1 Samiyɛli 23 - Ala la kitabuenu Mɔgɔfin kuma tɔ

Sayulu la kata Dauda faga koe Keyila saa tɔ

¹ Lun do, anu ka a fɔ Dauda ye, aa Filisiti kaanu bata tugu Keyila saa la, aa anu be ɲɔ duge dahamɔɛ bosila ɲɔ kaanu bolo.

² Dauda ka Alatala maɲininka, a ko: «Ka n tagata, n si nɔ le Filisiti kaanu la ba?» Alatala ka a jaabi, a ko: «Taga, i si Filisiti kaanu botege le, i mɛn si Keyila saa lakisi le.»

³ Kɔnɔ Dauda la mɔgɛnu ka a fɔ a ye, anu ko: «I be a yenden Juda duge yan yati wo mɔ be kilaŋɛ min tɔ, sɔkkɔ fɛrɛ ka wo mɔ tagata Keyila saa tɔ Filisiti sɔɔrenu kɛlɛdula!»

⁴ Dauda mɛn ka Alatala maɲininka, Alatala ka a jaabi, a ko: «Wuli, i ni taga Keyila, bayi n bata Filisiti kaanu sa i sagoe tɔ.»

⁵ Dauda nun a la jama tagata Keyila. Anu ka Filisiti kaanu kɛlɛ, anu ka anu la kolofeŋɛnu jigan, anu ka anu kasara a banba la. Wo butɔ, Dauda ka Keyila kaanu lakisi.

⁶ Ahimelɛki la den Abiyatari min borita Sayulu la, wolo tugun naata to Dauda kɛnna Keyila saa tɔ ɲɔ, wo ka a taran a be Ala sago lɔn koe feŋɛnu bitaren a bole la.

⁷ Anu tagata a fɔ Sayulu ye, aa Dauda bata don Keyila. Sayulu ka a fɔ: «Ala bata a sa n bole tɔ. A to bata don saa tattareŋɛ butɔ min dondulanu be balanden, wo butɔ a bata a yɛtɛ balan ɲɔ, a te nɔ bɔɔla bitugun.»

⁸ Sayulu ka a la sɔɔrenu bɛ kele kɛlɛ koe la, aa anu ni jigi Keyila, anu ni taga Dauda lakɛtɛrɛn ɲɔ, anun a la mɔgɛnu.

⁹ Dauda ka Sayulu la ko koroŋɛ yen a be min kun sɔren a la. A ka a fɔ Abiyatari sarika lakelá ye, a ni Ala sago lɔn koe feŋɛnu nati.

¹⁰ Dauda ka a fɔ: «Alatala, Isirayila la Ala, nde i la jondeŋɛ bata a mɔɛ, ka a fɔla Sayulu be diren nala Keyila yan, a ni na kɛ saa tiɲa n na ko la.

¹¹ Yandi, a fɔ n ɲɛ ka Keyila kuntigenu si n don de a bolo ba? Nde i la jondeŋɛ bata min mɔɛ, tɔɲa le, Sayulu si na le ba? Alatala, Isirayila la Ala, i ni n nalɔn.» Alatala ka a fɔ: «A si na le.»

¹² Dauda mɛn ka a maɲininka: «Keyila kuntigenu si n don de Sayulu bolo ba, nde nun n na mɔgɛnu?» Alatala ka a jaabi: «Iyon, anu si naa wo sa le a sagoe tɔ.»

¹³ Awa, Dauda nun a la mɔgɛnu wulita, fayida mɔgɔ kɛmɛ wɔɔrɔ ɲɔgɔn, anu bɔɔta Keyila, anu tagata dula gbɛtɛ. Wo koe to naata fɔ Sayulu ye, a fɔ koe la Dauda bata bori Keyila, wo butɔ Sayulu ka wo kɛlɛ to ɲɔ.

Yonatan na Dauda kunpabɔɔ koe

¹⁴ Dauda tagata janfue tɔ, ka min masɔtɔ bɛlɛ. A tota Sifu janfue tɔ, kɔnkɛnu tɔ dula makantareŋɛ tɔ. Sayulu be a ɲinila lun go lun, kɔnɔ Ala ma a sa a bole tɔ.

¹⁵ Dauda ka a lɔn Sayulu be kila tɔ a be a ɲinila alako a ni a faga. Kɔnɔ Dauda tota Sifu janfue tɔ, Horesa mafanna.

¹⁶ Lun do, Sayulu la den kayireŋɛ Yonatan tagata Dauda dula ɲɔ Horesa mafanna, alako a ni a sɛnbɛ don a fɔ koe la a ni yigi sa Ala la ko ma.

¹⁷ A ka a fɔ a ye, a ko: «Hali i ma kilan, n baaba Sayulu te i masɔtɔ feu. I si mansaya le Isirayila, nde si ma i kɛnnasɔlá la. N baaba Sayulu yati ka wo lɔn.»

¹⁸ Awa, anu mɛn ka anu la kafuɲɔgɔya lahire takiti ɲɔgɔn tɛma Alatala ɲala. Dauda tota Horesa mafanna, Yonatan tugun saagita a bata.

Sayulu la Dauda bee koe Mawoni janfue tɔ

¹⁹ Sifu kaanu tagata Sayulu dula Gibeya saa tɔ, anu ka a fɔ a ye, anu ko: «I ma a lɔn Dauda be dogonden mɔ la duge tɔ ba? A be Horesa dula makantareŋɛ tɔ, Hakila kɔnkɔrɛ tɔ, Yesimɔn sɔngɛ la.

²⁰ Awa, kɔtɛ, bayi i be diren a bitala le tekku, awa, mansa, taga tun, mɔ si a sa le i sagoe tɔ.»

²¹ Sayulu ka a fɔ: «Ala mu barikɛ sala wo la ko tɔ, bayi wo kinikinita n ma.

²² Awa yandi, wo ni taga, wo ni a la ko kibare ɲini ka a fɛlɛ koola a todula mu ka min na, anun a be a kɛŋɛ sɔren ka min ma, a mɛn ni lɔn min ka a yen ɲɔ, bayi anu bata a fɔ n ɲɛ aa a keu koola.

²³ Wo a ɲini, wo ni a lɔn a si nɔ tagala a dogonna ka min na tugun. Wo kɔma, wo ni tasaagi nala ka ko beeyareŋɛ fɔ n ɲɛ, wo wagate, wo mɔ bɛ le be tagala. Ka a be Juda duge tɔ le, n si a ɲini le ɲɔ Juda gabilanu bɛ tɛma.»

²⁴ Sifu kaanu saagita, anu fɔlɔ tagata Sayulu ko. Wo wagate, Dauda nun a la mɔgɛnu be Mawoni janfue tɔ, Araba dula yiriwareŋɛ tɔ, Yesimɔn tele bɔɛ bolo ɲinma tɔ.

²⁵ Sayulu nun a la mɔgɛnu bɔɔta Dauda ɲinidula. Wo koe fɔta Dauda ye. Wo butɔ, a tagata to Mawoni janfue dula do tɔ fata mayɛlɛreŋɛnu be ka min na. Sayulu to ka wo mɔɛ, a tagata Dauda beedula wo Mawoni janfue tɔ.

²⁶ Sayulu be tagamanna wo kɔnkɛ sɔngɛ doe la, Dauda tugun nun a la jama be tagamanna kɔnkɛ sɔngɛ doe la. Dauda kan be borila le nun sɛnbɛ la Sayulu la. Kɔnɔ, Sayulu ɲan be Dauda nun a la mɔgɛnu lakɛtɛrɛn koe le tɔ, a ni anu masɔtɔ.

²⁷ Kɔnɔ kiilá nata wo wagate le Sayulu ma, a ko aa a ni saagi teriya la, Filisiti kaanu bata tugu Isirayila duge la.

²⁸ Sayulu saagita Dauda kɔma, a tagata Filisiti kaanu digii ma. Wolo ka a ma, anu ka ɲɔ tɔgɔ sa «Mɔgɔ Lafatan Fata».