1 Samiyɛli 21 - Ala la kitabuenu Mɔgɔfin kuma tɔ

¹ Dauda wulita, a tagata. Yonatan tugun saagita saa tɔ.

Dauda la bore tagala Nobu

² Dauda tagata Nobu, Ahimelɛki sarika lakelá dula, wo jusu bɔɔreŋɛ nata a labɛndula, a ka a maɲininka: «Fenna i dɔrɔn be naren, mɔgɔ yo bele i kɔma?»

³ Dauda ka Ahimelɛki jaabi, a ko: «Mansa le be n yamɔriren n ni taga kan do, kɔnɔ a be maren gundo le la mɔ fila tɛma, aa mɔgɔ yo kana a lɔn a be n kiiren fen min na. N be dula do le yitaren n na kamareŋɛnu la, mɔ be bɛnna ka min na.

⁴ Kɛ wagate, dɔmɔ yo bele i bolo yan? Dɛgɛ loolu dii n ma, ka wo ma i ka min yo sɔtɔ.»

⁵ Sarika lakelá ko: «Wo dɛgɛ doe bele n bolo yan, fɔ dɛgɛ saniyandeŋɛnu minnu be bɔɔren sarika la. I la kamareŋɛnu si nɔ a dɔmɔla, ka a taranta dɔ anu bele bɔɔren musu koe mala.»

⁶ Dauda ka a fɔ a ye: «Tɔŋɛ ɲan be sigiren de mɔ la musu koe ma koe la iko wagate bɛ mɔ tini be tagala kɛlɛ madula. Bayi ka mɔ be tagala kɛlɛ madula wagati yo wagati, hali a ma ma Ala la kɛlɛ la, n na sɔɔrenu dariren tola anu te musu koe ma alako anu ni to saniyaŋɛ tɔ. Sɔkkɔfɛrɛ nɔn bi, mɔ to be Ala la kɛlɛ le tɔ, kɛ sɔɔrenu bɛ be saniyanden de feu!»

⁷ Wo butɔ, sarika lakelá ka wo dɛgɛ saniyandeŋɛnu don a bolo, bayi dɛgɛ yo bele nun ɲɔ, fɔ wo dɛgɛnu minnu be saren nun teebile tɔ hɔrɔma dingira butɔ Alatala tabɛŋɛ tɔ. Wo ka a taran, anu ka anu jigan wagate min tɔ, anu bata dɛgɛ namanu sa ɲɔ anu faliŋɛ la.

⁸ Wo lun, Sayulu la walilá do be ɲɔ nun, a be toren ɲɔ wali do le ma koe la Alatala ɲakɔtɔ. Edɔmi kaa le mu a la, a tɔgɔ Doyegi, a be maren Sayulu la kolofen kantalanu kuŋɛ le la.

⁹ Dauda mɛn ka a fɔ Ahimelɛki sarika lakelá ye, a ko: «Tanba yo bele i bolo ba, ka wo ma faŋɛ? N bɔɔta le, n ma n na faŋɛ jigan, ka wo ma kɛlɛ mafeŋɛ do, bayi mansa be n nagbataaren a la kiilaya la.»

¹⁰ Sarika lakelá ka a fɔ a ye, a ko: «I ka wo Filisiti kaa min faga Ela fole tɔ, min tɔgɔ Jaluta, wo la faŋɛ le be yan. A be mamilinden kuta do butɔ. Ala sago lɔn koe feŋɛnu minnu be mandiren sarika lakelá la doroki banba butɔ, a be saren wonu kɔma. Ka i be diren wo jiganna, a jigan, kɛlɛ mafen gbɛtɛ yo bele yan.» Dauda ka a fɔ: «A don n bolo, a mulunɲɔgɔ yo bele.»

Dauda la taga Filisiti kaanu bata

¹¹ Dauda wulita, a borita ka yanfaya Sayulu la wo lun dɔndɛ le. A donta Filisiti kaanu la duge tɔ, ka taga Akisi bata, Gati mansa.

¹² Akisi la walilanu ka a fɔ a ye: «Dauda Isirayila dugu mansa ma kɛ la ba? Musenu bele dɔŋɛ dɔnna kɛ-lɛ ye ba, anu tota a fɔla sige tɔ aa Sayulu bata mɔgɔ wulu wulu botege, ale Dauda kan bata mɔgɔ wulu tan tan de botege?»

¹³ Dauda ka wo kumanu to a juse tɔ, a kilanta koola Akisi la, Gati mansa.

¹⁴ A ka a yɛtɛ ma anu tɛma dakue la. Anu tini a bita, a ni kɛnɛ hakkilibɔnɔya koenu mala, a ni to fondonu maɲɛgɛnna bondanu ma, a daje ni to jigila a bɔɔra la.

¹⁵ Akisi ka a fɔ a la walilanu ye, a ko: «Wo be a yenden yati, dakue le mu kɛ kaye la! Wo be a natiren n ɲɛ fenna?

¹⁶ Bɔ, a be toren wo ye aa daku feete le be n na, wo to be kɛ natila, a ni na dakuyanu ma n ɲala ba? Kɛ si don de n na boŋɛ tɔ ba?»