1 Samiyɛli 5 - Ala la kitabuenu Mɔgɔfin kuma tɔ

Alatala la Filisiti kaanu ɲagankata koe a la kankira la ko la

¹ Filisiti kaanu ka Ala la lahiri seedeɲɔgɔya kankira jigan Ebɛn-Eseri, anu ka a doni anu bata saa tɔ ka min tɔgɔ Asidɔdi.

² Anu ka Ala la lahiri seedeɲɔgɔya kankira jigan, anu ka a doni anu la kuye banba min tɔgɔ Dagɔn la boŋɛ tɔ, anu ka a sigi wo kuye kɛnna.

³ Wo tabantaka, Asidɔdi kaanu wulita saguma piri, anu ka a taran Dagɔn be boeren a ɲakɔtɔ ma, Alatala la lahiri seedeɲɔgɔya kankira kɛnna. Anu mɛn saagita a jiganna, anu ka a sigi a sigi dula tɔ.

⁴ Wo tabantaka tugun, anu wulita saguma piri, anu ka Dagɔn taran a be boeren duge tɔ Alatala la lahiri seedeɲɔgɔya kankira ɲatɔ. A bali wunde tun de be toren ɲɔ. Kɔnɔ a kuŋɛ nun a bolo filanu bɛ be pagatiren a bale wunde ma, anu be saren Dagɔn na boŋɛ bonda bɔrɔngale tɔ.

⁵ Wolo be a maren han kɔtɛ Dagɔn kuye la sarika lakelanu anun minnu bɛ be donna Dagɔn batu dula Asidɔdi, anu te anu kɛŋɛ sɔ bonda bɔrɔngale tɔ.

⁶ Alatala ka a la nɔɛ digin Asidɔdi kaanu ma, a ka kasara siyama ma anu tɛma. A ka yiti bandiya latugu Asidɔdi saa la, anun a be duge min bɛ yamɔrila.

⁷ Anu to ka wo koe yen, anu ka a fɔ: «Isirayila la Ala la kankira te nɔ tola wo mɔ bata bitugun, bayi a la nɔɛ bata bɛlɛya mɔ nun mɔ la kuye Dagɔn kunma.»

⁸ Anu ka Filisiti kuntigenu bɛ madɛn, anu ka a fɔ anu ye: «Wo mɔ be fen de mala Isirayila la Ala la kɛ kankira la?» Anu nata a fɔ anu ko anu ni a latanbi Gati saa tɔ. Wo butɔ, anu ka Isirayila la Ala la kankira latanbi Gati.

⁹ Kɔnɔ wo kankira latanbi kɔma Gati saa tɔ, Alatala ka a la nɔɛ digin anu ma. Wo mata anu ye kilaŋɛ banba la. Kabɔɔ dendeŋɛnu ma, han ka ke kayibanu ma, yiti bandiya tuguta anu bɛ la.

¹⁰ Wo butɔ, anu ka kankira doni Ekirɔn saa tɔ. A to donta Ekirɔn saa tɔ, ɲɔ kaanu belebeleta, anu ka a fɔ: «Anu bata Isirayila kaanu la Ala la kankira layirindi mɔ bata, alako a ni mɔ nun mɔ la jama bɛ faga.»

¹¹ Anu nata Filisiti kaanu la kuntigenu makele, anu ka anu bɛ madɛn. Anu ka a fɔ anu ye: «Wo mɛn ká saagi Isirayila kaanu la Ala la kankira fɛ, wo ni taga a sigi a be ka min na nun. A kana mɔ nun jama tɔɛ bɛ faga.» Wo wagate, saa bɛ bata kɔntɔfili, kilaŋɛ banba be anu ma anu faga koe la. Alatala la nɔɛ be diginden anu ma koola.

¹² Ka minnu kisita faga ma, yiti bandiya ni wonu bita. Ɲɔ kaanu ka anu kulɛ mayɛlɛ dɛmare koe la han a keta saŋɛ tɔ.