Hɔrɔya 29 - Ala la kitabuenu Mɔgɔfin kuma tɔ

Sarika lakelanu kɛrɛkɛrɛ koe

¹ «I tini be Harona nun a la deŋɛnu kɛrɛkɛrɛla, anu ni sarika lake wale ma n ɲɛ, i be kɛ-lɛ mala: tuura lanma dɔndɔ jigan, anun saaka konton fila, kɔnɔ yo bele minnu la.

² I mɛn ni dɛgɛ jigan, anun lɛɛki min be lamulanden tule la, anun gato tule be saren min ma, wo bɛ ni ma lɛbinibɔnɛ la, a bɛ be ɲiɲala farin buntendeŋɛ le la.

³ I be wo bɛ sala boroŋɛ le butɔ, i ni a doni hɔrɔma dingira tɔ, anun wo tuuradeŋɛ nun wo saaka konton fila.

⁴ I mɛn si Harona nun a la deŋɛnu doni le bɛndula boŋɛ dondula tɔ, i ni anu saniyan je la.

⁵ I ni Harona la donfeŋɛnu lajigi a ma: a la doroki banba kɔtɔnɛŋɛ a masɔgɔreŋɛ yo, a la doroki banba bolo wutuma yo, a la doroki kunmanɛŋɛ bolobɔnɛ yo anun a la jusukun mabutinfeŋɛ. I be wo dorokenu bɛ kitila doroki kunmanɛŋɛ la tɛtakitiraŋɛ le la.

⁶ I si kufunɛ don de a kuŋɛ tɔ, i ni naa wo wala lanma saniyandeŋɛ kiti wo kufunɛ la.

⁷ I si tulu saniyandeŋɛ do jigan de i ni a bɔn a kuŋɛ ma, alako a ni lɔn mɔgɔ masubɛreŋɛ le mu a la.

⁸ I si a la deŋɛnu tugun madon de, i ni anu la doroki banba masɔgɔreŋɛ lajigi anu ma,

⁹ i ni naa kufunɛ don anu ye. I mɛn be Harona nun a la deŋɛnu tɛ kitila tɛtakitiraŋɛ le la. Wo butɔ, anu be mala sarika lakela la ɲɔgɔnna le, wo ni ma sariya banbale la. Awa, i tini be sɔdula diila Harona nun a la deŋɛnu ma, i be kɛ-lɛ mala:

¹⁰ I ni wo tuura lanma sɔ hɔrɔma dingira dala, Harona nun a la deŋɛnu si naa anu bole sa a kuŋɛ tɔ.

¹¹ I ni wo tuura lanma kannatɛgɛ nde Alatala ɲala, hɔrɔma dingira dondula tɔ.

¹² I ni a base do jigan, i ni a sa i bolo soliŋɛ la sarika bintandula binanu ma, i ni naa basi tɔɛ bɔn sarika bintandula kɛn kɔtɔ.

¹³ Wo kɔma, i si kɛ́ŋɛ jigan min bɛ be bu butɔ feŋɛnu ma, anun laare min be a juse mabutinden, anun kɔkelenu anun kɛ́ŋɛ min be anu ma; i si wo bɛ bintan sarika bintandula tɔ han a siise ni yɛlɛ.

¹⁴ Kɔnɔ tuura sube nun a bole nun a jaaɲɛ, i be wonu bintanna daaka kɔma la le: junubu kafari sarika le mu.

¹⁵ Wo saaka kontoŋɛ fila tɔ, i ni dɔndɔ jigan, Harona nun a la deŋɛnu ni naa anu bole sa a kuŋɛ ma.

¹⁶ I ni a kannatɛgɛ, i ni a base jigan i ni a punpun sarika bintandula lamiliŋɛ tɔ.

¹⁷ I be a sube kuntula a kuntu kunte le la, i ni a bu butɔ feŋɛnu nun a kɛŋɛnu lako, i ni anu sa wo kuntenu nun a kuŋɛ kunma sarika bintandula kunma.

¹⁸ I ni a sube bɛ bintan sarika bintandula kunma. Sarika bintannɛŋɛ le mu wo la nde Alatala ye, ta be min bintanna, a kuɲɛ diyama ni yɛlɛ nde Alatala ma.

¹⁹ Wo kɔma, i ni saaka kontoŋɛ doe tugun jigan, Harona nun a la deŋɛnu ni naa anu bole sa a kuŋɛ ma.

²⁰ I ni a kannatɛgɛ, i ni a base do jigan, i ni a sa Harona nun a la deŋɛnu bolo ɲinma tolo kɔtɔ ma, anun anu bolo ɲinma kunkuruba nun anu bolo ɲinma kɛnsolin kunkuruba ma; i ni naa wo basi tɔɛ punpun sarika bintandula lamiliŋɛ tɔ.

²¹ Base min be sarika bintandula kunma, i ni a do jigan anun tulu saniyandeŋɛ do, i ni a punpun Harona ma anun a la kutanu, i ni anu punpun a la deŋɛnu tugun nun anu la kutanu ma. Wo butɔ, Harona nun a la deŋɛnu bata kɛrɛkɛrɛ, anun anu la kutanu.

²² Wo saaka kontoŋɛ mu sarika le la min si sɔdula dii mɔgɛ ma sarika lake wale la. Wolo mu, i ni a kɛ́ŋɛ jigan: a fɔɲɛ, anun kɛ́ŋɛ min be a bu butɔ feŋɛnu ma, laare min be a juse mabutinden, kɔkelenu anun kɛ́ŋɛ min be anu mabutinden, anun a bolo ɲinma wote.

²³ I mɛn ni boroŋɛ jigan dɛgɛ lɛbinibɔnɛnu be min tɔ, min be sigiren nde Alatala ɲakɔtɔ: i ni dɛgɛ tigilindeŋɛ dɔndɔ jigan anu tɔ, anun lɛɛki dɔndɔ min be lamulanden tule la, anun gato dɔndɔ.

²⁴ I si wo dɛgɛnu nun wo sube bɛ sa le Harona nun a la deŋɛnu bole tɔ, anu ni wonu bɔɔ sarika la, anu ni anu dantɛgɛ nde Alatala ye.

²⁵ Wo kɔma, i ni naa anu bɔɔ anu bole tɔ, i ni anu sa sarika bintandeŋɛ doenu kunma sarika bintandula kunma, i ni naa anu bintan. Sarika le mu, ta be min bintanna, a kuɲɛ diyama ni yɛlɛ nde Alatala ma.

²⁶ I mɛn ni saaka kontoŋɛ jusukuŋɛ tugun jigan min be maren Harona sɔfeŋɛ la, i ni a dantɛgɛ nde Alatala ye, wo kɔma a si ma ile Musa tɛŋɛ la, i ni a dɔmɔ.

²⁷ Wo saaka kontoŋɛ min be maren Harona nun a la den kayireŋɛnu sɔfeŋɛ la, i be a jusukuŋɛ anun a wote minnu dantɛgɛren nde Alatala ye, i be wondelen kɛrɛkɛrɛla:

²⁸ bani Isirayila kaanu tini be kɛnɛ kanunteya sarika bɔɔla nde Alatala ye, anu bɛnta le anu ni wo kuntu fila dii Harona nun a bɔnsɛ ma anu ni anu dɔmɔ. Wo be mala sariya banbale le la bani Isirayila kaanu ye.

²⁹ Harona tanbi kɔma, a la donfen saniyandeŋɛnu be donna a la den kayireŋɛnu le bolo; anu be anu donna anu tini be kɛrɛkɛrɛla sɔ koe la wale la lun min na.

³⁰ A la deŋɛ min be tola a gbaa tɔ, a ni ma sarika lakela banba la, wo donfeŋɛnu be lajigila wolo ma han tele wɔrɔwila, jɔnɔn a ni naa don hɔrɔma dingira butɔ, wali madula dula saniyandeŋɛ tɔ.

³¹ Awa, i si saaka kontoŋɛ subu kuntu fila jigan de, i ni naa anu taba dula do tɔ ka min be saniyanden.

³² Harona nun a la den kayireŋɛnu be wo sube dɔmɔla bɛndula boŋɛ dondula le tɔ, anun dɛgɛ tɔɛ min be boroŋɛ butɔ.

³³ Anu dɔrɔn de si kɛ dɔmɛnu dɔmɔ a ni ma anu la junubu kafarifeŋɛ la, anu mɛn ni ma anu sɔfeŋɛ la, anu ni anu kɛrɛkɛrɛ tugun; mɔgɔ gbɛtɛ yo te anu dɔmɔ, bayi fondo saniyandeŋɛ le mu anu la.

³⁴ Ka dɔmɛ do tota han saguma, i ni wo dɔmɔ tɔɛ bintan ta la han a ni keremun, a ma bɛn dɔmɔla bitugun, bayi fondo saniyandeŋɛ le mu a la.

³⁵ Awa, i be a mala Harona nun a la den kayireŋɛnu ye ɲɔgɔnna le, iko n ka yamɔre min bɛ dii i ma: i be anu sɔla sarika lake wale la tele wɔrɔwila le kɔtɔ.

³⁶ Lun go lun, i be tuura lanma le bɔɔla junubu kafarifeŋɛ la, i mɛn ni sarika bintandula lasaniyan. I mɛn ni tulu saniyandeŋɛ sa sarika bintandula ma a saniyan koe la.

³⁷ Tele wɔrɔwila kɔtɔ, i be wo koe bɛ mala sarika bintandula kunma le, alako a ni to a dana ma: wo tɛmuɛ a bata ma fondo saniyandeŋɛ fisamante la, ka fenfen magata a la, a bata saniyan.

Sarika banbale min be mala lun go lun

³⁸ I be kɛnɛ kɛ-lɛ bɔɔla sarika bintandula kunma wagate bɛ: lun go lun, saaka konton fila minnu bata san dɔndɔ dɔndɔ sɔtɔ.

³⁹ I ni saaka konton dɔndɛ bɔɔ saguma, i ni doe bɔɔ fitiri warawara ma.

⁴⁰ Saaka konton dɔndɛ, i be farin buntendeŋɛ kilo saba le sala a kunma, anun oliwiye tulu ɲinma litari dɔndɔ anun a tɛma, anun rɛsɛn je litari dɔndɔ.

⁴¹ Saaka kontoŋɛ doe, fitiri manɛŋɛ, i be farin nun tule nun rɛsɛn je sala wo tugun kunma iko sagumanɛŋɛ. I ni a bintan, a kuɲɛ diyama ni yɛlɛ nde Alatala ma.

⁴² Sarika bintannɛŋɛ le mu, min bɔɔ koe be wajibiyaren wo bɔnsɛnu ma tɛmuɛ bɛ tɔ. A be bɔɔla bɛndula boŋɛ dondula le tɔ sarika bintandula kunma, nde Alatala ɲala. Nde nun wole be bɛnna ɲɔ le, n be kumala i ye ɲɔ le.

⁴³ Nde nun bani Isirayila kaanu be bɛnna ɲɔ le, n nɔɔra mɛn si naa ɲɔ kɛrɛkɛrɛ.

⁴⁴ N si bɛndula boŋɛ kɛrɛkɛrɛ le, anun sarika bintandula. N mɛn si Harona nun a la den kayireŋɛnu kɛrɛkɛrɛ le, alako anu ni sarika lake wale ma n ɲɛ.

⁴⁵ N si sabati le bani Isirayila kaanu tɛma, n mɛn si ma le anu la Ala la.

⁴⁶ Wo butɔ, anu si a lɔn de nde le mu Alatala la, anu la Ala, min ka anu labɔɔ Misira duge tɔ, alako n ni sabati anu tɛma. Alatala mu nde le la, anu la Ala.»