1 Samiyɛli 4 - Ala la kitabuenu Mɔgɔfin kuma tɔ

¹ Wo butɔ, Alatala be min fɔla Samiyɛli ye, a be wo lakela nun Isirayila kaanu bɛ ma. Isirayila kaanu tagata Filisiti kaanu kɛlɛdula. Anu tagata anu la daaka sɔ Ebɛn-Eseri saa tɔ, Filisiti kaanu tugun tagata anu la daaka sɔ Afɛki saa tɔ.

Seedeɲɔgɔya kankira jigan koe

² Filisiti kaanu ka anu tabɛn kɛlɛ ma koe la Isirayila ɲatɔ, kɛlɛ fɔlɔta. Anu ka Isirayila kaanu botege wo kɛlɛ butɔ, fayida anu ka mɔgɔ wulu naani le faga.

³ Jama saagita daaka tɔ. Anu be ɲɔ le, Isirayila kayibanu ka a fɔ, anu ko: «Alatala ka a to fenna bi Filisiti kaanu ka wo mɔ botege? Awa, wo mɔ taga Silo, wo mɔ ni lahiri seedeɲɔgɔya kankira jigan, a ni naa to wo mɔ tɛma, a ni naa wo mɔ lakisi wo mɔ jaguenu ma.»

⁴ Anu ka mɔgɛnu kii Silo, anu tagata Alatala dunuya bɛ da Mansa la lahiri seedeɲɔgɔya kankira nati, min be sigiren maleka fila misalireŋɛ tɛma. Wo kankira be taakuren nun Hofuni nun Finehasi le la, Eli la deŋɛnu. Wo butɔ, kiilanu nata wagate min tɔ ka Ala la kankira jigan, Hofuni nun Finehasi ka a jokki.

⁵ Alatala la lahiri seedeɲɔgɔya kankira to donta daaka tɔ, Isirayila kaanu ka sɔnkɔ belebele layɛlɛ, fɔ duge sɛrɛnta.

⁶ Filisiti kaanu to ka wo mɔɛ, anu ka a fɔ: «Bɔ, fen sɔnkɔ belebele kan be yɛlɛla ká Heburenu la daaka tɔ?» Anu nata lɔn sɔtɔ a ma ka a fɔla Alatala la seedeɲɔgɔya kankira le be naren Isirayila kaanu la daaka tɔ.

⁷ Filisiti kaanu kilanta, anu tota a fɔla, anu ko: «Ala bata na anu la daaka tɔ! Ee, wo mɔ la ko bata tiɲa, bayi kɛ koe mɔɔle fɔlɔ ma ma nun.

⁸ Ee, wo mɔ la ko tiɲata go! Ɲɔmɔ le si mɔ bɔɔ kɛ Ala sɛnbɛma bolo? Ale wo Ala le ka jihade mɔɔle bɛ sigi Misira kaanu ma janfue tɔ.

⁹ Wo mɔ ni limaniya, ka kayiya ma, ka wo ma wo mɔle tugun si naa ma le anu la joŋɛnu la, iko anu be maren wo mɔ la joŋɛnu la ki min na. Wo mɔ ni kayiya ma, wo mɔ ni kɛlɛ ma.»

¹⁰ Filisiti kaanu ka kɛlɛ fɔlɔ mala. Anu ka Isirayila kaanu botege. Wonu bɛ ka anu bori, anu tagata anu bata. Wo mata kasara belebele la: Isirayila kaa sɔɔre mɔgɔ wulu bi saba le fagata wo kɛlɛ tɔ.

¹¹ Filisiti kaanu ka Ala la lahiri seedeɲɔgɔya kankira jigan, anu mɛn ka Eli la den kayiren fila tugun faga, Hofuni nun Finehasi.

Eli nun a bitan muse la faga

¹² Kaye do borita kɛlɛ tɔ, Bunyamin bɔnsɛ le mu nun, a ka a kun sɔ Silo la wo lun dɔndɛ tɔ. A be a la kutanu mafararen a ma, a mɛn be buguta madonden a kuŋɛ ma a yita koe la a be suunuren.

¹³ Ale kaye don wagate Silo, wo ka a taran Eli be majigiren a la tintiŋɛ tɔ kila da la, a be kɛlɛ la ko kibarue kɔnɔnden, bayi a juse bele saren feu Ala la seedeɲɔgɔya kankira la ko la. Kɛ kaye la dondeŋɛ saa butɔ, a ka saa mɔgɛ bɛ lalɔn kɛ kibarue la. Saa mɔgɛ bɛ belebeleta.

¹⁴ Eli to ka wo belebele kulɛ mɔɛ, a ka a fɔ: «Belebele kulɛ miniman de be bɔɔla ká saa butɔ?» Wo kaye nata a dula teriya la, a ka kibarue fɔ a ye.

¹⁵ Wo ka a taran, Eli bata simaya, a san bi kɔnɔntɔ nun sagin de mu nun. A ɲanu bata bita a la, a bele fenfen yenna bitugun.

¹⁶ Kɛ kaye ka a fɔ Eli ye, a ko: «Nde le be naren bɔɔla kɛlɛ tɔ. N borita ɲɔ bi le.» Eli ka a maɲininka: «N na den, fen de be tanbiren ɲɔ?»

¹⁷ Kibaru lakelá ka a jaabi, a ko: «Isirayila kaanu borita le Filisiti kaanu la. Mɔ la mɔgɛnu siyama bata faga. I la den kayiren fila tugun fagata, Hofuni nun Finehasi. Ala la lahiri seedeɲɔgɔya kankira tugun bata jigan.»

¹⁸ Bɔɔla a ka Ala la lahiri seedeɲɔgɔya kankira la ko fɔ ɲɔ, Eli be sigiren a la tintiŋɛ tɔ ka min na bonda sɔngɔ, a boeta ɲɔ kisanna a legeren ma, a kaŋɛ katita, a fagata, bayi a bata kɔtɔya nun, a mɛn bale kolo. Wo ka a taran a bata kuntigiya doni Isirayila kaanu kunma nun san bi naani.

¹⁹ Wo wagate, Eli la den Finehasi la muse be bue fɛ lɔgɔ yo bele a la den sɔtɔ koe ma nun. A to ka a mɔɛ aa Ala la lahiri seedeɲɔgɔya kankira bata jigan, aa a bitan kaye nun a la kaye tugun bata faga, a butinta a boe ma dumɛŋɛ la, a ka deŋɛ sɔtɔ kisanna.

²⁰ A to be faga da tɔ nun, musenu minnu be a kɛnna, wonu ka a fɔ a ye, anu ko: «I kana kilan, i be den kayireŋɛ le sɔtɔren!» Kɔnɔ a haju yo ma to wo kuma ma, a mɛn ma anu jaabi.

²¹ Ala la lahiri seedeɲɔgɔya kankira to bata jigan, ka a doni jamanɛ gbɛtɛ tɔ, a bitan kaye nun a la kaye tugun fagata, wolo mu a ka bɔɔbɛ tɔgɔ sa Ikabodi, a ko: «Ee, nɔɔra bata ban Isirayila jamanɛ tɔ feu!»

²² A ka a fɔ wolo la, aa nɔɔra bata ban Isirayila, bayi anu bata Ala la lahiri seedeɲɔgɔya kankira jigan.