1 Samiyɛli 24 - Ala la kitabuenu Mɔgɔfin kuma tɔ

Dauda ma sɔn Sayulu fagala

¹ Dauda bɔɔta ɲɔ, a tagata Engedi, dulanu tɔ ka min masɔtɔ bɛlɛ, a tota ɲɔ.

² Sayulu to saagita bɔɔla Filisiti kaanu bee dula, anu ka a fɔ a ye, aa Dauda be Engedi janfue tɔ.

³ Sayulu ka kɛlɛ malá ɲinma mɔgɔ wulu saba jigan Isirayila bɛ tɔ, anu bɔɔta Dauda nun a la mɔgɛnu ɲinidula, han anu tagata ke dula do tɔ min tɔgɔ «Kɔnkɛ tɔ Baanu la Fata».

⁴ Sayulu tanbita ɲɔ kaanu la saaka wɔɔrɛ kɛnna, min be kila da la. Sayulu ka fanmɛ do yen ɲɔ, a donta a butɔ hataju madula ɲɔla. Wo ka a taran, Dauda nun a la mɔgɛnu be sigiren ɲɔ butɔ.

⁵ Dauda la mɔgɛnu kɔyikɔyita a ye, anu ko: «Awa, Alatala ka bi luŋɛ le la ko fɔ i ye, a to ka a fɔ aa a si i jague sa le i bole tɔ. I dita a mala kiyoki, aa i be a mala ɲɔgɔnna le.» Wo butɔ, Dauda wulita, a ka Sayulu la burumuse sɔngɔnden kuntu dɔyi, wo tota a bole tɔ.

⁶ Dauda to banta wo mala, a juse bɔɔta nimisa la, bayi a bata Sayulu la burumuse sɔngɔnden kuntu.

⁷ Dauda tugun kɔyikɔyita a la mɔgɛnu ye: «Alatala mu n natangala! N te sɔn feu n ni n bole maga n tige la, Alatala be min masubɛren. N kana fenfen ma a la, bayi Alatala le be a sɔren mansa la.»

⁸ Dauda ka a la mɔgɛnu ladan wo kuma le la, anu ma anu bole maga Sayulu la. Sayulu wulita a bɔɔta fanmɛ butɔ, a ka a la kila bita.

⁹ Wo tanbi kɔma, Dauda wulita, a bɔɔta fanmɛ tɔ, a bakkuta belebelela Sayulu kɔma: «N na mansa! Heee, n tige!» Sayulu ka a kɔma tafɛlɛ, Dauda butinta, a ka a majigi han a ka a tindɛ sɔ duge tɔ.

¹⁰ Dauda ka a fɔ Sayulu ye, a ko: «I be i tolomasɔla mɔgɛnu la kumanu la fenna, minnu be a fɔla i ye, aa n be diren ko koroŋɛ le mala i la?

¹¹ I bata a yen i ɲa la kɔtɛ, bi luŋɛ Alatala bata i sa n sagoe tɔ nun fanmɛ butɔ. A fɔta le n ɲɛ aa n ni i faga, kɔnɔ n ka i to ɲɔ, n mɛn ka a fɔ, n te n bole maga ile n marige la, bayi Alatala le be i masubɛren.

¹² N baaba, i ɲa sɔ yan na, i la burumuse sɔngɔnden de be n bolo ka. N ka i la burumuse sɔngɔnden pɛti le kuntu, kɔnɔ n ma i faga. I bata a yen, n ma di ko koroŋɛ mala i la, n ma murutɛ i ma. I bata a yen, n ma hakkɛ yo sɔtɔ i la. Ile le be n ɲinila kan bɛ i ni n na ko ladufen.

¹³ Alatala le be nala kiite sala nde nun ile tɛma, Alatala le si n tɛŋɛ yɔgɔ. Kɔnɔ, nde bole kan te ke i ma.

¹⁴ Sanda kɔtɛ do be a fɔren, aa koronya be bɔɔla mɔgɔ koroŋɛnu le tɔ. Kɔnɔ nde dɔ bole yati le te ke i ma.

¹⁵ Isirayila la mansa, i be bɔɔren ɲɔmɔ le digii ma? I be ɲɔmɔ le jokkiren i ni a ɲagankata? N bele maren fenfen na, fɔ min be toren iko wulu fagareŋɛ, ka wo ma koote.

¹⁶ Alatala, kiiti salá le mu a la, ale le be kiite sala mɔle fila tɛma. Ale le be nala n na ko fɛlɛla, a ni n kunma kɛlɛ ma, a ni tɔɲa dii n ma, a ni n bɔɔ i bolo.»

¹⁷ Dauda to banta wo kumanu fɔla Sayulu ye, Sayulu ka a fɔ, a ko: «N na den Dauda, ile le yati kulɛ mu ka?» Sayulu fɔlɔta dila.

¹⁸ Wo butɔ, a ka a fɔ Dauda ye, a ko: «Ile telenta nde ko, bayi ile bata ko ɲinma ma n ɲɛ, nde bata a koroŋɛ ma i la.

¹⁹ I ka ko ɲinma le yita n na bi i wali kɛɲa ma. Bayi Alatala bata n sa nun i sagoe tɔ, i ka n to ɲɔ i ma n faga.

²⁰ Ka mɔgɛ ka a jague masɔtɔ, a si a to le ba a ni taga a sagoe la? Alatala mu i sɔŋɛ diila ko ɲinma la i ka min ma n ɲɛ bi luŋɛ tɔ.

²¹ Awa, n ka lɔn yati, i si mansaya sɔtɔ le Isirayila, mansaya mɛn ni na tenkun i bolo.

²² Kɔtɛ, i kali n ɲɛ Alatala la ba, ka i te n juruya sɔntɔ n faga kɔma, ka i mɛn te naa n tɔgɛ lasama n baaba bɔnsɛ tɛma.»

²³ Dauda ka a kali Sayulu ye. Wo butɔ, Sayulu tagata a la boŋɛ tɔ, Dauda kan nun a la mɔgɛnu yɛlɛta anu be dogonden ka min na nun kɔnkɛ tɔ.