1 Samiyɛli 9 - Ala la kitabuenu Mɔgɔfin kuma tɔ

Sayulu la a baaba la sofalenu ɲini koe

¹ Mɔgɔ do be nun Bunyamin bɔnsɛ tɔ Isirayila jama ɲaama, min tɔgɔ Kisu. A baaba tɔgɔ Abiyeli, Abiyeli baaba tɔgɔ Serori, Serori baaba tɔgɔ Bekorati, Bekorati tugun baaba tɔgɔ Afiya, min be sɔtɔren Bunyamin bɔnsɛ tɔ. Awa, Kisu be maren mɔgɛ le la, min sɔdula nun a sɛnbɛ kolo.

² A la den kayireŋɛ do be nun, min tɔgɔ Sayulu. Kamaren majabureŋɛ le mu la, a sɔɲa kaɲin Isirayila kaa bɛ ko. A mɛn kayan jama bɛ ko, mɔgɔ tɔɛnu bɛ sɔdaŋɛ be danna a gabakunkuŋɛ tɔ le.

³ Lun do, Kisu la sofali musenu le samata. Wo butɔ, a ka a fɔ a la den kayireŋɛ Sayulu ye, a ko: «Kamareŋɛ do jigan i fɛ, wo ni taga wo sofalenu ɲini.»

⁴ Awa, Sayulu ka kamareŋɛ do jigan, anu tagata. Anu tanbita Efirayimu kɔnkɛnu la, anu ka Salisa duge takuntu, anu ma sofalenu yen. Anu tagata Salayimu duge takuntu, anu ka a taran fenfen bele ɲɔ. Anu tagata Bunyamin bɔnsɛ la duge takuntu, anu ma fenfen yen.

⁵ Anu to donta Sufu duge tɔ, Sayulu ka a fɔ wo kamareŋɛ ye min be a jokkiren nun, a ko: «Mɔ saagi, alako n baaba kana to jusu makasa tɔ mɔle tugun na ko la, han a ɲan ni ɲina a la sofali musenu la ko la.»

⁶ Wo kamareŋɛ ka a fɔ a ye, a ko: «N kɔnɔn, Ala la mɔgɛ do be kɛ saa tɔ. Mɔgɔ banba le mu a la. A ka fenfen fɔ, a si ma le. Mɔ te taga a dula ka a si kila yita mɔ la, mɔ si sɔ min kɔma?»

⁷ Sayulu ka a fɔ wo kamareŋɛ ye: «Bɔ, ka mɔ be tagala ɲɔla, mɔ be fen donila Ala la mɔgɛ ye? Dɛgɛ yo bele mɔ la bɔnfɛ butɔ. Adun fenfen gbɛtɛ bele mɔ si min doni. Fen de be mɔ bolo mɔ si min dii kɛ Ala la mɔgɛ ma?»

⁸ Kamareŋɛ mɛn ka kuma jigan, a ka a fɔ Sayulu ye: «Nafulu kolonden be n bolo yan, n si wo don Ala la mɔgɛ bolo, a si mɔ la kila yita le mɔ la.»

^9-11 Sayulu ka a fɔ kamareŋɛ ye: «Wo si bɛn, mɔ ni ma.» Anu tagata ɲɔ saa tɔ, Ala la mɔgɛ be ka min na. Anu be yɛlɛla wo saa ma wagate min tɔ, anu bɛnta den museren donu la, minnu be tagala ji soridula, anu ka wonu maɲininka: «Bɔ, kɛ sinan kuma fɔlá be yan ba?» (Wo wagate Isirayila duge tɔ, ka min be tagala Ala maɲininkadula, a be a fɔla le, «Wo mɔ ni ma, wo mɔ ni taga sinan kuma fɔlá dula.» Bayi wondelen tɔgɛ be fɔla bi, «nabiyonmɛ».)

¹² Den musereŋɛnu ka anu jaabi, anu ko: «Iyon, ale le be wo ɲatɔ wo la ká. Kɔnɔ wo teriya de, bayi a be naren mɔ la saa tɔ bi, jama be sarika banba do bɔɔla tenteŋɛ tɔ.

¹³ Wo tini don saa butɔ kɔtɛ, wo si a taran de ɲɔ yannun a ni yɛlɛ wo tenteŋɛ tɔ a daɲinidula, bayi jama te a daɲini a kɔma, fɔ a tini na a ni duba sarika ma. Wo tini bɔɔ a la, jɔnɔn mɔgɛnu minnu be keleren sarika tɔ, anu ni naa anu daɲini. Wo yɛlɛ teriya la saa tɔ, wo si a taran de ɲɔ kɛ wagate.»

Sayulu nun Samiyɛli bɛn koe kila kunma

¹⁴ Awa, Sayulu nun wo kamareŋɛ yɛlɛta, anu donta saa tɔ. Anu don wagate saa tɔ, anu nun Samiyɛli bɛnta, a be nala anu mafanna ka taga tenteŋɛ tɔ.

¹⁵ Adun, yannun Sayulu ɲan ni na, wo ka a taran, Alatala bata Samiyɛli lalɔn nun bɔɔla kunun, ka a fɔla:

¹⁶ «Sinan kɛ wagate, n si mɔgɔ do lasanba i ma, min be bɔɔla Bunyamin bɔnsɛ la duge tɔ. I ni tule bɔn wo tigi kuŋɛ tɔ a yita koe la a bata ma n na Isirayila jama latagamanná la. A si n na jama lakisi le Filisiti kaanu bolo, bayi n bata n hakkili to n na jama ma, anu diri kulɛ bata na han a bata n taran.»

¹⁷ Samiyɛli to ka Sayulu yen, Alatala ka a fɔ a ye: «N ka kaye min na ko fɔ i ye nun, ale le mu ka. Ale le be naala a la nɔɛ sigila n na jama kunma.»

¹⁸ Sayulu ka a madon Samiyɛli la saa dondula tɔ, a ka a fɔ a ye: «Yandi, sinan kuma fɔlá la boŋɛ yita mɔ la.»

¹⁹ Samiyɛli ka a jaabi, a ko: «Nde le mu sinan kuma fɔlá la. Wo mɔ ni yɛlɛ tenteŋɛ tɔ sarika be bɔɔla ka min na. Wo mɔ bɛ le be naala wo mɔ daɲinila bi. N si i boloka fɔ sinan saguma. Koe min bɛ be i juse tɔ, n si a bɛ yita i la.

²⁰ I kana kɔntɔfili i la sofale musenu la ko la minnu la sama tele saba mu bi, bayi anu bata yen. Ɲɔmɔ le tɛŋɛ be mala Isirayila harige bɛ la ba? Kaa, ile le ma ba anun i baaba la juruya?»

²¹ Sayulu ka a fɔ, a ko: «Bunyamin kaa le mu n na, mɔle bɔnsɛ ma dɔgɔ ba bɔnsɛ bɛ tɛma Isirayila? Mɔ la gabila le tugun ma dɔgɔ gabila bɛ ko ba Bunyamin bɔnsɛnu tɛma? Fen de be a maren i be kumala n ɲɛ kɛ mɔɔle la?»

²² Samiyɛli ka Sayulu nun a la kamareŋɛ jigan, a ka anu ladon boŋɛ bu banba butɔ, a ka anu sigi sigidula fɔlɔfɔlɛ tɔ mɔgɔ makelereŋɛnu bɛ tɛma. Wo mɔgɔ makelereŋɛnu si taga han mɔgɔ bi saba.

²³ Samiyɛli ka a fɔ tabari malá ye: «N ka min don i bolo, n ko i ni a sa sɔngɔ, a nati yan ba.»

²⁴ Tabari malá ka wote min bɔɔ nun anun min be a kunma, a ka a jigan a nata a sigi Sayulu kɛn kɔtɔ. Samiyɛli ka a fɔ, a ko: «Kɛ-lɛ be saren nun sɔngɔ. A jigan, i ni a dɔmɔ. Mɔ ɲan ka a sa a katima ile le ye nun n ka kɛ jama makele wagate min tɔ.» Wo lun, Sayulu ka dɔmɔre ma anun Samiyɛli.

²⁵ Wo kɔma, anu jigita bɔɔla wo sarika bɔɔ dula tenteŋɛ tɔ, anu donta saa butɔ, anu naata don boŋɛ butɔ. Todula min be boŋɛ kanna, Samiyɛli nun Sayulu tota kumala ɲɔ le.

Samiyɛli la Alatala la kiila fɔ koe Sayulu ye

²⁶ Wo lun tabantaka, anu wulita saguma piri. Subaga ma tun, Samiyɛli mɛn ka Sayulu makele todula tɔ min be boŋɛ kanna, a ko: «Wuli, n ni i masɔ han kila la, n ni i boloka.» Sayulu wulita, anu bɔɔta kila tɔ, ale nun Samiyɛli.

²⁷ Anu to keta saa kɔma, Samiyɛli ka a fɔ Sayulu ye, a ko: «A fɔ i la kamareŋɛ ye, a ni tanbi ɲatɔ.» Kamareŋɛ tagata ɲatɔ, Samiyɛli ka a fɔ Sayulu ye, a ko: «Sɔ ba, n ni Ala la kuma fɔ i ye.»