Kiilanu 12 - Ala la kitabuenu Mɔgɔfin kuma tɔ

Yaguba la faga nun Piyɛri sa koe geele tɔ

¹ Wo tɛmuɛ yati le, mansa Herodu fɔlɔta donu lasɔla anu tɔɔrɔ koe la dɛnkɛnɛyabaga jama tɛma.

² Wo butɔ, a ka Yaya nɛɛnɛdɔndɛ Yaguba faga faŋɛ la.

³ A to ka a yen, wo diyata Yahudenu ye, a ka Piyɛri tugun bita dɛgɛ lɛbini bɔnɛ sali tɛmuɛ.

⁴ A la a bitareŋɛ, a ka a sa geele tɔ. A ka a don sɔɔri kuruŋɛ naani bolo, kurun yo kurun sɔɔri naani, a ko anu ma, anu ni a kanta. A be a nataren a ni a makiiti jama ɲala, Hɔrɔya sale tini bɔɔ a la.

⁵ Piyɛri to be balanden geele tɔ, dɛnkɛnɛyabaga jama tugun tota Ala mataranna a ye anu hanige bɛ la.

⁶ A sɔgɔ be Herodu la a ni a makiiti sinan ɲɔgɔn. Bi sue, Piyɛri be kinnɔgɔla sɔɔri fila tɛma, a be kitiren jɔlɔnkɔn fila la. Kantarilanu tugun be sɔren geele bonda tɔ a kanta koe la.

⁷ Awa, Marige la maleka do sɔta a kɛnna kisanna, nɔɔra ka geele butɔ lamalan. Maleka ka Piyɛri sɔngɔ magarin, a ka a lakunɛn, a ka a fɔ a ye: «Wuli teriya la!» Jɔlɔnkɔŋɛnu bɔɔta a bole tɔ kisanna, anu boeta.

⁸ Maleka ka a fɔ a ye: «I tɛ kiti, i ni i la samatanu don.» A ka wo ma. Maleka ka a fɔ a ye tugun: «I la doroki banba wanɛ i ma, i ni n jokki.»

⁹ Piyɛri bɔɔta, a ka maleka jokki. Maleka be min maren, Piyɛri ma a lɔn wo koe mu tɔɲa le la, a be maren a ye iko kiboe.

¹⁰ Anu to tanbita kantarila fɔlɛnu la, anun a filaɲɔgɛ la, nɛgɛ bonda min be a ɲamatelenden saa ye, anu keta wo ma. A lakata anu ye a fan na, anu bɔɔta, anu tagata ɲatɔ donden kila kunma. Maleka bɔɔta a kunma ɲɔ kisanna.

¹¹ Piyɛri to ka hakkili sɔtɔ wo koe ma, a ka a fɔ: «N bata a lɔn kɔtɛ yati, Marige le bata a la maleka kii, a ni n bɔɔ Herodu bolo a mɛn ni n natanga Yahude jama sagona koe bɛ ma.»

¹² A to ka fahamu sɔtɔ, a tagata Mariyama la boŋɛ tɔ, Yaya Maraki nɛɛnɛ. Mɔgɔ siyama be madɛnden ɲɔ, anu be Ala mataranna.

¹³ A to ka dondula bonda kɔnkɔn, jon muse do, min tɔgɔ Rode, wo tagata ɲɔ fɛlɛ.

¹⁴ A to ka Piyɛri kumari kulɛ talɔn, a ɲagalinta han a tota a ma bonda laka, fɔ a borita donna le, a ka a fɔ aa Piyɛri be sɔren bonda tɔ.

¹⁵ Anu ka a fɔ a ye: «I bata dakuya!» A ka anu lalaa, aa a be ɲɔgɔnna le, kɔnɔ anu ko: «Kɔnɔ a la maleka ma ba?»

¹⁶ Han bi Piyɛri tota bonda makɔnkɔnna tun. A tɔɛ la, anu to ka bonda laka, anu ka a yen, anu kaabɛta han.

¹⁷ Kɔnɔ a ka anu masabari a bole la, anu ni anu mɔdɛ. Marige ka a labɔɔ geele tɔ ki min na, a ka wo ɲatabɔ anu ye. A mɛn ko: «Wo ni kɛ koenu lasaagi Yaguba nun nɛɛnɛdɔndɛ doenu ma.» Wo kɔma, a naata bɔɔ, a tagata dula do tɔ.

¹⁸ Ɲɔ la kɛnɛreŋɛ, ɲatadoŋɛ banba tota sɔɔrenu tɛma, Piyɛri la sama koe la.

¹⁹ Herodu ka a ɲini, kɔnɔ a ma a yen. Wo butɔ, a ka a kantalanu makiiti, a ka yamɔre sa anu bɛ ni faga. Wo kɔma, Herodu naata bɔɔ Juda, a jigita Sesare saa tɔ, a tota ɲɔ.

Mansa Herodu la faga

²⁰ Wo tɛmuɛ, Herodu be dumɛnden koola Tiiri kaanu nun Sidɔn kaanu ma. Wo butɔ, wonu tagata a dula hanigi dɔndɔ la, ka anu si kɛlɛ ban anu tɛma, bayi anu la jamanɛ balue be bɔɔla a la jamanɛ tɔ le. Wo butɔ, anu ka Bilasiti, Herodu la bon kuŋɛ ma anu jatige la.

²¹ Anu bɛnta luŋɛ min ma, Herodu ka a makiti a la mansaya kutanu tɔ, a sigita a la mansa tintiŋɛ tɔ, a be kumala jama ye.

²² Mɔgɛnu be sɔnkɛ layɛlɛla, anu ko: «Ala le kulɛ mu ka, mɔgɔ ma!»

²³ Herodu to ma Ala biliya, Marige la maleka do ka a botege kisanna, wo butɔ, tunbenu ka a dɔmɔ han a nɛ bɔɔta.

²⁴ Ala la kuma kan tota sɛnbɛ sɔtɔla tun, a tota yiriwala.

²⁵ Baranabasi nun Sɔlu to banta kiila lakela Darisalamu, anu saagita Antiyoki, anu ka Yaya Maraki tugun doni anu fɛ.