1 Samiyɛli 8 - Ala la kitabuenu Mɔgɔfin kuma tɔ

Isirayila kaanu la mansa ɲini koe

¹ Samiyɛli to bata kayibaya, a ka a la den kayireŋɛnu ma kiiti salanu la Isirayila kunma.

² A la den kayiren fɔlɛ tɔgɔ le Yoweli, a filaɲɔgɛ tɔgɔ Abiya. Ande le mu kiiti salanu la Bɛri-Seba.

³ Kɔnɔ Samiyɛli la den kayireŋɛnu ma tagaman iko ale, anu sɔta anu la munanfaŋɛ le kɔma. Mɔgɛnu tota je sigila anu ye, ka kiite laɲɛngɛn.

⁴ Lun do, Isirayila kayibanu bɛ madɛnta, anu tagata Samiyɛli yendula Rama saa tɔ.

⁵ Anu ka a fɔ a ye, anu ko: «A fɛlɛ, i bata kayibaya, i la den kayireŋɛnu bele tagamanna iko ile. Awa mansa sɔ mɔ kunma, wo ni ma mɔ bɛ la kuntige la. Mansa ni to mɔ ye iko jamanɛ doenu.»

⁶ A fɔ koe, «mansa don mɔ bolo, ale ni ma mɔ la kuntige la», a bele diyaren Samiyɛli kan ye. Wo butɔ, a ka Alatala mataran.

⁷ Kɔnɔ Alatala ka a fɔ Samiyɛli ye, a ko: «Jama kulɛ lamɔɛ de! Ka anu ka min yo fɔ i ye, i ni wo bita, bayi anu bele ile le aɲɛren, anu be nde le aɲɛren, alako n kana ma mansa la anu kunma bitugun.

⁸ Anu be min mala i la ka, anu be wolo mala nde tugun na nun: bɔɔla n ka anu labɔɔ Misira butɔ han bi, anu be n bolokaren ka ala gbɛtɛnu batu.

⁹ Awa kɔtɛ, i tolomasɔ anu kulɛ la. Kɔnɔ, kɛ mansa min be nala sigila anu kunma, yamɔre min si naa to a bolo, min be ladagɛren a ni a ma, i ni anu lasogi wo la a ɲinma la ka a ɲatabɔ anu ye.»

Samiyɛli la jama lasogi koe mansa la yamɔri kɛɲa la

¹⁰ Samiyɛli ka Alatala la kuma bɛ matanbi jama ma, minnu be mansa la ko ɲininkare maren nun a ma.

¹¹ A ko: «Mansa min be nala wo yamɔrila, kɛ-lɛ be ladagɛren a ye a ni a ma: a si wo la den kayireŋɛnu jigan de, a ni anu ma a la sɔɔrenu la anu ni a la soeenu nun a la kɛlɛ mafen sarɛtinu labori, anu ni sɔ a tɛn sarɛti ɲatɔ ka to borila tagala kɛlɛ madula.

¹² A si donu jigan anu ni ma gali kuŋɛ la, mɔgɔ wulu dɔndɔ kuruŋɛ kunma, ka wo ma mɔgɔ bi loolu. A si donu tugun jigan anu ni a la sɛnɛnu wɔtɔ, a ni donu jigan anu ni a la sɛnɛnu tɛgɛ. A si donu jigan anu ni a la kɛlɛ mafeŋɛnu ɲiɲa, ka wo ma a la sarɛtinu.

¹³ A si wo la den musereŋɛnu tugun jigan, anu ni tabare ma a ye, ka dɛgɛ bintan, ka labundɛ tugun ɲiɲa a ye.

¹⁴ Tɔnɛ min be wo la sɛnɛnu tɔ, wo la rɛsɛn suntenu tɔ anun wo la oliwiye suntenu tɔ, a si a bɛ jigan de, a ni a don a la walilanu bolo.

¹⁵ A si wo la kifen wole tanɲɔgɛ yo tanɲɔgɛ jigan, a ni a dii a la walilanu nun a la mansa mɛsɛŋɛnu ma.

¹⁶ A si wo la walilá ɲinmanu jigan de, a kayimanu nun a musumanu. Wo la fonikenu, anun wo la sofalenu, a ni anu ɲusu a la walenu la, a dita a ye ki min na.

¹⁷ Wo la baa nun saakanu tɛma, a si a tanɲɔgɛ bɛ jigan a ni a ma a tɛŋɛ la. A si wole tugun ma le a la joŋɛnu la.

¹⁸ Wo si belebele le wo lun, wo la mansa la ko sabu la, wo ka min masubɛ wo yɛtɛ ye, kɔnɔ Alatala te wo jaabi wo lun.»

¹⁹ Kɔnɔ jama ma sɔn a tolomasɔla Samiyɛli la. Anu ko: «Ade, mansa ká sɔ mɔ kunma tun,

²⁰ mɔle tugun ni to iko jamanɛ doenu bɛ be ki min na, mɔ la mansa si ma mɔ la kuntige la, a ni sɔ mɔ ɲatɔ kɛlɛ madula.»

²¹ Samiyɛli ka jama la wo kuma bɛ lamɔɛ, a ka a bɛ matanbi Alatala ma.

²² Alatala ka a fɔ Samiyɛli ye: «I tolomasɔ anu la. I si mansa sɔ le anu kunma.» Wo tanbi kɔma, Samiyɛli ka a fɔ Isirayila jama ye: «Bɛ ni saagi a bata saa tɔ.»