Ko fɔlɔfɔlɛ 40 - Ala la kitabuenu Mɔgɔfin kuma tɔ

¹ Wo wagate la tanbireŋɛ, Misira mansa la walila kuŋɛ min be sɔren a la beere min pɔɔte la ko da tɔ, anun a la dɛgɛ bintanná kuntige ka koe tiɲa anu la mansa ma.

² Misira mansa dumɛnta a la bon kuntigi fila ma, min be sɔren a la beere min pɔɔte la ko da tɔ anun min be dɛgɛ bintanna.

³ A ka anu bita, a ka anu balan a kantalanu kuŋɛ la geeli boŋɛ tɔ, Yusufu be balanden ka min na.

⁴ A kantalanu kuŋɛ ka anu taaku Yusufu la, a ni mɛnni anu ma. Anu ka tɛmu do ma geele tɔ.

Kiboenu ɲatabɔɛ

⁵ Min be sɔren mansa la beere min pɔɔte la ko da tɔ, anun min be dɛgɛ bintanna Misira mansa ye, anu fila bɛ kibota su dɔndɔ geele butɔ. Kɔnɔ kiboe bɛ nun a ɲatabɔ ɲa.

⁶ Yusufu nata anu fɛlɛdula saguma a ka a taran anu juse be makasaren.

⁷ A nun minnu be balanden a marige la boŋɛ tɔ, a ka wonu maɲininka, a ko: «Fen de be a maren wo ɲakɔtɔ bata masara bi?»

⁸ Anu ka a jaabi: «Mɔ be kiboren de, kɔnɔ mɔgɔ yo bele yan min si nɔ kɛ kiboe ɲatabɔla mɔ ye.» Yusufu ka a fɔ anu ye, a ko: «Wo ma a lɔn wo kiboe ɲatabɔ koe be Ala dɔrɔn de bolo? Wo wo la kiboenu fɔ n ɲɛ ba.»

⁹ Min be sɔren mansa la beere min pɔɔte la ko da tɔ, a ka a la kiboe fɔ Yusufu ye, a ko: «N kibota le, n ka rɛsɛn lɔgɛ yen, a be sɔren n ɲa kɔtɔ tabɛŋɛ tɔ.

¹⁰ Bolin saba be bularen wo lɔgɛ ma. A to kuukuta, a fereta. A to fereta, a mɛn wolota, a ka a deŋɛ mɔreŋɛnu labɔɔ.

¹¹ Misira mansa la beere min pɔɔte be bitaren n bole la. N ka lɔgɔ wole mɔreŋɛnu bɔɔ, n ka anu burundu a la beere min pɔɔte butɔ, n ka a don a bolo.»

¹² Yusufu ka a fɔ a ye, a ko: «I la kiboe be min fɔren: wo bolin saba be tele saba le yitaren.

¹³ Tele saba tanbi kɔma, Misira mansa si i kunnawuli le, a si i lasaagi i la walidula kɔtɛ tɔ, i si naa beere min pɔɔte don de Misira mansa bolo iko i darita a la ki min na i be walila tɛmuɛ min tɔ mansa bolo nun.

¹⁴ Kɔnɔ ka i ka sɔnɔya sɔtɔ tɛmuɛ min tɔ, i kana ɲina n ma de. N bata i taran, i ni hinnɛnteya ma n ɲɛ, n na ko fɔ koe la Misira mansa ye, alako n ni bɔɔ kɛ geele tɔ.

¹⁵ Bayi anu ka n jigan nɔɛ le la Hebure jamanɛ tɔ, anu ka n nati. N ma fenfen ma yan tugun han anu ka n sa kɛ dinka dibireŋɛ tɔ.»

¹⁶ Min be dɛgɛ bintanna mansa ye, a to bata a yen Yusufu be kuma min ɲatabɔren a kaɲin, a ka a fɔ Yusufu ye, a ko: «Nde tugun kibota le boroŋɛ saba be sigiren n kunma, dɔmɔ beema be anu butɔ min be toren iko lɛɛki.

¹⁷ Dɛgɛ bintanná be dɔmɛ mɔɔle min bɛ ɲiɲala Misira mansa ye, a siyama be boron kunmanɛŋɛ tɔ. Kɔnɔ kondeŋɛnu ni kɛnɛ nala wo dɔmɛ dɔmɔla boroŋɛ tɔ min be n kunma.»

¹⁸ Yusufu ka a fɔ a ye, a ko: «I la kiboe be min fɔren: Wo boron saba be tele saba le yitaren.

¹⁹ Tele saba tanbi kɔma, Misira mansa si i kuŋɛ majigi le, a ni i yongi lɔgɛ tɔ, kondeŋɛnu ni i sube dɔmɔ.»

²⁰ Tele saba tanbi kɔma, Misira mansa ka a sɔtɔ luŋɛ muradi belebele sa a la walilanu bɛ ye. Min be sɔren mansa la beere min pɔɔte la ko da tɔ, anun a la dɛgɛ bintanná, a ka anu fila bɛ labɔɔ geele tɔ walilanu ɲala.

²¹ Min be sɔren beere min pɔɔte la ko da tɔ, a ka wo talasaagi a la walidula kɔtɛ tɔ, alako a mɛn ni beere min pɔɔte don a bolo.

²² Kɔnɔ a ka a la dɛgɛ bintanná yongi lɔgɛ tɔ. A bɛ mata iko Yusufu ka a ɲatabɔ anu ye ki min na.

²³ Kɔnɔ, min be sɔren beere min pɔɔte la ko da tɔ, a ma Yusufu la ko talɔn, a ɲinata a ma.