Ko fɔlɔfɔlɛ 48 - Ala la kitabuenu Mɔgɔfin kuma tɔ

Manasi nun Efirayimu

¹ Wo koenu tanbi kɔma, anu ka a fɔ Yusufu ye, anu ko: «A fɛlɛ i baaba bele kendeyaren.» Bɔɔla a ka a mɔɛ, ale nun a la den kayiren fila tagata, Manasi nun Efirayimu.

² Anu ka a fɔ Yaguba ye: «I la den Yusufu be naren i bata.» A katata, a wulita, a sigita benbe tɔ.

³ Yaguba ka a fɔ Yusufu ye, a ko: «Ala sɛnbɛ tige bɔɔta le n ma Lusi, Kanana duge tɔ. A ka barikɛ sa n na ko tɔ.

⁴ A ka a fɔ n ɲɛ, a ko: ‹Nde le mu ka, n si i lajiidi, n ni i lasiya, n ni i ma jama banba tige la. N si kɛ duge dii le i bɔnsɛ ma hali i tanbi kɔma, a ni ma anu tɛŋɛ la kudai.›

⁵ Kɔtɛ i ka den kayiren filanu minnu sɔtɔ Misira yannun n ni na i dula Misira, Efirayimu nun Manasi, n bata anu ma n na deŋɛnu la, iko Rubɛn nun Simeyɔn to mu n na deŋɛnu la.

⁶ Kɔnɔ ka i ka deŋɛnu minnu sɔtɔ kɛnu kɔma, wonu si ma ile tɛŋɛ la. Anu be naala tola anu kɔtɔnu le kɔma anu la kɛɛ la ko la.

⁷ N na bɔɔreŋɛ Padan, yannun n ni ke Efarata, Kanana duge tɔ, i nɛɛnɛ Rakeli fagata n bolo kila la. N ka a mandi Efarata kila la ɲɔ, ka min tɔgɔ Betilɛmu.»

⁸ Yaguba ka Yusufu la deŋɛnu fɛlɛ, a ka a fɔ a ko: «Ɲɔmɔ le kɛnu la?»

⁹ Yusufu ka a baaba jaabi: «N na den kayireŋɛnu le, Ala ka minnu dii n ma yan.» Yaguba ka a fɔ, a ko: «N bata i táran yandi, anu madon n na alako n ni duba anu ye.»

¹⁰ Yaguba bata kɔtɔya, a ɲanu bele feŋɛnu lasagala. A te nɔ fondo yenna bitugun. Yusufu ka a la deŋɛnu madon a la, Yaguba ka anu masunbu a ka anu hibbɛ a ma.

¹¹ Yaguba ka a fɔ Yusufu ye, a ko: «N bele a miraren nun ka a fɔla n mɛn si i tayen. Kɔnɔ a fɛlɛ, Ala bata a laɲini n ni i la deŋɛnu yati yen.»

¹² Yusufu ka a la deŋɛnu jigan a baaba kɛn kunma. A ka a majigi a butinta duge ma.

¹³ Wo kɔma, Yusufu ka a la den fila bita a bole ma, a ka Efirayimu bita a bolo ɲinma bole la, Yaguba bolo mara sɔngɛ la. A ka Manasi bita a bolo mara bole la, Yaguba bolo ɲinma sɔngɛ la. A ka anu madon a la.

¹⁴ Kɔnɔ Yaguba ka a bolo ɲinma bole latanbi a bolo mara sɔngɛ la, a ka a sa Efirayimu kuŋɛ ma, min mu dendeŋɛ la. A ka a bolo mara bole latanbi a bolo ɲinma sɔngɛ la, a ka a sa Manasi kuŋɛ ma, hali a to mu den fɔlɛ la. A dun ka a lɔn a be koe min mala a bolenu la.

¹⁵ A dubata Yusufu ye, a ka a fɔ a ye, a ko: «N mankayi Iburahima nun n baaba Isiyaka be Ala min na kila kɔma, ile Ala min mu n dankunna la kabɔɔ n sɔtɔ luŋɛ han bi,

¹⁶ Ile min mu maleka la, i ka n bɔɔ ko bɛlɛŋɛ tɔ, ile Ala ni hɔrɔma to kɛ deŋɛnu la ko tɔ. Anu ni anu kele nde tɔgɛ la, anun n mankayi Iburahima nun n baaba Isiyaka tɔgɛ la. Anu ni jiidi jamanɛ butɔ koola.»

¹⁷ Kɔnɔ Yusufu to ka a yen a baaba bata a bolo ɲinma bole sa Efirayimu kuŋɛ ma, wo koe ma diya a ye feu. A ka a baaba bole bita alako a ni a bɔɔ Efirayimu kuŋɛ ma, a ni a sa Manasi kuŋɛ ma.

¹⁸ Yusufu ka a fɔ a baaba ye: «N baaba, i bata tantan, bayi Manasi le mu kina la. I be i bolo ɲinma bole sala ale le kuŋɛ ma.»

¹⁹ A baaba ma sɔn, a ka a fɔ: «N ka a lɔn, n na deŋɛ, n ka a lɔn. Ale tugun be naala mala bɔnsɔ siyama tige le la. Ale tugun si siya le, kɔnɔ a dɔgɛ le si naa fisaya siyala ale ko. A dɔgɛ bɔnsɛ si naa ma le sii siyama tige la.»

²⁰ A dubata anu ye wo lun, a ka a fɔ: «Bani Isirayila kaanu be naala duba mala wo tɔgɛnu le la. Anu si naa a fɔ ‹Ala mu barikɛ sala i la ko tɔ iko Efirayimu nun Manasi.›» A ka Efirayimu sɔ ɲatɔ Manasi ko, ɲɔgɔnna le.

²¹ Yaguba ka a fɔ Yusufu ye: «A fɛlɛ, n be faga da le tɔ. Kɔnɔ Ala si to le wo fɛ, a mɛn ni wo talasaagi wo benbanu la duge tɔ.

²² N bata Sisɛmu saa dii i ma, ka min fisa i kɔtɔnu tɛŋɛ ko, n ka ka min nabita Amɔri kaanu bolo n na faŋɛ nun n na kala la.»