1 Samiyɛli 7 - Ala la kitabuenu Mɔgɔfin kuma tɔ

¹ Kiriyati-Yeyarimu kayenu to ka kiilanu masɔtɔ, anu nata, anu ka Alatala la seedeɲɔgɔya kankira jigan, anu ka a doni Abinadabi bata tenteŋɛ kunma, anu ka a la den kayiren Elasari lasaniyan a ni ma a kantalá la.

Alatala la Isirayila kaanu lakisi koe

² Alatala la lahiri seedeɲɔgɔya kankira mɛta le Kiriyati-Yeyarimu han san mugan. Wo kɔma, Isirayila bɛ tota suunu dire tɔ han anu diri kulɛ keta Alatala ma.

³ Samiyɛli nata a fɔ Isirayila kaanu bɛ ye: «Ka wo be wo fan nasaagiren Alatala ma wo hanige beeyareŋɛ le la, wo ni Asitoroti kuye anun kuye tɔɛ bɛ bɔɔ wo tɛma, wo ni wo ɲamatelen Alatala dɔrɔn pɛti le ma, wo ni a dɔrɔn de batu. Wo wagate, a si wo lakisi Filisiti kaanu ma.»

⁴ Wo butɔ, bani Isirayila kaanu ka wo Baali kuye nun Asitoroti kuye bɛ bɔɔ anu tɛma, anu ka Alatala dɔrɔn batu.

⁵ Samiyɛli ka a fɔ: «Wo ni Isirayila kaa bɛ madɛn Misipa saa tɔ, n ni naa Alatala mataran wo ye.»

⁶ Anu madɛnta Misipa, anu ka je sori, anu ka a bɔn duge tɔ Alatala ɲakɔtɔ. Anu sunta wo lun. Anu ka a fɔ ɲɔ, anu ko: «Mɔ bata junubu koe ma Alatala la.» Anu be Misipa saa tɔ ɲɔ le, Samiyɛli ka Isirayila kuntigiya wale ma.

⁷ Filisiti kaanu ka a mɔɛ aa Isirayila kaanu bata madɛn Misipa. Wo butɔ, Filisiti kaanu nun anu la kuntigenu tagata Isirayila kaanu kɛlɛdula. Isirayila kaanu ka wo koe mɔɛ, anu kilanta Filisiti kaanu la.

⁸ Anu ko Samiyɛli ma: «I kana i mɔdɛ! I kulɛ labɔɔ Alatala ma mɔ ye, mɔ la Ala, alako a ni mɔ bɔɔ Filisiti kaanu bolo.»

⁹ Wo butɔ, Samiyɛli ka saaka den dɔndɔ jigan, a ka a bɛ bintan Alatala ye sarika la. A ka a kulɛ labɔɔ Alatala ma Isirayila la ko la, Alatala ka a la tarile jigan.

¹⁰ Samiyɛli be sarika bɔɛ tɔ wagate min tɔ, wo ka a taran Filisiti kaanu be anu madonna anu ni na bani Isirayila kaanu kɛlɛ. Alatala ka balamantaŋɛ kulɛ belebele labɔɔ wo wagate le Filisiti kaanu digii ma, a ka anu ɲatadon han bani Isirayila kaanu ka nɔ sɔtɔ anu ma.

¹¹ Isirayila kaanu gale bɔɔta Misipa, anu ka Filisiti kaanu jokki, anu ka anu siyama faga, anu ka anu bee han anu keta Beti-Kari saa kɔma.

¹² Awa, Samiyɛli ka kure jigan a ka a sa Misipa saa nun Siyeni saa tɛma. A ka a fɔ: «Alatala ka mɔ dɛman de han yan.» Wolo mu, a ka ɲɔ tɔgɛ sa: «Ebɛn-Eseri».

¹³ Filisiti kaanu maluta ɲɔgɔnna le, anu ma tasaagi nala Isirayila duge tɔ bitugun. Alatala ka a la nɔɛ digin Filisiti kaanu ma Samiyɛli la simaya bɛ butɔ.

¹⁴ Filisiti kaanu ka saa minnu bosi Isirayila kaanu bolo nun, wo saanu tasaagita Isirayila ma. Bɔɔla Ekirɔn han Gati, anun wo saanu be duge minnu yamɔrila, Isirayila ka wonu bɛ tamasɔtɔ le. Bani Isirayila kaanu ka anu la duge tamasɔtɔ Filisiti kaanu bolo ɲɔgɔnna le. Bɛnɲɔgɔya tota Isirayila kaanu nun Amɔri kaanu tugun tɛma.

Samiyɛli la kuntigiya Isirayila kunma

¹⁵ Samiyɛli ka Isirayila kuntigiya wale ma a la simaya tɔɛ butɔ.

¹⁶ San yo san, a be bɔɔla le a bata, a ni taga a matagamandula Betɛli, Giligali, anun Misipa, a ni kiite sa san yo san wo Isirayila saanu bɛ tɔ.

¹⁷ Wo kɔma, a ni na saagi a bata Rama saa tɔ, ɲɔ tugun a be kɛnɛ kiite sala Isirayila kaanu tɛma. A mɛn be sarika bintandula do ɲiɲaren ɲɔ Alatala ye.