1 Samiyɛli 26 - Ala la kitabuenu Mɔgɔfin kuma tɔ

Dauda la balaŋɛ Sayulu faga koe la mɛn tugun

¹ Sifu kaanu tagata Sayulu dula Gibeya saa tɔ, anu ka a fɔ a ye, anu ko: «I ma a lɔn Dauda be dogonden Hakila kɔnkɔrɛ tɔ, Yesimɔn tabɛŋɛ tɔ?»

² Sayulu wulita, a jigita Sifu janfue tɔ, Isirayila kɛlɛ malá ɲinmanu mɔgɔ wulu saba be a bolo. Anu tagata Dauda ɲinidula.

³ Anu ka anu la daaka sɔ kila dala Hakila kɔnkɔrɛ tɔ, Yesimɔn tabɛŋɛ tɔ. Dauda kan be sigiren nun janfue tɔ, a ka lɔn sɔtɔ a ma, Sayulu be ale le ɲinila janfue tɔ.

⁴ A ka ko lakɔrɔsilanu lasanba, wonu nata a lalɔn, aa Sayulu bata na yati.

⁵ Wo wagate le, Dauda wulita, a tagata Sayulu la daaka mafanna. A ka Sayulu hasɛ a be saren, a ka Sayulu la sɔɔri mansa Abineri tugun hasɛ, Neri la deŋɛ, a be saren ka min na. Sayulu be saren a la sɔɔrenu tɛma le anu madɛndula tɔ, jama bɛ be a lamilinden.

⁶ Dauda ka kuma jigan, a ka a fɔ Ahimelɛki ye, Hɛti kaa, anun Abisayi ye, Seruya la den kayireŋɛ, Yowaba kɔtɔ, a ko: «Nde nun ɲɔmɔ le be jigila Sayulu ma a la sɔɔrenu la daaka butɔ?» Abisayi ko: «Nde.»

⁷ Dauda nun Abisayi tagata wo sɔɔri jama tɛma sue tɔ. Wo ka a taran, Sayulu be saren a la sɔɔri jama bɛ tɛma, a be kinnɔgɔla, a la tanba be sɔrɔnden a kun sa dula. Abineri nun sɔɔri jama bɛ be saren a lamiliŋɛ tɔ.

⁸ Abisayi ka a fɔ Dauda ye, a ko: «Ala bata i jague sa i sagoe tɔ bi! A to nde ni kɛ tanba banban a ma duge tɔ kunɲa dɔndɔ, n ɲan te a ma fila la.»

⁹ Kɔnɔ Dauda ka a fɔ Abisayi ye, a ko: «I kana a faga! Ɲɔmɔ si nɔ a bole magala Alatala la kɛ mansa masubɛreŋɛ la, wo junube te naa to a tigi kunma ba?»

¹⁰ Dauda mɛn ka a fɔ: «Alatala be ɲɔ! Alatala le dɔrɔn si nɔ a fagala. A la lɔ́gɛ́ tini ke a si faga le, ka wo ma, a ni taga faga kɛlɛ do tɔ.

¹¹ N te sɔn feu n ni n bole maga Alatala la mansa masubɛreŋɛ la! Kɔtɛ, a la tanba min be sɔrɔnden a kun sa dula nun a la ji dunbe, i ni wonu tun jigan, i ni na wo mɔ ni ma.»

¹² Dauda ka Sayulu la tanba nun a la ji dunbe jigan minnu be nun a kun sa dula, anu tagata. Mɔgɔ yo ma anu yen, mɔgɔ yo ma wo koe lɔn, hali dɔndɔ ma kunɛn, bayi anu bɛ be kinnɔgɔla le nun. Wo ka a taran, Alatala bata kinnɔgɛ latanbi anu bɛ ma min sɛnbɛ kolo.

¹³ Dauda tanbita sɔngɛ doe la, a yanfayata anu la pon, a tagata sɔ kɔnkɛ kun tɛma.

¹⁴ Dauda ka a kulɛ labɔɔ sɔɔri jama nun Abineri ma, Neri la deŋɛ, a ko: «Abineri, i te a labita ba?» Abineri ka a maɲininka: «Ɲɔmɔ le mu ile la, ile min be belebelela mansa la ka?»

¹⁵ Dauda ka a fɔ Abineri ye, a ko: «Ile le ma kayi bɛlɛŋɛ la ba Isirayila min ɲɔgɔn yo bele? Bɔ fende i ma na i la mansa kanta, i marige? Isirayila jama mɔgɔ do bata na a ni na i marige, mansa faga.

¹⁶ I be min maren wo la, wo maɲin. N be a fɔla i ye Alatala le ɲala ka, wo bɛnta le wo ni faga, wo to ma wo la mansa kanta, Alatala be min masubɛren. A fɛlɛ ba, mansa la tanba nun a la ji dunbe be mina le, minnu be nun a kun sa dula?»

¹⁷ Sayulu ka Dauda kulɛ talɔn, a ka a maɲininka, a ko: «N na den Dauda, ile le kulɛ mu ka ba?» Dauda ka a jaabi, a ko: «N marige mansa, nde le mu!»

¹⁸ A mɛn ka a fɔ, a ko: «Marige be sɔren a la joŋɛ kɔma fenna a ni a faga? N be fen de maren? Sɔn koron miniman de be n na?

¹⁹ Awa n marige mansa Sayulu, i tolomasɔ i la joŋɛ kulɛ la: Ka Alatala le be i juse layɛlɛla n ma, awa, sarika ni bɔɔ a ye, min si diya a ye. Kɔnɔ ka adamadeŋɛnu le, Alatala ni anu danka, bayi anu be n beela le bi, n ni bɔɔ Alatala la duge tɔ a ka min dii a la jama ma, anu ko aa n ni taga ala gbɛtɛnu batudula.

²⁰ Kɔnɔ duge min ɲan yanfata Alatala tabɛŋɛ la, n base kana bɔn ɲɔ duge kan tɔ de! Ile min be maren Isirayila la mansa la, i bata bɔɔ n ɲinidula, nde min be maren koote pɛti la, ka wo ma wɔlɛ anu be min ɲinila kɔnkɛnu tɔ.»

²¹ Sayulu ka a fɔ, a ko: «N bata junube sɔtɔ i la. Awa, n na den Dauda, na. N te ko koron yo ma i la bitugun, bayi i ka n nɛ lakisi bi, i bata a yita le wo la n nɛ sɔdula kolo i ye. Nde kan be waliren de iko hakkilibɔnɛ, n bata tantan belebele ma.»

²² Dauda ka a jaabi, a ko: «Mansa la tanba le ka, i la kamareŋɛ do ni na a jigan.

²³ Alatala be mɔgɛ bɛ sɔŋɛ diila a la teleŋɛ nun a la lannanteya le la. Alatala bata i sa nun bi n bolenu tɔ, kɔnɔ n ma sɔn n bole magala Alatala la mansa masubɛreŋɛ la.

²⁴ Awa, n to ka a yita bi i nɛ sɔdula kolo n ɲɛ, Ala mu a mala nde tugun nɛ sɔdula ni to ale Alatala ye ɲɔgɔnna le, a ni n nakisi ɲagankata bɛ ma.»

²⁵ Sayulu ka a fɔ Dauda ye, a ko: «N na den Dauda, Ala mu barikɛ sala i la ko tɔ. I donta fenfen tɔ, i si nɔ le wo la.» Wo kɔma, Dauda tagata a la kila la, Sayulu tugun saagita a bata.