Hɔrɔya 28 - Ala la kitabuenu Mɔgɔfin kuma tɔ

Sarika lakelanu la donfeŋɛnu

¹ «I si i kɔtɔ Harona nun a la den kayireŋɛnu madon i la, Nadabi, Abihu, Elasari nun Itamari. I ni anu masubɛ bani Isirayila kaanu ɲaama, alako anu ni naa ma n na sarika lakelanu la, anu ni wali n ɲɛ.

Harona la donfeŋɛnu

² I ni donfeŋɛ saniyandeŋɛnu kara i kɔtɔ Harona ye, minnu si a la sɔdula nun a la kuntigiya makɛnɛn.

³ N be hakkili ɲinma diiren bolo laɲɛɲilá ɲinma minnu ma, i ni a yita anu la anu si Harona la wo donfeŋɛnu kara ki min na, a ni masubɛ a ni ma n na sarika lakela la a ni wale n ɲɛ.

⁴ Donfeŋɛnu le ka anu be minnu karala: jusukun mabutinfeŋɛ, doroki kunmanɛŋɛ bolobɔnɛ, doroki banba bolo wutuma, doroki banba kɔtɔnɛŋɛ a masɔgɔreŋɛ, kuntarɛfeŋɛ anun tɛtakitiraŋɛ. Awa, anu be kɛ donfen saniyandeŋɛnu le karala i kɔtɔ Harona nun a la den kayireŋɛnu ye, alako anu ni ma n na sarika lakelanu la anu ni wali n ɲɛ.

⁵ Anu be a karala sanu gese le la, anun tasɔgɛ gese a bululama, a dubalama, nun a wulenma la, anun tasɔgɛ kuta la.

Doroki kunmanɛŋɛ bolobɔnɛ

⁶ Anu si doroki kunmanɛŋɛ bolobɔnɛ ɲiɲa le sanu gese la, anun gese bululama, a dubalamanɛŋɛ, anun a wulenma la, nun tasɔgɛ kuta la. A ni ma bolo laɲɛɲilá ɲinma la wale yati la.

⁷ Anu si kuta julu fila ɲiɲa le doroke ye minnu be kitila kɔma anun ɲatɔ a gabakunkuŋɛnu tɔ.

⁸ Tɛtakitiraŋɛ yo, a be kitila doroke min na yo, a bɛ be ɲiɲala ɲɔgɔn fɛ fondo dɔndɔ le la, anu be ɲiɲala sanu gese le la, anun gese bululama, a dubalamanɛŋɛ nun a wulenma la, anun tasɔgɛ kuta la.

⁹ I be kuru sɔn bɛlɛn fila le jiganna, i ni Yaguba la deŋɛnu tɔgɛnu sɛbɛ anu ma.

¹⁰ Tɔgɔ wɔɔrɔ ni sa kure doe ma, tɔgɔ wɔɔrɔ ni sa kure doe tugun ma, anu kina ɲɔgɔn ko ki min na.

¹¹ I be Yaguba la deŋɛnu tɔgɛnu sɛbɛla wo kuru fila kunma, iko bolo laɲɛɲilá be manditɛ sala kurunda ma ki min na. I be wo kuru fila sala safeŋɛ sanunɛŋɛnu le tɔ, bɛ nun a safeŋɛ.

¹² I be wo kuru filanu kitila doroki kunmanɛŋɛ la kuta julu fila le la, wo butɔ nde Alatala si n na mira lataga bani Isirayila deŋɛnu la ko ma. Harona ni kɛnɛ anu tɔgɛnu sɔla a gabakunkuŋɛnu kunma nde Alatala ɲakɔtɔ, alako n ni n na mira lataga anu ma kɛnɛ.

¹³ Awa, i be anu safeŋɛnu ɲiɲala sanuɛ le la.

¹⁴ I be sanuɛ yati le jɔlɔnkɔn lanma fila bakkula anu la, i si minnu dɛbɛ.

Jusukun mabutinfeŋɛ

¹⁵ I si jusukun mabutinfeŋɛ ɲiɲa le kiiti safeŋɛ la, a ni ma bolo laɲɛɲilá ɲinma la wale le la. I be a ɲiɲala le iko wo doroki kunmanɛŋɛ bolobɔnɛ, a be sɔgɔla sanu gese le la, anun gese bululama, a dubalamanɛŋɛ nun a wulenma la, anun tasɔgɛ kuta la.

¹⁶ A lafontireŋɛ takatireŋɛ la yajɛ ni ma tunku naani le la, a sɔngɔ yo sɔngɔ nɔngɔn tɛma.

¹⁷ I be kuru sɔn bɛlɛŋɛ safa naani le sala a ma. Kurenu minnu si to safa fɔlɛ tɔ wonu tɔgɔ saradowani, topasi anun emerodu.

¹⁸ Safa filaɲɔgɛ kurenu tɔgɛ esikaribukulu, safiru anun diyamɔn.

¹⁹ Safa sabaɲɔgɛ kurenu tɔgɛ opale, agati anun ametisiti.

²⁰ Safa naaniɲɔgɛ kurenu tɔgɛ kirisoliti, oniki anun jasipe. Wo kurenu bɛ be sala safen sanunɛŋɛnu le tɔ dɔndɔ dɔndɔ.

²¹ Yaguba la deŋɛnu tɔgɛnu le be sala wo kurenu ma, anu be mala tan nun fila le la, iko anu tɔgɛ kɔnte. Wo tɔgɛnu si sa le anu ma iko manditɛ be sala kurunda ma ki min na. Kuru dɔndɔ yo kuru dɔndɔ, bɔnsɔ dɔndɔ tɔgɛ.

²² I be sanuɛ yati le jɔlɔnkɔn lanma fila ɲiɲala wo jusukun mabutinfeŋɛ ye, i si minnu dɛbɛ.

²³ I si sanu kurunda fila ɲiɲa, i si minnu bakku jusukun mabutinfeŋɛ tunku fila kunmanɛŋɛ la.

²⁴ I ni wo sanu jɔlɔnkɔŋɛnu fila kiti wo kurunda filanu la.

²⁵ I ni wo jɔlɔnkɔn fila kiti safeŋɛnu tugun na minnu be doroki kunmanɛŋɛ gabakunkuŋɛnu tɔ, a ɲatɔ mafanna.

²⁶ I mɛn ni sanu kurunda fila ɲiɲa, i si minnu sa jusukun mabutinfeŋɛ tunku fila kɔtɔnɛŋɛ la, minnu be magaren doroki kunmanɛŋɛ bolobɔnɛ la.

²⁷ I mɛn si sanu kurunda fila ɲiɲa le, i ni anu kiti kuta julenu kɔtɔ la minnu be bɔɔla doroki kunmanɛŋɛ gabakunkuŋɛnu tɔ, anu ni jigi han tɛtakitiraŋɛ kunma, tɛtakitiraŋɛ nun kuta julenu be labɛnna ka min na, a ɲatɔ mafanna.

²⁸ Jusukun mabutinfeŋɛ la kurundanu be kitila wo kurundanu la, julu bululama le la, alako jusukun mabutinfeŋɛ ni to tɛtakitiraŋɛ kunma, anu tɛma kana naala fatanna.

²⁹ Wo butɔ, Harona tini be donna dula saniyandeŋɛ butɔ, a si bani Isirayila bɔnsɛ bɛ tɔgɛ doni a fɛ a jusukuŋɛ tɔ, minnu be sɛbɛren kiiti sa jusukun mabutinfeŋɛ ma. Wo butɔ anu si ma mira latagafeŋɛ la nde Alatala ɲakɔtɔ wagate bɛ.

³⁰ I ni fondo fila sa kiiti sa jusukun mabutinfeŋɛ butɔ, anu ni to Harona jusukuŋɛ ma a tini be donna nde Alatala dula: wo butɔ, Harona be anu donila le a jusukuŋɛ ma wagate bɛ, alako a ni nɔ nde Alatala la malagire lɔnna bani Isirayila kaanu la ko la.

Harona la donfeŋɛ donu

³¹ I ni doroki banba bolo wutuma ɲiɲa, min be donna doroki kunmanɛŋɛ kɔtɔ; a be ɲiɲala gese bululama tun de la.

³² A kun dondula be tola a tɛma, a kaŋɛ si masɔgɔ le, iko bolo doroke be dɛbɛla ki min na a ɲinma la, alako doroke kana naala farala.

³³ I si gerenadi lɔgɔ wole misalenu bakku doroke dabole kɔtɔ lamiliŋɛ bɛ la, a bululama, a dubalama nun a wulenma, i mɛn si taliŋɛ sanunɛŋɛ bakku le anu tɛma:

³⁴ gerenadi wolo dɔndɔ yo dɔndɔ, sanu taliŋɛ dɔndɔ le be sala, doroke dabole kɔtɔ lamiliŋɛ bɛ la.

³⁵ Harona tini be a la sarika lake walenu mala, a be wo doroke le lajigila a ma; wo butɔ, a don tɛmuɛ nun a bɔɔ tɛmuɛ dula saniyandeŋɛ tɔ, nde Alatala ɲakɔtɔ, wo taliŋɛnu kulɛ si bɔɔ le, alako a kana faga.

³⁶ I be sanuɛ yati le ɲiɲala wala lanma la, i be a sɛbɛla le a ma: ‹A be saniyanden Alatala ye›, iko manditɛ be sala kurunda ma ki min na;

³⁷ i be a kitila julu bululama le la kufunɛ tɛma, a ɲatɔ mafanna.

³⁸ Awa, a be tola Harona tindɛ kunma le. Wo tɛmuɛ, a si nɔ le junube kote jiganna bani Isirayila kaanu be min mala anu la sarika diidula nde Alatala ma. Wo wala lanma si to le a tindɛ ma tɛmuɛ bɛ, alako nde Alatala ni anu la sarika bɔɔreŋɛnu jigan.

³⁹ A tɔɛ la, i be tasɔgɛ le karala doroki banba kɔtɔnɛŋɛ a masɔgɔreŋɛ la, anun a la kufunɛ, i mɛn ni naa tɛtakitiraŋɛ masɔgɔ.

Sarika lakelanu la donfeŋɛnu

⁴⁰ I si doroki banba masɔgɔreŋɛnu kara le Harona la den kayireŋɛnu tugun ye, anun tɛtakitiraŋɛnu nun kufunɛnu, minnu si anu la sɔdula nun anu la kuntigiya makɛnɛn.

⁴¹ I be i kɔtɔ Harona anun a la den kayireŋɛnu la donfeŋɛnu lajigila le anu ma, i ni tule sa anu ma, i ni anu sɔ sarika lakela wale la; awa, i be anu masubɛla ɲɔgɔnna le, anu ni ma n ɲɛ n na sarika lakelanu la.

⁴² Tasɔgɔ kuta tugun kara anu ye kurutu kɔtɔnɛŋɛ la kabɔɔ anu tɛ tɔ, han anu wotenu tɔ alako anu ŋayiboe ni sutura.

⁴³ Harona nun a la den kayireŋɛnu si wonu don de kɔtɔ, anu tini be donna n dula bɛndula boŋɛ butɔ, ka wo ma anu tini be anu madonna sarika bintandula la, hɔrɔma dingira tɔ. Wo butɔ, anu te junube kote sigi anu kunma, anu kana naala fagala. Sariya banbale le wo la Harona nun a bɔnsɛ bɛ ye, hali ale tanbi kɔma.»