1 Samiyɛli 20 - Ala la kitabuenu Mɔgɔfin kuma tɔ

Yonatan nun Dauda la lahire

¹ Dauda borita ka bɔɔ Nayɔti, dula min be Rama saa tɔ. A tagata Yonatan bata, a ka a maɲininka, a ko: «N be fen de maren? N na tiɲare mu fen de la? N ka fen de ma i baaba la, a to be diren n nɛɛ bɔɔla?»

² Yonatan ka a jaabi, a ko: «Ade! I te faga. N baaba te fenfen ma a ni to a ma min fɔ n ɲɛ, a mata ko lanma la ba, a mata ko banba la ba. Fenna a si naa kɛ kan dogon n na? A te wo ma!»

³ Dauda ka a kali, a ko: «I baaba ka a lɔn a ɲinma la ka a fɔla n na ko bata diya i ye. A be a fɔla le a fan ma, i kana lɔn sɔtɔ kɛ ma, ka wo ma a si i tɔɔrɔ le. Kɔnɔ, n bata n kali Alatala la, Ala min be baluren, anun ile la ko la, n ko nde nun faga tɛma yo ma yanfa ɲɔgɔn na bitugun.»

⁴ Yonatan ka a fɔ Dauda ye: «Awa, i be diren fen de ye n si min ma i ye?»

⁵ Dauda ko: «I ka a lɔn, sinan kari nama sale le mu, n bɛnta majigila mansa kɛnna dɔmɔre ma wagate. A to n ni taga, n ni dogon saa kɔma, han a tele saba luŋɛ wura la.

⁶ Ka i baaba ka i maɲininka n na ko la, i ni a fɔ a ye, aa n ka i madiya le alako i ni a to n ni taga teriya la mɔ bata Betilɛmu saa tɔ, aa sarika bɔɔnɛŋɛ be mɔ gabila bolo, anu be min bɔɔla san yo san.

⁷ Ka a ka a fɔ, wo kaɲin, wo be a fɔren de jususa be n ɲɛ, nde i la joŋɛ. Kɔnɔ ka a tagata dumɛn, i si a lɔn wolo la ka a fɔla a be ko koroŋɛ yati le nataren n mafanna.

⁸ Kɔtɛ yandi, i la hanige ɲinmaya yita n na, bayi i bata ile nun nde i la joŋɛ ladon lahire tɔ Alatala ɲala. Fenna i be n donila i baaba dula? Awa, ka n be tiɲare do le maren, ile yati ni n faga!»

⁹ Yonatan ka a fɔ a ye: «I kana a mira ka a fɔla n baaba be ko koroŋɛ min nataren i ye, ka n tagata lɔn sɔtɔ a ma n si to n ma a fɔ i ye.»

¹⁰ Dauda ka a fɔ Yonatan ye, a ko: «Ka i baaba nata i jaabi kuma bɛlɛma la go, ɲɔmɔ le be n nalɔnna yan?»

¹¹ Awa, Yonatan ka a fɔ Dauda ye: «Mɔ bɔɔ yan, mɔ ni taga saa kɔma.» Anu fila bɛ tagata saa kɔma.

¹² Yonatan ka a fɔ Dauda ye, a ko: «N nun Alatala tɛma, bani Isirayila Marige Ala, mɔ be wagate min tɔ ka, ka bɔɔ sinan han sinankɔ kɛ wagati ɲɔgɔn, wo si a taran de n bata n baaba jusu butɔ koe tefi. Ka a si bɛn i ye, n tota n ma kiilá kii i lalɔn koe la,

¹³ Alatala ni ɲagankata koroŋɛ sigi n ma. Ka a kaɲin n baaba ye a ni ko koroŋɛ le ma i la, n mɛn si i lalɔn de. Wo wagate, n si a to le, i ni taga jususa tɔ, Alatala ni to i fɛ, iko a be n baaba fɛ ki min na nun.

¹⁴ Ɲatɔ, ka a taranta n be balue tɔ wo tuma, i ni n bita Alatala la hanige ɲinmaya la, alako n kana faga.

¹⁵ Yandi, Dauda, hali Alatala tagata i jaguenu bɔɔ kɛ dunuya bangu munge kunma, kɔnɔ i kana i la jusu ɲinmaya kan dan n na juruya ye kudai.»

¹⁶ Awa, Yonatan ka lahire kiti a nun Dauda juruya tɛma, a ko: «Alatala ni Dauda tɛŋɛ yɔgɔ a jaguenu ma.»

¹⁷ Yonatan mɛn ka Dauda lakali a la kanunteya la ko la, bayi a ka a kanu le iko a yɛtɛ yati.

¹⁸ Yonatan ka a fɔ a ye, a ko: «Sinan de mu kari nama sale la. Anu si i la ko lakɔrɔsi ka a fɔla i bele ɲɔ, bayi i sigidula be tola le a tɛsɛn.

¹⁹ A tele saba luŋɛ, i be tagala han i dogon dula kɔtɛ tɔ le pon, i ni taga to Ɛsɛli kure kɔma ɲɔ.

²⁰ N si taga ɲɔ n ni ndaka saba fili wo kure mafanna, iko n be fondo le bunna.

²¹ Wo kɔma, n si kamarendeŋɛ kii le a ni taga anu kɔma. Ka n ka a fɔ a ye: ‹I ɲa sɔ, ndakanu ɲan bele yanfayaren, i ni anu jigan›, awa wo be a fɔren de i si nɔ nala, i juse ni sa, fenfen bele. N be a fɔla Alatala le ɲala, Ala min be baluren!

²² Kɔnɔ ka n ka a fɔ kamarendeŋɛ ye, n ko: ‹Ndakanu le wo la i kɔma kala›, awa taga, Alatala le be diren i ni taga.

²³ Mɔ fila bɛn kuma le wo la. Alatala le be mɔ fila tɛma kudai.»

²⁴ Wo butɔ, Dauda tagata dogon saa kɔma. Kari nama sale to keta, mansa ka a majigi sale luŋɛ ɲagaɲaga tɛma, a ni a daɲini.

Sayulu dumɛn koe Yonatan ma Dauda la ko la

²⁵ Mansa to ka a majigi a la tintiŋɛ tɔ, a be dariren sigila ka min na, bon koloŋɛ ma, Yonatan wulita. Abineri sigita Sayulu kɛnna, kɔnɔ Dauda sigidula kan tota a tɛsɛn.

²⁶ Sayulu ma fenfen fɔ wo lun, bayi ale ye, tumado Dauda be kɔ́sɛ́ do le tɔ, a bele saniyanden de, wolo mu.

²⁷ Wo tabantaka, sale tele fila luŋɛ, Dauda sigidula mɛn be toren a tɛsɛn. Sayulu ka Yonatan maɲininka, a ko: «N na den Yonatan, bɔ, fende Jese la den kayireŋɛ ma na a daɲinidula kunun anun bi?»

²⁸ Yonatan ka Sayulu jaabi, a ko: «Dauda ka n madiya le, aa n ni a to a ni taga Betilɛmu.

²⁹ A ka a fɔ, a ko: ‹Yandi, a to n ni taga, bayi sarika bɔɔ nɛŋɛ do le be n bata saa tɔ, gabila nɛŋɛ. N kɔtɔ ka a fɔ n ɲɛ aa n ni taga. Ka n na ko di i ye, a to n ni taga teriya la, n ni n kɔtɔnu yen.› Awa mansa, wolo ka a ma, a ma bɛn i la daɲini koe ma.»

³⁰ Awa, Sayulu dumɛnta a la den Yonatan ma, a ka a fɔ a ye: «Ile den murutɛreŋɛ, a be toren i ye, aa n ma a lɔn, ka a fɔla i bata to Jese la deŋɛ ye. A be mala i ye maluya le la, i nun i nɛɛnɛ!

³¹ I tolomasɔ: fanni Jese la deŋɛ be baluren, ile te naa sabati i la mansaya tɔ. Kɔtɛ, kiilanu kii ka taga a nati, bayi tekku le fɔ a ni faga.»

³² Yonatan ka a baaba Sayulu jaabi, a ko: «Bɔ, a be fagala fenna? A be fen de maren?»

³³ Wo butɔ, Sayulu ka a la tanba fili a la deŋɛ ma, a ni a sɔgɔ. Awa, Yonatan bata a lɔn, a baaba be diren Dauda fagala le yati.

³⁴ A wulita teebile tɔ a dumɛndeŋɛ la, a ma sɔn a daɲinila bitugun wo kari nama sale tele fila luŋɛ tɔɛ la. A juse bele diyaren a ye Dauda la ko la, a baaba to ka malajarabi kuma fɔ.

Yonatan na Dauda lalɔn koe a baaba la natá koroŋɛ la

³⁵ Wo tabantaka saguma, Yonatan tagata saa kɔma, ale nun Dauda bɛnta ka min ma, denden lanma do be Yonatan jokkiren.

³⁶ A ka a fɔ a ye, a ko: «I ni taga ndakanu matɔnbɔn n be naala minnu filila.» Dendeŋɛ fɔlɔta borila ki min na, Yonatan ka ndakanu fili a ɲatɔ ɲagama butɔ.

³⁷ Dendeŋɛ to keta ndaka dula Yonatan ka min fili, Yonatan ka a kulɛ mayɛlɛ a kɔma, a ko: «Ile, ndaka ma yanfa ɲɔ la ba?»

³⁸ A mɛn ka a kulɛ mayɛlɛ a ma, a ko: «Teriya, i kana sɔ de!» Awa, Yonatan na dendeŋɛ ka ndakanu matɔnbɔn, a ka anu nati a tige ye.

³⁹ Dendeŋɛ kan bele fenfen lɔnden, Dauda nun Yonatan tun de be wo kuma butɔ lɔnden ɲɔgɔn ye.

⁴⁰ Yonatan ka wo kɛlɛ mafeŋɛnu don dendeŋɛ bolo a nun min be ɲɔgɔnna, a ka a fɔ a ye: «Taga, anu doni saa tɔ.»

⁴¹ Dendeŋɛ to tagata, Dauda wulita, a bɔɔta a dogondula tɔ kure kɔma, a ka a ɲakɔtɔ majigi duge mafanna han a ka a tindɛ sɔ duge tɔ kunɲama saba. Kanuntema filanu naata milimili ɲɔgɔn ma, anu dita, a gbengbeŋɛ Dauda.

⁴² Awa, Yonatan ka a fɔ Dauda ye, a ko: «Mɔle fila to bata mɔ lakali Alatala tɔgɛ la, a fɔ koe la, Alatala ni to nde nun ile tɛma, a ni to n juruya nun i juruya tɛma kudai, wo kɔtɛ, taga jususa butɔ.»