1 Samiyɛli 31 - Ala la kitabuenu Mɔgɔfin kuma tɔ

Sayulu nun Yonatan la faga

¹ Filisiti kaanu ka Isirayila kɛlɛ. Isirayila mɔgɛnu borita Filisiti kaanu la, anu siyama fagata Giliboya kɔnkɛ kunma.

² Filisiti kaanu ka Sayulu nun a la den kayireŋɛnu lakɛtɛrɛn. Anu ka Yonatan faga, anun Abinadabi, anun Malikisuwa, Sayulu la deŋɛnu.

³ Wo kɔma, Filisiti kaanu ka kɛlɛ sɛnbɛ ɲamatelen Sayulu ma. Ndaka fililanu ka Sayulu yen. Sayulu sɛrɛnta koola kilaŋɛ la.

⁴ Wo butɔ, a ka a fɔ a la kɛlɛ mafeŋɛnu mayadɛlá ye, a ko: «I la faŋɛ futin a laa tɔ, i ni n sɔgɔ, alako kɛ bilakorenu kana na anu ni n ɲagankata ka n faga mamayoe tɔ.» Kɔnɔ a la kɛlɛ mafeŋɛnu mayadɛlá ma sɔn, a kilanta a mala. Sayulu ka faŋɛ jigan, a ka a lasɔ, a ka a yɛtɛ laboe faŋɛ suŋɛ ma sɛnbɛ la.

⁵ A la kɛlɛ mafɛŋɛ mayadɛlá to bata a yen Sayulu bata faga, ale tugun ka a yɛtɛ laboe a la faŋɛ suŋɛ ma, ale tugun fagata.

⁶ Sayulu fagata ɲɔgɔnna le, ale nun a la den kayiren sabanu anun a la kɛlɛ mafeŋɛ mayadɛlá, anun a kɛnnasɔlanu bɛ wo lun dɔndɛ.

⁷ Isirayila mɔgɛ minnu be nun fole kɔkɔma, anun Yurudɛn kɔɛɛ kɔkɔma, wonu naata lɔn sɔtɔ a ma, ka a fɔla Isirayila sɔɔrenu be borila, aa Sayulu nun a la den kayireŋɛnu tugun bata faga. Wo butɔ, anu ka anu la saanu aɲɛ, anu borita. Filisiti kaanu tagata sigi wo saanu tɔ.

⁸ Wo tabantaka, Filisiti kaanu tagata mɔgɔ fagareŋɛnu la fondonu jigandula, anu nata Sayulu nun a la den kayiren saba furenu yen, minnu boeta nun Giliboya kɔnkɛ tɔ.

⁹ Anu ka Sayulu kuŋɛ kuntu, anu ka a la kɛlɛ mafeŋɛnu tugun jigan. Anu ka kiilanu kii Filisiti duge bɛ tɔ, anu ni kɛ kibare fɔ jama bɛ ye, anu mɛn ni a fɔ anu la kuyenu batu boŋɛnu tɔ.

¹⁰ Anu ka Sayulu la kɛlɛ mafeŋɛnu ladon anu la kuye Asitoroti la boŋɛ butɔ, anu ka a fure yongi Beti-San saa tatta birike la.

¹¹ Yabesi, min be Galadi duge tɔ, ɲɔ saa mɔgɛnu to ka a mɔɛ ka a fɔla Filisiti kaanu be koe min maren Sayulu la,

¹² kayi karindeŋɛnu bɛ wulita, anu tagamanta le su muru, anu tagata Sayulu fure jigan Beti-San tatta birike ma, anun a la den kayiren saba furenu. Anu nata Yabesi, anu ka anu bintan.

¹³ Anu ka anu kolenu jigan, anu ka wonu mandi tamarisi lɔgɛ do kɔtɔ Yabesi. Anu naata sun han tele wɔrɔwila.