1 Samiyɛli 29 - Ala la kitabuenu Mɔgɔfin kuma tɔ

Filisiti sɔɔri kuŋɛnu la Dauda lasaage

¹ Filisiti kaanu ka anu la sɔɔrenu bɛ madɛn Afɛki. Isirayila sɔɔrenu kan be daakaren kɔɔ kuŋɛ le tɔ min be Jisirewɛli.

² Filisiti kuntigenu be tagamanna, anun anu la sɔɔrenu la mɔgɔ kɛmɛ kɛmɛ kɛɲa ma, anun anu mɔgɔ wulu dɔndɔ dɔndɔ kɛɲa ma. Dauda kan nun a la sɔɔrenu be tagamanna anu bɛ kɔma, anu nun mansa Akisi.

³ Filisiti kaanu la sɔɔri kuŋɛnu ka Akisi maɲininka: «Bɔ, kɛ Heburenu kan be fen ɲinila yan?» Akisi ka wo sɔɔri kuŋɛnu jaabi, a ko: «Bɔ, Dauda ma kɛ la ba, min be maren Sayulu la walilá la nun, Isirayila la mansa? A bɔɔta Sayulu kɔma a nata to n kɔma, wo bata kari siyama bɔɔ. Bɔɔla a donta n bata han bi, n ma fenfen koron yen a la.»

⁴ Filisiti sɔɔri kuŋɛnu dumɛnta Akisi ma, anu ka a fɔ a ye: «Kɛ kaye nun a la sɔɔrenu jigan yan, a ni saagi i be ka min donden a bolo, a kana mɔ jokki kɛlɛ tɔ. A kana nala a ɲamatelenna mɔ ma kɛlɛ tɔ. Bɔ kɛ kaye si nɔ fen de ɲan mala min si a marige Sayulu hɛnɛ? Fɔ a ni mɔ la mɔgɛ donu kuŋɛ le doni a fɛ.

⁵ Ká, musenu bele kɛ Dauda le matɔgɔla nun anu to be dɔŋɛ dɔnna? Anu be a fɔla, aa Sayulu ka mɔgɔ wulu wulu le botege, kɔnɔ aa Dauda kan ka mɔgɔ wulu tan tan le botege.»

⁶ Akisi ka Dauda kele, a ka a fɔ a ye, a ko: «N bata n kali Alatala la: i telenta. Min di n ɲɛ nun, ile nun n na sɔɔrenu ni taga kɛlɛ tɔ, wo mɛn bɛ ni saagi ɲɔgɔn na sɔɔrenu la daaka tɔ, bayi n bele ko koron yo yenden i la bɔɔla i nata n bata han bi. Kɔnɔ, i ma di kuntigenu kan ye.

⁷ Awa, saagi jususa butɔ, i kana nala ko do mala yan kɔtɛ min ma di Filisiti kuntigenu ye.»

⁸ Dauda ka a fɔ Akisi ye, a ko: «Bɔ, n be fen de maren? I be fen de yenden nde i la walilá la min bele diyaren i ye bɔɔla n nata i bata han bi min be a mala nde te taga mansa jaguenu kɛlɛdula?»

⁹ Akisi ka Dauda jaabi, a ko: «N ka a lɔn, bayi i di n ɲɛ iko Ala la maleka. Kɔnɔ Filisiti sɔɔri kuŋɛnu ko aa i te mɔ jokki kɛlɛ tɔ.

¹⁰ Wo butɔ, i ni wuli sinan saguma jonna, ile nun i marige la sɔɔrenu minnu nata i fɛ yan. Banta tini fɔlɔ makɛnɛla tun, wo ni bɔɔ yan.»

¹¹ Dauda nun a la sɔɔrenu bɔɔta saguma jonna, anu saagita Filisiti duge tɔ. Filisiti sɔɔrenu kan yɛlɛta Jisirewɛli.