Ko fɔlɔfɔlɛ 50 - Ala la kitabuenu Mɔgɔfin kuma tɔ

Yaguba la baadɛreŋɛ

¹ Yusufu ka a kunsin a baaba fure ma, a ka a masunbu, a dita a kunma.

² Wo kɔma Yusufu ka a la boori bɔɔlanu yamɔri anu ni boore ladon a baaba bali kɔtɔ alako a kana bɔrɔ. Anu ka wo ma Yaguba la.

³ Anu tota wolo tɔ han tele bi naani, anu la naamuŋɛ kɛɲa ma. Misira kaanu ka a la faga koe kinikini ma han tele bi wɔrɔwila.

⁴ Faga koe to bɔɔta a la, Yusufu ka a fɔ Misira mansa mamakafuɲɔgɛnu ye: «Ka wo si nɔ hinnɛnteya mala n ɲɛ, n bata wo táran wo n na kuma matanbi Misira mansa ma.

⁵ N baaba ka n nakali le, a ka a fɔ, aa be faga koe le tɔ. Aa n ni a mandi gabure le tɔ min be soeren Kanana duge tɔ. Kɔtɛ, n bata mansa táran, a ni a to n ni taga n baaba mandi. Wo tɛmuɛ n si na.»

⁶ Misira mansa ka a jaabi, a ko: «Yɛlɛ, i ni taga i baaba mandi iko a ka i lakali ki min na.»

⁷ Yusufu yɛlɛta, tagala a baaba mandidula. A nun Misira mansa la walilanu bɛ nun a la bon butɔ kuntigenu anun Misira kuntigenu bɛ,

⁸ anun Yusufu la denbaya bɛ, a baaba dɔndɛnu anun a baaba la denbaya, a bɛ tagata le. Dendeŋɛnu anun kolofeŋɛnu a banba nun a lanma tun de tota Gosɛn duge tɔ.

⁹ Yusufu nun sarɛtinu anun soo laborilanu tugun tagata. Wo koe mata jama banba le la han a tanbita a tɔ.

¹⁰ Anu to keta Atadi lɔŋɛ tɔ, Yurudɛn kɔɛɛ kɔkɔma, anu ka fure makinikini, wo mata suunu belebele la han a tanbita a tɔ. Yusufu ka a baaba makinikini han tele wɔrɔwila.

¹¹ Kanana kaanu ka wo fure la kinikinɛ yen, min be maren Atadi lɔŋɛ tɔ, anu ka a fɔ: «Kɛ faga koe be maren suunu belebele la Misira kaanu ye.» Wolo ka a ma anu ka wo dula tɔgɔ sa «Misira suunɛ», Yurudɛn kɔɛɛ kɔkɔma.

¹² Yaguba ka a la deŋɛnu yamɔri ki min na, anu ka wo lakamali.

¹³ A la deŋɛnu ka a fure doni Kanana duge tɔ, anu ka a mandi Makipela duge tɔ fanmɛ tɔ Mamire tabɛŋɛ tɔ, Iburahima ka duge min san Efurɔn Hɛti kaa ma alako ɲɔ ni ma gaburudula la.

¹⁴ Anu to bata ban a baaba mandila, Yusufu nun a baaba dɔndɛnu, anun mɔgɛ min bɛ tagata a masɔdula a baaba baadɛ tɔ, anu saagita Misira duge tɔ.

Yusufu nun a baaba dɔndɛnu

¹⁵ Yusufu baaba dɔndɛnu to bata a yen anu baaba bata faga, anu ka a fɔ ɲɔgɔn ye: «Ka Yusufu ka kɛlɛɲɔgɔya telen mɔ la, mɔ ka ko koroŋɛ min bɛ ma a la, tumado a si a tɛŋɛ yɔgɔ le mɔ la.»

¹⁶ Wo butɔ, anu ka kiila kii a ni a fɔ Yusufu ye: «I baaba ka yamɔri le sa yannun a ni faga, a ko:

¹⁷ aa mɔ ni kɛ fɔ ile Yusufu ye: aa baaba bata i táran, aa i ni diɲa i kɔtɔnu la tiɲare ma anun anu la hakkɛ, bayi anu ka ko koroŋɛ ma le i la. Kɔtɛ yandi, aa i ni diɲa i baaba Marigi Ala la joŋɛnu la tiɲare ma.» Wo kumanu to fɔta Yusufu ye, a dita.

¹⁸ A kɔtɔnu faŋɛ nata anu boeta a kɛn kɔtɔ, anu ka a fɔ: «Mɔle len ka, i la joŋɛnu.»

¹⁹ Yusufu ka a fɔ anu ye: «Hali wo ma kilan. Nde le ma Ala la.

²⁰ Wo bɛnta le n kunma wo ni ko koroŋɛ sigi n ma, kɔnɔ Ala kan ka a mafalin a ɲinma la a ni jama banba nɛ lakisi min be nala kela iko bi.

²¹ Kɔtɛ, hali wo ma kilan. N si wo hajue bɛ jara le, anun wo la deŋɛnu.» Yusufu la wo kuma ka anu juse sa.

Yusufu la faga

²² Yusufu nun a baaba la denbaya sabatita Misira. A ka san kɛmɛ san tan sɔtɔ simaya la.

²³ Yusufu ka Efirayimu la deŋɛnu yen de. A ka a mamaren tolobita yen. A ka Manasi la den Makiri la deŋɛnu bɛ ma a la deŋɛnu le la.

²⁴ Yusufu ka a fɔ a baaba dɔndɛnu ye: «Nde tugun be faga da le tɔ. Kɔnɔ wo ni laa a la, Ala si hinnɛ le wo la. A si naa wo jigan de Misira, a ni wo doni duge tɔ, a ka a kali lahire min jigan koe la Iburahima nun Isiyaka nun Yaguba ye.»

²⁵ Yusufu ka Yaguba la deŋɛnu lakali, a fɔla: «Ala tini hinnɛ wo la, wo tɛmuɛ wo si n bɔɔ yan, wo ni n fure doni kunma.»

²⁶ Yusufu la simaya be san kɛmɛ san tan, a fagata. Anu ka boore ladon a bali kɔtɔ alako a kana bɔrɔ, anu ka a sa kuru kankira butɔ Misira duge tɔ.