1 Samiyɛli 25 - Ala la kitabuenu Mɔgɔfin kuma tɔ

Samiyɛli la faga

¹ Samiyɛli fagata, wo butɔ Isirayila kaanu bɛ madɛnta ka a la ko dire ma ka suunu. Anu tagata a baadɛ Rama a bata saa tɔ. Wo kɔma, Dauda wulita a tagata Paran janfue tɔ.

Nabali la balaŋɛ Dauda kɔ koe la

² Kaye do be nun Mawoni, min hajue donu tugun be nun Karimɛli. Mɔgɔ banba le mu nun a la, saaka wulu saba le be a bolo nun, anun baa wulu dɔndɔ. A be naren nun a la wo saakanu le te matɛgɛdula Karimɛli.

³ Wo kaye tɔgɔ le Nabali. Kalebi bɔnsɛ le mu a la. A la muse tugun tɔgɔ Abigayili. Muse hakkilima le mu a la, a mɛn bɛnta. Kɔnɔ, a la kaye kan hakkile bɛlɛ, a mɛn koron.

⁴ Dauda ka a mɔɛ janfue tɔ aa Nabali be a la saakanu te matɛgɛla.

⁵ Wo butɔ, a ka kamareŋɛ mɔgɔ tan kii, a ko: «Wo ni taga Nabali dula Karimɛli, wo ni a kende masa, wo ni kɛ kuma lake a ma n ɲɛ, wo ko:

⁶ ‹Ala mu yaari yitala mɔ la hɛra tɔ, hɛra ni to ile ye, hɛra ni to i la denbaya ye, hɛra ni to i la koe bɛ tɔ.

⁷ Dauda ko aa a be a mɔɛren de, saaka ti matɛgɛlanu be walila i dula. Adun, mɔ nun i la kolofen kantalanu le mu nun. Anu ka wagate min bɛ ma Karimɛli, mɔ ma ko koron yo ma anu la, mɔ ma fondo bɔɔ anu bolo.

⁸ I ni i la kamareŋɛnu maɲininka, anu si a ɲamakaran i ye. Awa, Dauda be i táranna, i ni hinnɛ mɔ la, mɔle minnu be maren a la kamareŋɛnu la a be minnu lasanbaren i ma, bayi mɔ be naren i dula bi luŋɛ, min be maren sɛɛwa luŋɛ la. Yandi, i la joŋɛnu nun i la den Dauda kɔ i bolofeŋɛ do la, min yo be i bolo.›»

⁹ Dauda la kiilanu to keta ɲɔ, anu ka a la kiila fɔ Nabali ye Dauda tɔgɛ la, wo tanbi kɔma anu ka anu mɔdɛ.

¹⁰ Nabali ka kiilanu jaabi, a ko: «Ɲɔmɔ le wo Dauda la, ɲɔmɔ le wo Jese la deŋɛ la? Joŋɛ siyama be ɲɔ kɛ wagate minnu be anu tuntunna anu tige la.

¹¹ Bɔ wo be diren de ba n ni n na dɛgɛ nun n na je jigan, anun n na sube, n be sube min fagaren n na saaka ti matɛgɛlanu ye, n ni wo bɛ don mɔgɛnu bolo n ɲan ma minnu to dula yati lɔn?»

¹² Dauda la kiilanu ka kila tabita saagi koe la. Anu to donta, anu ka Nabali la kuma bɛ ɲatabɔ Dauda ye.

¹³ Dauda ka a fɔ a la mɔgɛnu ye, a ko: «Bɛ ni a la faŋɛ jigan, a ni a soti a la bɛlɛte tɔ.» Dauda tugun ka a la faŋɛ jigan, a ka a soti a la bɛlɛte tɔ. Mɔgɔ kɛmɛ naani ɲɔgɔn ka a jokki, mɔgɔ kɛmɛ fila tota kotenu kɛnna.

Abigayili la Dauda madiya koe

¹⁴ Nabali la kamareŋɛ do tagata wo koe ɲamakaran Abigayili ye, Nabali la muse, a ko: «Dauda bata kiilanu lasanba mɔ tige ma bɔɔla janfue tɔ, anu ka kuma barikɛreŋɛnu fɔ, kɔnɔ a ka anu jaabi kuma koroŋɛnu la.

¹⁵ Adun, wo mɔgɛnu ka ko ɲinma banba le ma mɔ ye. Mɔ ka wagate min bɛ ma anu kɛnna ɲagama butɔ, anu ma ko koron yo ma mɔ la, fenfen ma bɔɔ mɔ bolo.

¹⁶ Anu mata mɔ latangalá le la, sue anun tele mɔ ka wagate min bɛ ma anu kɛnna kolofen kanta dula.

¹⁷ Kɔtɛ, bɛlɛya le be a kun sɔren mɔ tige nun a la denbaya bɛ ye wo la. Wo butɔ, i ni a fɛlɛ i be min mala i ni wo ma, bayi i ka a lɔn mɔgɔ sɔnkoroŋɛ le mu a la, a te mɔgɔ yo la malase mɔɛ.»

¹⁸ Abigayili la wo mɔɛreŋɛ, a ka dɛgɛ kɛmɛ fila jigan teriya la, anun beere luulu fila, saaka loolu sube bintandeŋɛ, sugu kole yilandeŋɛ sumarifen ɲa loolu, rɛsɛn labalareŋɛ mɔndɔ kɛmɛ, anun toore labalareŋɛ mɔndɔ kɛmɛ fila. A ka wo kotenu sa sofalenu kɔɛ tɔ.

¹⁹ A nata kamareŋɛnu jigan, a ka kotenu don anu bolo, a ka a fɔ anu ye, aa anu ni sɔ ɲatɔ, ale ni naa sɔ anu kɔma. Abigayili ma fenfen fɔ a la kaye Nabali ye.

²⁰ A yɛlɛta sofale kunma, a ni taga. Wo butɔ, a be jigila kɔnkɛ sɔngɛ doe la. Dauda tugun nun a la mɔgɛnu be jigila sɔngɛ doe la. Kɔnɔ anu nun Abigayili bele ɲɔgɔn yenden, bayi kɔnkɛ be anu tɛma. Anu bɛnta tujuk.

²¹ Wo ka a taran, Dauda bata a fɔ nun a yɛtɛ ma, a ko: «Yaga, kɛ kayi la kolofeŋɛnu kunmagaga mata n ɲɛ fufafu le la. Adun, a bolofeŋɛ min bɛ be a bolo janfue tɔ, fenfen ma bɔɔ a la. A ka n na wali ɲinma sɔŋɛ dii n ma a koroŋɛ la.

²² Awa sinan saguma, ka n ka kamaren hali dɔndɔ to balue tɔ Nabali bata, Ala mu n bitala a bɛlɛma la!»

²³ Abigayili to ka Dauda yen, a jigita a la sofale kunma teriya la, a boeta duge tɔ, a ka a ɲakɔtɔ majigi duge mafanna han a ka a tindɛ sɔ duge tɔ.

²⁴ A nata boe a kɛn kɔtɔ, a ka a fɔ a ye, a ko: «N marige, tiɲare bata ma nde len kunma kote la. Yandi, nde i la jon muse ni kuma i ye, i ni i tolomasɔ i la joŋɛ la kuma la.

²⁵ I kana kɛ Nabali mɔgɔ sɔnkoroŋɛ jokki. A be toren de iko a tɔgɛ be min fɔren, bayi a tɔgɔ le Nabali, adun mɔgɔ sɔnkoroŋɛ yati le mu a la. Nde i la jon muse ma kɛ kamareŋɛnu yen, n marige i ka minnu lasanba.

²⁶ Awa, n bata n kali Alatala la, anun ile tugun na ko la, n ko Alatala le be i latangaren nii bɔɔ koe ma ka, a ni i la kise mabanban. Ala mu a mala, i jaguenu, minnu be diren ko koroŋɛ mala ile n marige la, wonu bɛ ni to iko Nabali.

²⁷ Awa, n marige, i la jon muse be sanba min natiren i ye, wo ni fatan i la kamareŋɛnu ma minnu be sɔren ile n marige kɔma.

²⁸ Yandi diɲa i la jon muse la tantaŋɛ ma! N ka a lɔn a ɲinma la, Alatala si mansaya sabatireŋɛ dii le ile n marige bɔnsɛ ma, bayi ile n marige, i be Alatala le la kɛlɛnu mala. Awa, anu kana fenfen koron lakɔrɔsi i ma.

²⁹ Hali mɔgɛ wulita a ni i bee alako a ni i faga, n marige, i nɛɛ si makanta le i Marige Alatala ɲala, a si i jague kan nɛɛ jigan de, a ni a lafili iko lanpura kure.

³⁰ Marige Alatala tini ban wo ko ɲinma bɛ mala, a be min lahire jiganden i ye, a ni i ma Isirayila latagamanná la,

³¹ ile n marige a kana to i be nimisaren wo wagate i juse tɔ, i be suunuren, i to bata base bɔn fufafu, i mɛn dita le i yɛtɛ la kise mabanbanna i yɛtɛ la. Ka Alatala banta wo ko ɲinma bɛ mala ile n marige ye, n bata i mataran, i ni i mira nde i la jon muse la ko ma.»

³² Dauda ka a fɔ Abigayili ye, a ko: «Tantue be Alatala ye, Isirayila la Ala, min be i lasanbaren bi, mɔ ni na bɛn yan.

³³ N bata Ala tantu i hakkili ɲinma la ko la, Ala mu barikɛ sala i la ko tɔ, i to be n natangaren bi nii bɔɔ koe ma, n mɛn ma n na kise mabanban n yɛtɛ la.

³⁴ N bata n kali Alatala la, Isirayila la Ala min be baluren, min ka n natanga ko koroŋɛ ma koe la i la, n ko ka i ma na nun n ɲatɔ teriya la, wo si a taran de nun yannun tele la yɛlɛ fɛ, kamaren hali dɔndɔ te to nun balue tɔ Nabali ye.»

³⁵ Abigayili ka feŋɛnu minnu nati, Dauda ka anu labita a bolo, a ka a fɔ a ye, a ko: «Taga i bata jususa butɔ. A lɔn, i ka min fɔ, n bata a mɔɛ, n bata i kulɛ bita.»

Nabali la faga

³⁶ Abigayili saagita Nabali dula, a ka a taran, a be murade saren a la boŋɛ butɔ iko mansa. A juse be diyaren a ye, a be siisiren koola. Abigayili ma nɔ fenfen fɔla a ye wo wagate, fɔ ɲɔ lakɛnɛ fɛ saguma.

³⁷ Siise to bɔɔta Nabali ɲa ma saguma, a la muse ka dantɛgɛ sa a ye. A to ka a la muse la kuma mɔɛ, ko do ka a juse masɔtɔ, a balata a la ken iko kure.

³⁸ Fayida tele tan tanbi kɔma, Alatala ka Nabali garin a fagata.

³⁹ Dauda to ka Nabali faga koe mɔɛ, a ka a fɔ: «Tantue be Alatala ye, min be n kunma kɛlɛ maren n na maluya la ko la Nabali ka min tabɛn n ma, Alatala min be nde a la jondeŋɛ lakisiren koronya ma. Alatala bata Nabali la koronya lasaagi a ma.» Dauda ka kiilanu kii anu ni taga a fɔ Abigayili ye a ni ma a la muse la.

Abigayili ma koe Dauda la muse la

⁴⁰ Kiilanu to keta Abigayili bata Karimɛli, anu ko: «Dauda le be mɔ kiiren i ma, i ni ma a la muse la.»

⁴¹ Abigayili la wo mɔɛreŋɛ, a wulita, a kimisirinta han a ka a tindɛ sɔ duge tɔ, a ko: «I la jon muse be i sagoe tɔ, n ɲan bata sɔn mala joŋɛ la n ni n tige Dauda la walilanu kɛŋɛnu lako.»

⁴² Abigayili wulita teriya la, a yɛlɛta a la sofale kunma, den musereŋɛ mɔgɔ loolu sɔta a kɔma, anu ka Dauda la kiilanu jokki. Anu keta Dauda bata, Abigayili mata a la muse la.

⁴³ Wo ka a taran, Dauda bata Ahinoyamu jigan nun, Jisirewɛli kaa. Anu fila bɛ tota a bolo.

⁴⁴ Wo wagate ka a taran nun, Sayulu la den musereŋɛ Mikali tugun be maren Dauda la muse la nun. Kɔnɔ Sayulu ka wo bɔɔ a bolo, a ka a dii Palati Galimu kaa ma, Layisi la den kayireŋɛ.