Ko fɔlɔfɔlɛ 21 - Ala la kitabuenu Mɔgɔfin kuma tɔ

Isiyaka la sɔtɛ

¹ Alatala hinnɛta Sara la iko a ka a fɔ a ye ki min na. A ka lahire min jigan a ye nun a ka wo lakamali.

² Iburahima la kikalakɔtɔya butɔ, Sara ka bue jigan, a ka den kayireŋɛ sɔtɔ Iburahima ye, iko Ala ka tɛmuɛ min fɔ a ye nun.

³ Sara ka den kayireŋɛ min sɔtɔ, Iburahima ka a tɔgɔ sa Isiyaka.

⁴ Isiyaka la sɔtɛ tele sagin luŋɛ, Iburahima ka a sunna iko Ala ka a yamɔri ki min na nun.

⁵ Isiyaka la sɔtɛ ka a taran de Iburahima la sɔtɛ bata san kɛmɛ bɔɔ.

⁶ Sara ko: «N bata sɛɛwa sɔtɔ Ala bolo, han n jeleta. Ka kɛ den sɔtɔ koe fɔta min ye, wo tugun si sɛɛwa, han a ni jele n fɛ.»

⁷ Sara takumata, a ko: «Ɲɔmɔ le si a fɔ nun Iburahima ye ka a fɔla Sara si singe dii deŋɛ ma? N dun bata den kayireŋɛ sɔtɔ a ye, wo ka a taran a bata kikala kɔtɔya koola.»

Hagara nun Isumayila lasanba koe

⁸ Bɔɔbɛ koloyata anu ka a singi bɔɔ. Iburahima ka muradi belebele ma a la den Isiyaka singi bɔɔ luŋɛ.

⁹ Wo lun, Hagara Misira kaa ka deŋɛ min sɔtɔ Iburahima ye, Sara ka wo yen yola Isiyaka la.

¹⁰ A ka a fɔ Iburahima ye, a ko: «Wo jon muse bee anun a la den kayireŋɛ, alako a nun n na den Isiyaka kana ma kɛɛ dɔndɔ jiganna la.»

¹¹ Iburahima mɔnɛta wo kuma la koola, bayi Isumayila tugun mu a la den kayireŋɛ le la.

¹² Kɔnɔ Ala ka a fɔ a ye, a ko: «Iburahima wo kana i mɔnɛ. I kana hanmɛ i la den kayireŋɛ nun i la jon muse la ko la. Sara ka fenfen fɔ i ye, i ni wo ma a ye, bayi n ka bɔnsɛ min lahire jigan i ye, wo bɔnsɛ be bɔɔla Isiyaka le tɔ.

¹³ Kɔnɔ i la jon muse la den kayireŋɛ, n si wo tugun ma le jama banba tige la, bayi a bɔɔta ile le tɔ.»

¹⁴ Iburahima wulita saguma piri. A ka dɛgɛ jigan, a ka je sa ji sa feŋɛ butɔ, a ka wo dii Hagara ma. Wo butɔ, a ka feŋɛnu sa a gabakunkuŋɛ ma, a ka a la deŋɛ don a bolo, a ka anu lasanba anu ni bɔɔ a bata. Hagara bɔɔta, a tagata a matagaman janfue butɔ, ka min tɔgɔ Bɛri-Seba.

¹⁵ Je banta ji sa feŋɛ butɔ tɛmuɛ min tɔ, Hagara ka a la deŋɛ to saren bapɛ do kɔtɔ.

¹⁶ A tagata sigi kan do iko i tini kala fili a be danna ka min ɲɔgɔn, a sigita ɲɔ le. A ka a fɔ, a ko: «N te sɔn n ɲa sɔla n na deŋɛ la a ni faga n ɲala.» A sigita dula yanfama tɔ, a dita koola.

¹⁷ Ala ka deŋɛ diri kulɛ mɔɛ. Ala la maleka kumari kulɛ bɔɔta saŋɛ tɔ, a ka Hagara kele, a ko a ma: «Hagara fen de be maren? I kana kilan, bayi Ala bata i la deŋɛ diri kulɛ mɔɛ bapɛ kɔtɔ.

¹⁸ Wuli, i ni taga deŋɛ lawuli i ni a bole bita, bayi n si naa a ma le jama banba tige la.»

¹⁹ Ala ka Hagara ɲa laka a ka kɔlɔŋɛ do yen. A tagata ji sa feŋɛ lafa je la a ka a dii deŋɛ ma, deŋɛ ka je min.

²⁰ Ala be a hakkile tola deŋɛ ma: a be koloyala. A sabatita janfue butɔ a mata kala filila bolo telendeŋɛ la.

²¹ A be sabatiren Paran janfue butɔ tɛmuɛ min tɔ nun, a nɛɛnɛ ka Misira kaa muse do futu, a ka wo dii a ma.

Iburahima nun Abimelɛki la lahire

²² Wo wagate ma, Abimelɛki ka a la sɔɔri kuntige Pikoli jigan, anu tagata kuma Iburahima ye, a ko: «Ala be i fɛ i la koe bɛ la.

²³ Wo butɔ, n be diren i ni i kali Ala la yan bi, ka a fɔla i te nde nun n na deŋɛnu anun n mamareŋɛnu janfa. Mɔ bata ko ɲinma min ma i ye, ile tugun ni wo ko ɲinma ɲɔgɔn ma mɔ ye. I be luntanya tɔ mɔ la jamanɛ min tɔ kɛ la, i si wo ɲinmaya ɲɔgɔn ma kɛ jamanɛ mɔgɛnu bɛ tugun ye.»

²⁴ Iburahima ko: «N bata n kali Ala la.»

²⁵ Kɔnɔ Iburahima ka a fan madi Abimelɛki ma kɔlɔŋɛ la ko la, Abimelɛki la joŋɛnu ka min bita nun nɔɛ la.

²⁶ Abimelɛki ka Iburahima jaabi, a ko: «N ma wo tigi lɔn. Ile tugun ma a fɔ n ɲɛ, fɔ bi n ka a mɔɛ.»

²⁷ Wo kɔma, Iburahima ka saakanu anun ningenu jigan a ka anu dii Abimelɛki ma; anu ka bɛnɲɔgɔya lakoti ɲɔgɔn tɛma.

²⁸ Iburahima mɛn ka saaka yɛrɛ wɔrɔwila do tugun bɔɔ a la saakanu la.

²⁹ Abimelɛki ka a maɲininka a ko: «I be kɛ saaka yɛrɛ wɔrɔwila bɔɔren fen de la ko la?»

³⁰ Iburahima ka a jaabi, a ko: «N bata kɛ saaka wɔrɔwila don i bolo, a ni ma mɔ tɛma seede la, a ni lɔn ma ko nde le ka kɛ kɔlɔŋɛ soe.»

³¹ Wo kɔma le, anu ka wo dula tɔgɔ sa Bɛri-Seba, bayi Iburahima nun Abimelɛki ka anu kali ɲɔgɔn ye wo dula le tɔ.

³² Anu ka anu ban kalila ɲɔgɔn ye tɛmuɛ min tɔ, Abimelɛki nun a la sɔɔri kuntige Pikoli ka anu kɔ sɔ saagi koe la Filisiti kaanu la jamanɛ tɔ.

³³ Iburahima ka lɔgɛ do ki Bɛri-Seba min tɔgɔ Tamarisi. A ka Alatala batu ɲɔ le, a ka a tɔgɔ sa «Abada Ala».

³⁴ Iburahima mɛta Filisiti kaanu la jamanɛ tɔ, a ka tɛmu yanfama ma ɲɔ.