1 Samiyɛli 22 - Ala la kitabuenu Mɔgɔfin kuma tɔ

Dauda ma koe mɔgɔ siyama la kuŋɛ la

¹ Dauda ka a kun bɔɔ Gati saa tɔ, a bɔɔta ɲɔ, a tagata dogon Adulami fanmɛ tɔ. A kɔtɔnu nun a bareŋɛnu bɛ to nata wo mɔɛ, anu tagata a dula.

² Minnu bɛ be kɔntɔfiliren, dɔntɛ siyata minnu bɛ kunma, anun minnu bɛ be jusu makasa tɔ, wonu bɛ madɛnta a dula, a mata anu la kuŋɛ la. Wo butɔ, fayida kayi mɔgɔ kɛmɛ naani le tota a fɛ.

³ Dauda bɔɔta ɲɔ, a tagata Misipe Mowaba duge tɔ. A tagata a fɔ ɲɔ mansa ye, a ko: «Yandi, a to n nɛɛnɛ nun n baaba ni na to n ɲɛ yan betunna, han n ni a lɔn Ala be n na ko mala ki min na.»

⁴ Wo butɔ, Dauda ka anu doni Mowaba mansa bata, anu tota ɲɔ han a ka wagate min bɛ ma a dogon dula tɔ.

⁵ Lun do, nabiyonmɛ do min tɔgɔ Gaddu, wolo ka a fɔ Dauda ye, a ko: «I kana to i dogon dula tɔ de! Taga, i ni don Juda duge tɔ.» Wo butɔ, Dauda tagata Juda, a tagata ke Hɛrɛti wula ma.

Sayulu la Nobu sarika lakelanu faga koe

⁶ Lun do, Sayulu nata a mɔɛ Dauda nun mɔgɛ minnu be a kɔma, wonu la ko bata lɔn. Wo ka a taran, Sayulu be sigiren nun tamarisi lɔgɛ do kɔtɔ Gibeya saa tɔ, dula mayɛlɛreŋɛ tɔ, a la tanba be bitaren a bole la, a la walilanu bɛ be sɔren nun a kɛnna.

⁷ Sayulu ka a fɔ a la walilanu ye, a ko: «Wo tolomasɔ, wole Bunyamin bɔnsɛnu. Jese la deŋɛ si nɔ le rɛsɛn sɛnɛnu diila wo bɛ ma ba, anun sɛnɛ donu? A si kuntigiya dii le wo ma ba sɔɔri mɔgɔ kɛmɛ kunma, ka wo ma mɔgɔ wulu dɔndɔ?

⁸ Wo bɛ le be janfa makitiren n kunma. Mɔgɔ yo ma n nalɔn a fɔ koe la n na deŋɛ bata lahiri kiti a nun Jese la deŋɛ tɛma. N na ko ma mɔgɔ yo tɔɔrɔ han a ni n nalɔn ka a fɔla, n na deŋɛ bata n na walilá do sɛnbɛ don, alako wo tigi ni jule yɛlɛ n ɲa tɔ, iko n be min tɔ ka bi.»

⁹ Doyegi, Edɔmi kaa, ale min mu a la kolofen kantalanu kuŋɛ la, wo ka kuma jigan, a ko: «Nde ka Jese la deŋɛ yen de, a be nala Nobu saa tɔ, Ahitubu la deŋɛ Ahimelɛki dula.

¹⁰ Ahimelɛki ka Alatala maɲininka a ye, a ka dɔmɛnu don a bolo, a mɛn ka Jaluta Filisiti kaa la faŋɛ don a bolo.»

¹¹ Mansa ka kiilanu boloka anu ni taga Ahitubu la deŋɛ Ahimelɛki kele, sarika lakelá, anun sarika lakelanu minnu bɛ be a baaba bɔnsɛ tɔ Nobu saa tɔ, anu ni na. Awa, anu bɛ nata mansa la kelere la.

¹² Sayulu ko: «I tolomasɔ ba, Ahitubu la deŋɛ.» Ahimelɛki ka a jaabi: «Naamu, n tige.»

¹³ Sayulu ko: «Wo be janfa makitiren n kunma fenna, wole nun Jese la deŋɛ? I ka dɛgɛ nun faŋɛ don a bolo fenna, i mɛn nata Ala maɲininka a ye, alako a ni a ɲamatelen n ma, a ni kɛnɛ jule yɛlɛla n ɲatɔ, iko n be min tɔ ka bi.»

¹⁴ Ahimelɛki ka kuma jigan, a ko: «Mansa, ɲɔmɔ le ɲan be maren lannanteya mɔgɛ la i la walilanu bɛ tɛma iko Dauda? Ká, i bitaŋɛ le ma a la? A be maren i la gundo sɔɔrenu la kuntige le la, biliya be a ma i la boŋɛ tɔ.

¹⁵ Bɔ, n be Ala maɲininka koe fɔlɔren a ye bi le ba? N na mira ma wo la feu! Mansa, yandi, i kana kɛ koe sa nde i la joŋɛ kunma, ka wo ma n baaba bɔnsɛ, bayi n ma fenfen lɔn kɛ koe tɔ.»

¹⁶ Mansa ka a fɔ Ahimelɛki ye, a ko: «Tekku fɔ wo ni faga, ile nun i baaba bɔnsɛ bɛ.»

¹⁷ Wo butɔ, mansa ka a makantalanu yamɔri minnu be sɔren a kɛnna, a ko: «Wo ni Alatala la sarika lakelanu faga, bayi anu bata Dauda la bori koe lɔn, anu ma n nalɔn.» Kɔnɔ wo makantalanu ma sɔn Alatala la sarika lakelanu fagala.

¹⁸ Wo butɔ, mansa ka a fɔ Doyegi ye, a ko: «Ile ni taga, i ni sarika lakelanu faga.» Doyegi Edɔmi kaa tagata, ale ka sarika lakelanu botege han a ka mɔgɔ bi sagin nun loolu faga wo lun, sarika lakelá tasɔgɔ doroke be lajigiren minnu ma.

¹⁹ Wo kɔma, Sayulu ka sɔɔrenu kii Nobu saa tɔ, wo sarika lakelanu la saa, anu ni ɲɔ kaanu bɛ faga. Anu ma a bɔɔ kaye nun muse la, dendeŋɛ nun bɔɔbɛ, ninge, sofale nun saaka. Anu ka anu bɛ faga fan dadiyama le la.

²⁰ Kɔnɔ Abiyatari Ahitubu mamareŋɛ kan, Ahimelɛki la deŋɛ, wo dɔrɔn de ka a kun bɔɔ. A borita, a ka Dauda jokki.

²¹ A la kereŋɛ Dauda ma, Abiyatari ka a lalɔn ka a fɔla Sayulu bata Alatala la sarika lakelanu faga.

²² Dauda ka a fɔ Abiyatari ye, a ko: «Wo lun yati n ka a lɔn de, ka a fɔla Doyegi Edɔmi kaa to be ɲɔ, n ko a si naa a fɔ le Sayulu ye. Wo butɔ, nde le be maren i baaba bɔnsɛnu faga sabue la.

²³ To n kɛnna, hali i ma kilan. Min be katala n faga koe la, a be katala ile tugun faga koe la, kɔnɔ i si makanta le n kɛnna a ɲinma la.»