1 Samiyɛli 3 - Ala la kitabuenu Mɔgɔfin kuma tɔ

Alatala la Samiyɛli kele koe

¹ Wo wagate, Samiyɛli kamarendeŋɛ be Alatala la wale mala Eli bolo. Alatala la kuma koe mɔgɛ la, a ma siya nun. Ko yendeŋɛnu iko kiboe wonu tugun ma siya.

² Lun do, Eli be saren a la dula kɔtɛ tɔ. Wo ka a taran, a ɲanu sɛnbɛ bata dɔgɔya, fayida a bata di mala ɲabɔnɛ la.

³ Ala la lanpue bele dufenden nun betunna, Samiyɛli kan be saren Alatala be batula dula min tɔ, lahiri seedeɲɔgɔya kankira be ka min na nun.

⁴ Awa, Alatala ka Samiyɛli kele. A ka a labita, a ko: «Naamu, n be yan.»

⁵ A tagata borila Eli dula, a ka a fɔ: «I to ka n kele, n bata na.» Eli ka a jaabi, a ko: «Ade, n ma i kele, taga i ni sa.» A tagata sa.

⁶ Alatala mɛn ka Samiyɛli kele. A wulita, a tagata Eli dula, a ka a fɔ a ye: «Ile le ka n kele, n bata na.» Eli ka a jaabi, a ko: «N na den, n ma i kele. Saagi, i ni sa.»

⁷ Samiyɛli bele a lɔnden betunna, ka a fɔla Alatala le be a kelela. A fɔlɔ ma Alatala kulɛ mɔɛ nun.

⁸ Alatala mɛn ka Samiyɛli kele a kunɲama sabaɲɔgɛ la. A wulita, a tagata Eli dula, a ka a fɔ a ye, a ko: «Ile le ka n kele, n bata na.» Eli nata lɔn sɔtɔ a ma, ka a fɔla Alatala le be deŋɛ kelela.

⁹ Eli ka a fɔ Samiyɛli ye, a ko: «Saagi, i ni sa. Awa ka i ka keleri kulɛ mɔɛ bitugun, i be a fɔla le, i ko: ‹Alatala, i la jondeŋɛ be a tolomasɔren i la, i ni kuma.›» Samiyɛli tagata sa a darita sala ka min na nun.

¹⁰ Alatala nata a dula iko wo fɔlɛ doe, a ka a kele, a ko: «Samiyɛli, Samiyɛli.» Samiyɛli ka a labita, a ko: «I la jondeŋɛ be a tolomasɔren i la, i ni kuma.»

¹¹ Alatala ka a fɔ Samiyɛli ye, a ko: «N be nala ko do le mala Isirayila, min bɛ tolo fila tini wo koe mɔɛ, a si ma wo tiginu ye tɛrɛnna la.

¹² Wo lun, n be min bɛ fɔren Eli la denbaya la ko tɔ, n si a lakamali le. Ka n ka a fɔlɔ, fɔ n ni a laban feu.

¹³ N ka a fɔ le a ye, n ko, nde le yati be nala a la denbayanu makiitila anu la junubenu la ko la kudai, bayi a ka a lɔn a la den kayireŋɛnu be n fɛɛyala, kɔnɔ a ma anu latɔn.

¹⁴ Wolo mu n bata n kali Eli la fɔgɛ la ko la: fenfen te Eli la denbaya la junube kafari. Sarika te a bɔɔ, hadiya tugun te a bɔɔ muku.»

¹⁵ Samiyɛli sata han saguma, a nata Alatala batu dula bondanu laka. Alatala ka min yita Samiyɛli la, a be kilanden wo koe ɲamakaranna Eli ye.

¹⁶ Kɔnɔ Eli ka a kele, a ko: «Samiyɛli, n na den!» A ka a labita, a ko: «Naamu!»

¹⁷ Eli ka a fɔ a ye, a ko: «Alatala be kuma miniman yitaren i la? I kana fenfen dogon n na. A be min bɛ fɔren i ye, ka i tagata wo hali dɔndɔ dogon n na, Ala ni i bita a bɛlɛma la.»

¹⁸ Wo butɔ, Samiyɛli ka Ala la kuma bɛ latanbi Eli ma, a ma fenfen to. Wo tanbi kɔma, Eli ka a fɔ, a ko: «Alatala le mu, a be diren min ye, wo ni ma.»

¹⁹ Samiyɛli tota koloyala, Alatala tugun be a fɛ nun. A ka kuma min bɛ fɔ Samiyɛli ye, wo hali dɔndɔ bele a ma min nakamali.

²⁰ Isirayila bɛ, kabɔɔ Dan han Bɛri-Seba, bɛ ka a lɔn de, ka a fɔla Alatala bata Samiyɛli ma a la nabiyonmɛ la.

²¹ Wo wagate, Alatala si to le a yɛtɛ labɔɔla Silo, bayi a tota a yɛtɛ yitala Samiyɛli la ɲɔ le a la kuma tɔ.