1 Samiyɛli 6 - Ala la kitabuenu Mɔgɔfin kuma tɔ

Alatala la seedeɲɔgɔya kankira lasaagi koe Isirayila duge tɔ

¹ Alatala la lahiri seedeɲɔgɔya kankira ka kari wɔrɔwila le ma Filisiti kaanu la duge tɔ.

² Wo tanbi kɔma, Filisiti kaanu ka anu la kuye la sarika lakelanu anun anu la fɛrili malanu madɛn, anu ka a fɔ anu ye: «Mɔ bɛnta fen de mala Alatala la kankira la? A bɛnta ka a lasaagi a bɔɔ dula kɔtɔma tɔ ki min na, wo ni a fɔ mɔ ye.»

³ Wonu ka anu jaabi, anu ko: «Ka wo be diren bani Isirayila kaanu la Ala la kankira lasaagila a baa tɔ, a bele lasaagila ɲɔgɔnna le tun. Fɔ wo ni a masɔ yɛtɛ lasaagi sarika la. Wo tini wo ma, wo si kendeya le wo la bandenu ma, wo mɛn si a lɔn de fen min be a maren, Isirayila la Ala bele a la nɔɛ digin koe danna wo ma.»

⁴ Filisiti kaanu ka ɲininkare ma, anu ko: «Awa, mɔ be a masɔla yɛtɛ lasaagi sarika miniman de la?» Anu ka anu jaabi, anu ko: «Fondo loolu sanunɛŋɛ yiti bandiya misale la, anun tula loolu misale la, wonu tugun sanunɛŋɛ, Filisiti kuntigenu kɔnte ma, bayi jihade min be sigiren wo ma, wo dɔndɛ le be sigiren wo nun wo la kuntigenu bɛ ma.

⁵ Wo butɔ, wo ni wo la yiti bandiyanu nun tulanu minnu be wo tiɲala duge butɔ misale ɲiɲa. Wo ni biliya dii Isirayila la Ala ma. Tumado a la dumɛ donden si lasɔ wo ye, wo la kuyenu nun wo la duge ye.

⁶ Wo kana wo hakkile bɛlɛya iko Misira kaanu anun anu la mansa. Ala yɛtɛ yati to be anu ɲagankatala nun, kaa anu ma Isirayila kaanu boloka le anu ni taga?

⁷ Kɔtɛ, wo ni sarɛti nama le ɲiɲa, wo ni ningi konbira fila jigan, lɔgɔ fɔlɛ ma sa minnu kaŋɛ la betunna, wo ni anu kiti sarɛti la, wo ni anu la deŋɛnu lasaagi wɔɔrɛ tɔ.

⁸ Wo ni Alatala la kankira jigan, wo ni a sigi wo sarɛti kunma. Wo be wo sanu miraŋɛnu minnu bɔɔla yɛtɛ lasaagi sarika la, wo ni anu sa kankira lanma do butɔ, wo ni a sigi Alatala la kankira kɛnna. Wo tanbi kɔma, wo ni a to anu ni taga.

⁹ Wo ni ningenu fɛlɛ a ɲinma la: ka anu ka anu kun sɔ Isirayila duge le la Beti-Sɛmɛsi mafanna, wo si a lɔn de aa Alatala le be kɛ gbaloe bɛ lajigiren wo mɔ ma. Kɔnɔ ka wo ma ma, wo mɔ si a lɔn de koe min be maren a bele fatanden Alatala le la, a be tabɛnden de a ma tun.»

¹⁰ Filisiti kaanu ka wolo ma. Anu ka ningi konbira fila jigan, anu ka anu kiti sarɛti la, anu ka wo ningenu la deŋɛnu kiti wɔɔrɛ tɔ.

¹¹ Anu ka Alatala la seedeɲɔgɔya kankira jigan, anu ka a sigi sarɛti butɔ. Anu mɛn ka kankira lanma do sigi wo kɛnna, tula sanunɛŋɛnu be saren min butɔ, anun anu la yiti bandiya misale ɲiɲareŋɛ sanuɛ la.

¹² Wo ningi konbiranu sɔta kila telendeŋɛ kɔma Beti-Sɛmɛsi mafanna. Anu ka wo kila dɔndɛ jokki. Anu taga wagate anu be anu kulɛ labɔɔla, anu ma taga bolo mara, anu ma taga bolo ɲinma. Filisiti kaa kuntigenu sɔta anu kɔma han Beti-Sɛmɛsi naaniŋɛ tɔ.

¹³ Wo ka a taran, Beti-Sɛmɛsi kaanu be dɔmɔ ɲatabɔɛ tɔ gulunba butɔ. Anu ka anu kun nawuli, anu ka Alatala la seedeɲɔgɔya kankira yen, anu sɛɛwata wo yen koe la.

^14-15 Beti-Sɛmɛsi kaa do be ɲɔ, a tɔgɔ Yosuwe. Ningenu ka sarɛti nati han wo la sɛnɛ tɔ, anu sɔta ɲɔ, kuru belebele do kɛnna. Lewi bɔnsɛ mɔgɔ donu nata, anu ka Alatala la seedeɲɔgɔya kankira lajigi, anun wo kankira lanma min be sigiren a kɛnna, sanu miraŋɛnu be min butɔ, anu ka wonu bɛ sigi wo kuru belebele kunma. Jama ka sarɛti fara ka a ma sarika bintan lɔgɛ la, anu ka wo ningenu kannatɛgɛ, ka anu bintan sarika la Alatala ye. Wo lun Beti-Sɛmɛsi kaanu ka sarika bintannɛŋɛ anun sarika donu tugun bɔɔ Alatala ye.

¹⁶ Filisiti kuntigi loole minnu be wo ningenu jokkiren nun, wonu to ka wo koe yen, anu saagita anu bata saa tɔ Ekirɔn wo lun dɔndɛ le yati.

¹⁷ Filisiti kaanu ka anu la yiti bandiya misale minnu ɲiɲa sanuɛ la, anu ni a dii Alatala ma anu la yɛtɛ lasaagi sarika la, saa yo saa dɔndɔ: Asidɔdi saa tɛŋɛ dɔndɔ, Gasa saa dɔndɔ, Asikalon saa dɔndɔ, Gati saa dɔndɔ, Ekirɔn saa dɔndɔ.

¹⁸ Anu be wo tula sanunɛŋɛ minnu diila, wonu kɔnte be tabɛnden wo Filisiti kuntigi loolu la saanu le ma, anu la saa makantareŋɛnu anun anu la daakanu bɛ. Anu la duge be tagaren de han a be keren wo kuru banba dula, Yosuwe Beti-Sɛmɛsi kaa la sɛnɛ tɔ. Han bi wo kure mɛn be ɲɔ, anu ka Alatala la seedeɲɔgɔya kankira sigi ka min na.

Alatala ka jihade min sigi Beti-Sɛmɛsi kaanu ma

¹⁹ Alatala ka Beti-Sɛmɛsi kaanu donu faga, anu to ka Alatala la seedeɲɔgɔya kankira butɔ fɛlɛ. A ka mɔgɔ bi wɔrɔwila faga mɔgɔ wulu bi loolu tɛma. Saa bɛ suunuta, Alatala to ka anu jihadi wo la.

²⁰ Beti-Sɛmɛsi kaanu ka a fɔ: «Ɲɔmɔ si nɔ sɔla Alatala ɲatɔ, kɛ Ala saniyandeŋɛ? Wo mɔ si kɛ kankira doni mina le a ni yanfaya wo mɔ la?»

²¹ Anu ka kiilanu lasanba Kiriyati-Yeyarimu kaanu ma, anu ni taga a fɔ wonu ye: «Filisiti kaanu bata Alatala la seedeɲɔgɔya kankira nati, wo jigi wo ni na a jigan, wo ni a doni wo bata.»