1 Samiyɛli 28 - Ala la kitabuenu Mɔgɔfin kuma tɔ

Filisiti kaanu la anu tabɛn koe tagala Isirayila kɛlɛdula

¹ Wo wagate, Filisiti kaanu bata anu la sɔɔrenu bɛ madɛn, taga koe la Isirayila kaanu kɛlɛdula. Akisi ka a fɔ Dauda ye, a ko: «Kɔnɔ i ni a lɔn, ka a fɔla ile nun i la jama be tola n mafanna le tagala kɛlɛ tɔ.»

² Dauda ka Akisi jaabi, a ko: «Awa, i la walilá be min mala, i si a yen!» Akisi ka a fɔ Dauda ye: «Wo butɔ, n si i sɔ le i ni ma n kantalá la kudai.»

Sayulu nun musu ɲana lakumalá min be Endori

³ Samiyɛli dun bata faga nun, Isirayila kaanu bɛ ka a la faga koe suunɛ ma, anu ka a baadɛ Rama, a la saa tɔ. Kɔnɔ, Sayulu dun bata ɲana lakuma koe nun fɛrili ma koe bɛ ladan Isirayila duge bɛ tɔ.

⁴ Filisiti kaanu bata na madɛn, anu ka daaka sɔ Sunemi saa mafanna. Sayulu nun Isirayila kɛlɛ malanu bɛ tugun nata daaka Giliboya mafanna.

⁵ Sayulu to ka Filisiti jama la siya yen, a juse bɔɔta koola, a kilanta koola, a tota sɛrɛnna.

⁶ Sayulu ka Alatala maɲininka, kɔnɔ Alatala ma a jaabi kiboe tɔ, a ma a jaabi a sago lɔn feŋɛ la min tɔgɔ Urimu, ka wo ma nabiyonmɛ do kulɛ la.

⁷ Sayulu ka a la walilanu kii, a ko: «Wo taga muse do ɲini, min si ɲana lakuma, n ni taga a maɲininka.» A la walilanu ka a fɔ a ye, anu ko: «Muse do be Endori min kusan ɲana lakumala.»

⁸ Sayulu to ka wo mɔɛ, a ka a masara alako mɔgɛnu kana a talɔn, a tagata a nun mɔgɔ fila. Anu donta wo muse bata sue tɔ. Sayulu ka a fɔ a ye, a ko: «Fɛrile ma n ɲɛ, i ni ɲana do lawuli, i ni a maɲininka n ɲɛ. Kɔnɔ ka n ka min tɔgɛ fɔ i ye, i be wolo lawulila de.»

⁹ Muse ka kuma jigan, a ko: «Kɔnɔ i ka a lɔn Sayulu be min maren, a ka ɲana lakumalanu bɛ sɔntɔ kɛ duge tɔ ki min na, anun fɛrili malá bɛ. Fenna nɔn i be jule yɛlɛla n ɲɛ? I be diren n fagala le ba?»

¹⁰ Sayulu ka a jaabi, a ka a kali Alatala la, a ko: «N ni a fɔ i ye Alatala ɲala: fenfen koron te i masɔtɔ kɛ koe tɔ.»

¹¹ Muse ka a maɲininka: «I be diren n ni ɲɔmɔ le lawuli?» A ka a jaabi, a ko: «Samiyɛli lawuli n ɲɛ.»

¹² Muse to ka Samiyɛli yen, a ka sɔnkɔ belebele layɛlɛ, a nata na a fɔ Sayulu ye: «I be n majuguyala fenna? Ile le yati mu Sayulu la!»

¹³ Mansa Sayulu ka a fɔ a ye: «Hali i ma kilan! I be fen de yenden?» Muse ka a fɔ Sayulu ye, a ko: «N ka daale do le yen, iko beele, min be yɛlɛla duge kɔtɔ.»

¹⁴ A ka a maɲininka, a ko: «A lahala be kama le?» Muse ka a jaabi, a ko: «Kikala le, burumuse be lajigiren a ma.» Sayulu ka a lɔn kisanna, ka a fɔla Samiyɛli le mu. A ka a majigi han a ka a tindɛ sɔ duge tɔ.

¹⁵ Samiyɛli ka a fɔ Sayulu ye: «I be n na suleŋɛ tiɲala n ma fenna, ka n nawuli?» Sayulu ka a jaabi, a ko: «N be kɔntɔfile banba le butɔ. Filisiti kaanu bata na n kɛlɛdula, Ala bata a matuntun n na, n bata Ala maɲininka, a bele n jaabiren nabiyonmɛnu sabu la, a bele n jaabiren kiboe tɔ. N be i keleren wolo la, alako i ni kila sa n kɛn kɔtɔ, n bɛnta min mala.»

¹⁶ Samiyɛli ka a fɔ a ye, a ko: «Ka Alatala bata a matuntun i la, a bata ma i kɛlɛɲɔgɛ la, awa i be nde maɲininkala fenna?

¹⁷ Alatala bata a ma iko a ka a fɔ i ye ki min na n na kuma sabu la. A bata mansaya fara i ma, a ka a bɔɔ i bolo, a ka a don mɔgɔ do bolo, min mu Dauda la.

¹⁸ Alatala ka min fɔ i ye, i ma i tolomasɔ wo la: a to ka a fɔ i ye i ni a la dumɛŋɛ dusu Amaleki kaanu ma, i ma a ma. Wolo be a maren Alatala be kɛ maren i la bi.

¹⁹ Adun, Alatala ɲan si ile nun Isirayila sa le Filisiti kaanu sagoe tɔ. Sinan, ile nun i la den kayireŋɛnu bɛ si to le n kɛnna yan. Alatala ɲan si Isirayila kɛlɛlanu bɛ sa le Filisiti kaanu sagoe tɔ.»

²⁰ Sayulu to ka wo mɔɛ, a boeta duge tɔ kisanna a la kayanya bɛ la. Samiyɛli la wo kumanu ka a ma a kilanta koola. Do tota bɔɔla a sɛnbɛ la, bayi a bele dɔmɔ yo dɔmɔren nun su muru tele muru.

²¹ Muse nata Sayulu kɛnna. A to ka a yen Sayulu be mafuren koola, a ka a fɔ a ye, a ko: «N diɲata n nɛɛ le ma n sɔta i la kumanu kɔma.

²² Awa, ile tugun ni i tolomasɔ i la jon muse la, a to n ni dɔmɛ do dii i ma, alako i ni nɔ sɛnbɛ sɔtɔla saagi koe la.»

²³ Kɔnɔ, Sayulu ma sɔn, a ko: «N te dɔmɔ dɔmɔ.» A la walilanu nun wo muse ka a madiya, alako a ni dɔmɛ dɔmɔ. A sɔnta, a wulita duge tɔ, a sigita benbe tɔ.

²⁴ Wo ka a taran, tuuradeŋɛ kɛndeŋɛ dɔndɔ be wo muse bolo a la fɔgɛ tɔ. A wulita kisanna, a tagata a kannatɛgɛ. A ka farin munge jigan, a ka a lamulan, a ka dɛgɛ lɛbini bɔnɛ ɲiɲa.

²⁵ A ka a dii Sayulu nun a la walilanu ma, anu ka anu daɲini, anu wulita, anu tagata wo sue tɔ kisanna.