koe la fure yo kunma, hali a mata a baaba la, ka wo ma a nɛɛnɛ.

¹² A kana nde a Marige Ala la hɔrɔma dingira manɔgɔ, ka bɔɔ wo dula saniyandeŋɛ tɔ, bayi nde Ala le be a masubɛren, tulu saniyandeŋɛ be saren a kuŋɛ ma. Nde le mu Alatala la.

¹³ A ni den musereŋɛ sigi min ma kayi ko fɔlɔ ma.

¹⁴ A kana furuɲa muse sigi, a kana den musereŋɛ sigi min fute bata tiɲa, a kana langbe muse sigi, a kana muse sigi min ma ma den musereŋɛ la. A ni den musereŋɛ jigan muse la ale yɛtɛ la mɔgɛnu tɛma,

¹⁵ alako a kana a bɔnsɛ lamalu a la jama tɛma. Bayi nde le mu Alatala la, min be a kɛrɛkɛrɛren.»

¹⁶ Alatala kumata Musa ye, a ko:

¹⁷ «A fɔ Harona ye, a bɔnsɛnu tɛma lanjurutɔɛ yo kana sarika lake wale ma a ni sarika sa sarika bintandula tɔ Ala ye.

¹⁸ Lanjurutɔɛ yo ma bɛn a ni a madon sarika bintandula la. Iko ɲabɔnɛ, anun min be jigila a ma, anun min suŋɛ be ɲɛngɛnden, anun min boliŋɛ be tiɲaren,

¹⁹ a kɛŋɛ be katiren ka wo ma a bole,

²⁰ min be kunkurunden, anun min na kayanya ma kamali, anun bande be min ɲanu tɔ, anun bali bole bandiya be min na, anun kayi nuunureŋɛ.

²¹ Lanjurutɔɛ yo be fatanden Harona sarika lakelá bɔnsɛ la, a kana a madon nde Alatala la sarika bintandula la alako a ni sarika bɔɔ nde a Marige Ala ye.

²² A si nɔ nde a Marige Ala la dɔmɔ saniyandeŋɛ mɔɔle bɛ dɔmɔla minnu be sɔtɔla wo sarikanu bɔɔ koe tɔ,

²³ kɔnɔ a ma bɛn a ni a madon parawan na, min be dula saniyandeŋɛ tɔ, ka wo ma sarika bintandula la, bayi lanjurutɔɛ le mu a la. Wolo mu a kana n na dula saniyandeŋɛ tɔgɛ tiɲa, bayi nde le mu Alatala la, min be sarika lakelanu kɛrɛkɛrɛla.»

²⁴ Awa, Musa ka wo kuma bɛ matanbi Harona nun a la deŋɛnu ma, anun Isirayila kaanu bɛ ma.