Ko fɔlɔfɔlɛ 27 - Ala la kitabuenu Mɔgɔfin kuma tɔ

Isiyaka la duba Yaguba ye

¹ Isiyaka bata ban kɔtɔyala, a bata ma ɲabɔnɛ la, a te nɔ fenfen yenna bitugun. Lun do, a ka a la den kayiren fɔlɛ Esayu kele, a ko: «N na deŋɛ!» A ka a jaabi: «Naamu!»

² Isiyaka ko: «I ka a yen n bata kɔtɔya, n faga wagate bata sutuya.

³ Kɔtɛ, i ni i la donso miraŋɛnu jigan, i la ndakanu anun kala, i ni taga sube ɲini n ɲɛ wula butɔ, i ni a nati.

⁴ I ni n diyana sube taba n ɲɛ, iko a be diyaren n ɲɛ ki min na, i ni a nati n ɲɛ. Wo butɔ, yannun n ni faga, n si duba i ye.»

⁵ Isiyaka ka min fɔ a la den kayiren Esayu ye, Rebeka be a tolomasɔren a bɛ la. Esayu bɔɔta tɛmuɛ min tɔ a tagata subu ɲinidula wula butɔ,

⁶ Rebeka ka a fɔ a la den kayireŋɛ Yaguba ye, a ko: «N bata a mɔɛ i baaba be a fɔla i kɔtɔ Esayu ye, a ko:

⁷ aa a ni a diyana sube nati a ye, a ni a ɲiɲa a ye a ni a dɔmɔ. Aa a si duba a ye Alatala ɲala yannun a ni faga.»

⁸ Rebeka ko: «Kɔtɛ, n na den kayireŋɛ, n be min fɔla i ye i tolomasɔ a la koola, i ni n na kuma bita.

⁹ Taga baa deŋɛ ɲinma fila bita n ɲɛ kula tɔ, i ni anu nati. N ni i baaba diyana sube taba iko a be diyaren a ye ki min na.

¹⁰ I ni a doni i baaba ye, a ni a dɔmɔ alako a ni duba i ye yannun a be fagala.»

¹¹ Yaguba ka a nɛɛnɛ Rebeka jaabi, a ko: «Iyon, kɔnɔ n kɔtɔ kayima Esayu mu ti tige le la, nde dun ti tigi ma n na.

¹² Ka n baaba ka n mamɔɔmɔ, a si a lɔn de Esayu ma nde la, n be mala a ye janfante le la, n te a la duba sɔtɔ n be a la danka le sɔtɔla.»

¹³ A nɛɛnɛ ko: «Wo danka be saagila nde le ma, n na den. I tolomasɔ n na kuma la tun, i ni taga wo baa den fila nati n ɲɛ.»

¹⁴ Yaguba tagata baa den fila bita a ka anu nati a nɛɛnɛ ye. A nɛɛnɛ ka a baaba diyana sube taba a ye, iko a be diyaren a ye ki min na.

¹⁵ Esayu la kuta ɲinma min be a nɛɛnɛ bolo nun boŋɛ tɔ, Rebeka ka wo jigan, a ka a lajigi a la den kayiren dɔgɔmaŋɛ Yaguba ma.

¹⁶ A ka baa deŋɛnu bole jigan a ka Yaguba bole nun a kaŋɛ makiti a la, ti bele ka min na.

¹⁷ A ka wo dɔmɔ diyama anun dɛgɛ min bɛ ɲiɲa, a ka wo don a la den Yaguba bolo.

¹⁸ Yaguba tagata a baaba taran, a ko a ma: «N baaba!» Isiyaka ko: «Naamu, ile ɲɔmɔ le, n na den kayireŋɛ?»

¹⁹ Yaguba ka a baaba jaabi, a ko: «I la den kayiren fɔlɛ Esayu le mu n na. I ka min fɔ n ɲɛ n bata wo ma. N bata i táran, wuli, i ni sigi. I ni n na sube dɔmɔ alako i ni duba n ɲɛ.»

²⁰ Isiyaka ka a fɔ a la den kayireŋɛ ye: «N na den, i ka kɛ sube sɔtɔ kama le teriya la?» Yaguba ka a jaabi, a ko: «I Marigi Ala le ka a dii n ma kila kunma.»

²¹ Isiyaka ka a fɔ Yaguba ye: «N na den, i madon n na, n ni i mamɔɔmɔ alako n ni laa a la, n na den Esayu yati le mu i la.»

²² Yaguba ka a madon a baaba la. A baaba ka a mamɔɔmɔ, a ka a fɔ: «A kulɛ mulunta Yaguba kulɛ la, kɔnɔ a bolenu kan be toren iko Esayu bolenu.»

²³ Isiyaka mafilita Yaguba ma, bayi te be a bolenu ma iko a la den kayiren Esayu bolenu be ki min na. A to dita dubala a ye,

²⁴ a mɛn ka a maɲininka, a ko: «Kɔnɔ, tɔɲa le ile le mu n na den kayiren Esayu la?» Yaguba ko: «Nde len.»

²⁵ Isiyaka ko: «N na deŋɛ, sube don n bolo, n ni a dɔmɔ alako n ni duba i ye.» Yaguba ka dɔmɛ sigi a kɛn kɔtɔ, a ka dɔmɔre ma. Yaguba ka beere tugun dii a ma, a ka a min.

²⁶ Isiyaka to ka dɔmɔre ban, a ka a fɔ a ye: «N na den, i madon n na i ni n sunbu.»

²⁷ Yaguba ka a madon a la, a ka a sunbu. Isiyaka ka a la kutanu kuɲɛ mɔɛ, a dubata a ye, a ko: «Tɔɲa le, n na den kayireŋɛ kuɲɛ be toren iko sɛnɛ kuɲɛ diyama, Alatala bata barikɛ sa sɛnɛ min tɔ.

²⁸ Ala mu kunda diila i ma min be bɔɔla kantɔ. Ala mu duge nafa diila i ma. Ala mu tɔnɔ banba tola i la sɛnɛ tɔ. Ala mu beere siyama diila i ma, min bele mɛren.

²⁹ Ala mu bɔnsɛnu bɛ tola i la nɔɛ kɔtɔ. Ala mu a mala see bɛ ni a majigi i ye, i ni ma i baaba dɔndɛnu kuŋɛ la, anu ni anu majigi i ye. Mɔgɔ yo ka i danka, dankare ni saagi a ma, mɔgɔ yo dubata i ye wo tigi tugun ni duba sɔtɔ.»

³⁰ Isiyaka to banta dubala Yaguba ye, Yaguba bɔɔta a baaba Isiyaka kunma. A ma mɛ a kɔtɔ Esayu nata bɔɔla wula butɔ sube bundula.

³¹ Ale tugun ka wo sube taba a tagata a sigi a baaba kɛn kɔtɔ. A ka a fɔ a baaba ye: «N baaba, wuli i ni i la den kayireŋɛ la sube dɔmɔ min di i ye, alako i ni duba n ɲɛ.»

³² A baaba ko: «Ile ɲɔmɔ le?» A ka a jaabi, a ko: «Nde le mu Esayu, i la den kayiren fɔlɛ.»

³³ Wo ka Isiyaka mafu, a bale sɛrɛnta a ma sɛnbɛ la. A ka ɲininkare ma, a ko: «Ɲɔmɔ le tagata sube faga a nata a sigi n kɛn kɔtɔ? Yannun i ni na, n ka wo dɔmɛ dɔmɔ n dubata a tigi ye. Ale le be wo duba sɔtɔla.»

³⁴ Esayu to ka a baaba la wo kumanu mɔɛ, a juse bɔɔta, a ka a tɔɔrɔ. A belebeleta sɛnbɛ la, a ka a fɔ a ye: «N baaba, duba nde tugun ye, yandi!»

³⁵ Isiyaka ko: «N te nɔ, bayi i dɔgɛ bata na janfa la, a ka i la duba doni.»

³⁶ Esayu ko: «A tɔgɛ le yati be a kunma: Yaguba, mɔgɔ janfala. A bata janfa ma n na kunɲama fila. A ka n na kayibaya sɔdula bita n bolo a ka wo ma a tɛŋɛ la. A mɛn bata n na duba tugun kanka kɔtɛ.» Esayu ka a fɔ a baaba ye, a ko: «I ma duba fondo to nde ye i ni duba n ɲɛ?»

³⁷ Isiyaka ka a jaabi, a ko: «I tolomasɔ, n bata ale ma kuŋɛ la ile kunma. N mɛn bata a nɛɛnɛdɔndɛnu bɛ ma a la joŋɛ la. N bata tɔnɛ nun beere je siyama duba ma a ye. N na den kayireŋɛ, n be fen de duba mala i ye bitugun?»

³⁸ Esayu ka a fɔ a baaba ye, a ko: «Baaba kɛ duba dɔndɛ dɔrɔn de be i bolo ba? I ni duba nde tugun ye.» Esayu dita a kulɛ mayɛlɛreŋɛ la.

³⁹ Isiyaka ka Esayu jaabi, a ko: «A fɛlɛ, duge tɔnɛ be kan do kan, i si yanfaya ɲɔ la anun kunda min be bɔɔla kan tɔ.

⁴⁰ I si i balue sɔtɔ i la faŋɛ la kɛlɛ tɔ. I si to i dɔgɔ kayima la nɔɛ kɔtɔ. Kɔnɔ ka a bɛlɛyata, i si i kuŋɛ kata a la nɔɛ kɔtɔ.»

Yaguba la taga a kau Laban bata

⁴¹ Esayu ka Yaguba bɛsɛnkɔnnɛya a baaba la duba la ko la, a baaba ka min ma a ye. Esayu ka a mira a juse tɔ, a ko: «N baaba la faga bata sutuya. A tini faga n si n dɔgɛ Yaguba faga le.»

⁴² Esayu la mira tagata min ma, wo fɔta Rebeka ye. Wo butɔ, a ka a la den kayireŋɛ Yaguba kele, a ka a fɔ a ye: «I ɲa sɔ. I kɔtɔ kayima ko a ni i faga, a ni a la mɔnɛ bɔɔ i tɔ.

⁴³ N na den, i tolomasɔ n kulɛ la. Bori teriya la, i ni taga Haran saa tɔ, n barenkaye Laban bata.

⁴⁴ I ni wagati do ma a bata ɲɔ han i kɔtɔ juse ni majigi.

⁴⁵ I kɔtɔ juse tini majigi tɛmuɛ min tɔ, ka a ɲinata i ka min ma a la, n si kiila kii i ma, i ni na. N bele diren fola wo fila bɛ la lun dɔndɔ.»

⁴⁶ Rebeka ka a fɔ Isiyaka ye, a ko: «Esayu ka Hɛti den musereŋɛ minnu futu, wonu bata n juse makasa han anu ka dunuya sɔgɔ bɔɔ n na. Ka Yaguba tugun ka Hɛti den musereŋɛ jigan wo si a dan natanbi; faga fisa wo ko.»