Ko fɔlɔfɔlɛ 3 - Ala la kitabuenu Mɔgɔfin kuma tɔ

Adamadeŋɛ la junubu fɔlɛ

¹ Alatala ka burun butɔ feŋɛnu min bɛ dali, kaa le keu. A ka muse maɲininka, a ko: «Kɔnɔ tɔɲa le Ala ka a fɔ le wo ye, lɔgɔ wole minnu bɛ be laakɔɛ butɔ aa wo kana fenfen dɔmɔ?»

² Muse ka kaa jaabi, a ko: «Ade, mɔ si laakɔɛ butɔ lɔgɔ wole bɛ dɔmɔ le.

³ Kɔnɔ, lɔgɛ min be sɔren laakɔɛ tɛma, Ala ko aa mɔ te a wole dɔmɔ, mɔ te maga a la, ka wo ma mɔ si naa faga.»

⁴ Kaa mɛn ka a fɔ muse ye: «Ade, wo te faga feu!

⁵ Kɔnɔ Ala ka a lɔn, ka wo ka a dɔmɔ lun min na wo si hakkile sɔtɔ le, wo ni to iko Ala min ka ko ɲinma nun ko koroŋɛ lɔn.»

⁶ Muse to ka lɔgɔ wole yen, a majabuta, a kaɲin dɔmɔnɛŋɛ la, a kaɲin hakkile sɔtɔfeŋɛ la, a ka a jigan, a ka a dɔmɔ. A ka do jigan, a ka a don a la kaye bolo anun min be ɲɔgɔn na, wo tugun ka a dɔmɔ.

⁷ Anu fila bɛ ɲa lakata kisanna, anu ka lɔn sɔtɔ a ma, anu be anu bali makoloŋɛ le la. Anu ka figiye yanbanu makara ɲɔgɔn fɛ, anu ka a milin anu tɛ la.

⁸ Wo kɔma, wura la fɔɲɛ to be bɔɔla, anu ka Marigi Alatala na kulɛ mɔɛ, a be a matagamanna laakɔɛ tɔ. Anu borita Marigi Alatala la anu tagata dogon laakɔ lɔgɛnu tɛma.

⁹ Marigi Alatala ka a kulɛ labɔɔ Adama ma, a ka a kele, a ko: «I be mina?»

¹⁰ Adama ka a labita, a ko: «N ka i na kulɛ le mɔɛ laakɔɛ tɔ. N kilanta, bayi n bali makoloŋɛ le mu. Wolo mu n dogonta.»

¹¹ Marigi Alatala ko: «Ɲɔmɔ ka a fɔ i ye ko i bali makoloŋɛ le mu? N ka tɔŋɛ sigi lɔgɛ min na, i bata a wole dɔmɔ ba?»

¹² Adama ko: «I ka muse min dii n ma, wolo ka wo lɔgɔ wole dii n ma, n ka a dɔmɔ.»

¹³ Marigi Alatala ka a fɔ muse ye: «I ka wo ma fenna?» Muse ka a jaabi, a ko: «Kaa le ka n natantan han n ka kɛ lɔgɔ wole dɔmɔ.»

¹⁴ Marigi Alatala ka a fɔ kaa ye, a ko: «Ile to bata wo ma, kɔtɛ dalifeŋɛ bɛ tɛma, ile bata danka. I si buubu i bue ma, i ni buguta dɔmɔ i la simaya bɛ butɔ.

¹⁵ N si jaguya to i nun muse tɛma, n si jaguya to i bɔnsɛ nun a bɔnsɛ tɛma. A bɔnsɛ si i kuŋɛ te, ile tugun si a tingiliŋɛ kin.»

¹⁶ Ala ka a fɔ muse tugun ye, a ko: «N si a banba sa i la bu dumɛ kunma; i si tiŋɛ doni le han, jɔnɔn i ni deŋɛ sɔtɔ. I la mira si to i la kaye ma tɛmu bɛ, ale si i yamɔri.»

¹⁷ Ala ka a fɔ Adama tugun ye, a ko: «I to bata i la muse kulɛ bita han i ka lɔgɔ wole dɔmɔ, n ka tɔŋɛ sigi min na n ko i kana a dɔmɔ, wo butɔ, duge si ladanka le ile la ko la.

¹⁸ Duge si ŋaniŋɛ nun baage lafɛtɛn i ye, i be i balue sɔtɔla sɛnɛ tɔ le.

¹⁹ I si wale ma, i ni woosi i balue sɔtɔ koe la. I si to wo tɔ han i be saagila tɛmuɛ min tɔ duge tɔ, bayi i bɔɔta duge le tɔ. I mu bangue le la, i mɛn be saagila wo bangue le tɔ.»

²⁰ Adama ka a la muse tɔgɔ sa Hawa, bayi ale le mata adamadeŋɛ bɛ nɛɛnɛ la.

²¹ Marigi Alatala ka bole donu tabɛn a ka a ma doroki banbanu la, a ka wo lajigi Adama nun a la muse ma.

²² Marigi Alatala ko: «Kɔtɛ, mɔgɛ bata to iko mɔle, a ka ko ɲinma nun ko koroŋɛ lɔn. Kɔtɛ, mɔ kana sɔn a ni a bole lafonti a ni malakise lɔgɛ wole do bɔɔ, a ni a dɔmɔ. Ka a ka wo dɔmɔ a la simaya si to dan bele a la.»

²³ Wo butɔ, Marigi Alatala ka a labɔɔ Edɛn laakɔ ɲinma butɔ. A ko anu ni taga duge lawali, Ala ka anu bɔɔ duge min tɔ.

²⁴ Awa, Ala ka Adama bee ɲɔgɔnna le. A ka malekanu sɔ Edɛn laakɔɛ tele yɛlɛ mafanna anu ni a kanta. Ta be bɔɔla anu bole tɔ iko faŋɛ. Tɛmuɛ bɛ wo ta be lindanna. A ka anu sɔ le ɲɔ alako mɔgɔ yo kana tanbi a ni taga ke malakisi lɔgɛ ma.