1 Samiyɛli 18 - Ala la kitabuenu Mɔgɔfin kuma tɔ

¹ Bɔɔla Dauda banta kumala Sayulu ye, Yonatan nɛɛ ka Dauda bita. Yonatan ka a kanu iko a yɛtɛ yati.

² Wo lun dɔndɛ, Sayulu ka Dauda makankan, a ma sɔn Dauda ni saagi a baaba bata.

³ Yonatan nata lahire kiti a nun Dauda tɛma, bayi Dauda di a ye iko a yɛtɛ yati.

⁴ A ka a la doroki kunmanɛŋɛ bɔɔ a ma, a ka a lajigi Dauda ma, a ka la kuta tɔɛnu tugun dii a ma, anun a la faŋɛ, anun a la ndaka filifeŋɛ, anun a la bɛlɛte.

Sayulu la Dauda bɛsɛnkɔnnɛya koe

⁵ Sayulu ni Dauda lasanba kɛlɛ kɛlɛnu tɔ, Dauda tota sɔnɔya sɔtɔla. Sayulu ka a sɔ kuntige la kɛlɛ malá sɛnbɛmanu kunma, jama tugun be a kanuren koola, hali Sayulu la walilanu.

⁶ Dauda la Filisiti kaa faga kɔma, sɔɔrenu be donna wagate min tɔ bɔɔla kɛlɛ tɔ, Isirayila musenu bɔɔta saanu bɛ tɔ, anu be sige sala, anu be dɔŋɛ dɔnna, tagala mansa Sayulu labɛndula, anu be boote nun basirifeŋɛnu mɔɔle donu botegela, anu be sɔnkɛ layɛlɛla sɛɛwa butɔ.

⁷ Musenu be sige labitala anu be jelela ɲɔgɔn na, anu be a fɔla ɲɔgɔn ye, anu ko: «Sayulu ka mɔgɔ wulu wulu le botege, kɔnɔ Dauda kan ka mɔgɔ wulu tan tan de botege.»

⁸ Sayulu to ka wo sige mɔɛ, a dumɛnta koola, wo koe ka a juse maɲaku a ma, a ka a fɔ, a ko: «Anu ka Dauda tɛŋɛ ma wulu tan na, anu ka nde tɛŋɛ ma wulu dɔndɔ la, awa, mansaya koe le tun be toren a ye kɔtɛ.»

⁹ Bɔɔla wo lun dɔndɛ tanbi kɔma, Sayulu ka a ɲa koroŋɛ sɔ Dauda la.

Sayulu la kata Dauda faga koe la

¹⁰ Wo tabantaka, Ala ka hakkili koroŋɛ lajigi Sayulu ma, a fɔlɔta miligimalagala a la boŋɛ butɔ, tanba be bitaren a bole tɔ. Wo ka a taran Dauda kan be tolonna a ye a la kɔra la, iko a darita a la ki min na wagate bɛ.

¹¹ Sayulu ka a la tanba fili Dauda ma kisanna a ko: «N be Dauda banbanna kɛ-lɛ la bon koloŋɛ ma!» Kunɲama fila a be katala a ma, kɔnɔ Dauda be bɔɔla a bolo.

¹² Sayulu bata kilan Dauda la, bayi a bata a yen Alatala bata a aɲɛ, a be Dauda le fɛ kɔtɛ.

¹³ Sayulu ka Dauda mayanfaya a la, a ka a ma sɔɔre mɔgɔ wulu dɔndɔ kuŋɛ la. Jama tini be tagala kɛlɛ tɔ, anun anu tini be saagila, Dauda le be anu ɲatɔ.

¹⁴ A la koe bɛ be sɔnɔyaren de, bayi Alatala be a fɛ.

¹⁵ Sayulu to ka a yen koenu bɛ be sɔnɔyaren de Dauda ye, wo butɔ a kilanta a la.

¹⁶ Kɔnɔ Dauda di Isirayila kaanu nun Juda kaanu kan ye, bayi jama tini be tagala kɛlɛ tɔ, anu mɛn tini be saagila, Dauda le be anu ɲatɔ.

Dauda la Sayulu la den musereŋɛ futu koe

¹⁷ Sayulu ka a fɔ Dauda ye, a ko: «N na den museren fɔlɛ le ka, Merabi. N si a dii le i ma, ka i tagata a yita n na i mu kɛlɛ malá sɛnbɛma le la, i ni Alatala la kɛlɛnu ma.» Sayulu ka a fɔ a yɛtɛ ma: «Nde yɛtɛ te n bole tajigan n ni Dauda faga, Filisiti kaanu le be a fagala.»

¹⁸ Dauda ka Sayulu jaabi, a ko: «Fende mu nde la? N na dunuya takunte be maren kama le? Fen de mu n baaba bɔnsɛ la Isirayila? Mansa si ma n bitaŋɛ la ba?»

¹⁹ Sayulu bɛnta a ni a la den musereŋɛ Merabu don Dauda bolo wagate min tɔ nun, wo to keta, a ka a tadii Adiriyeli le ma, Mehola kaa.

²⁰ Kɔnɔ Mikali, Sayulu la den museren filaɲɔgɛ ka Dauda kanu. Anu tagata a fɔ Sayulu ye, wo koe diyata a ye.

²¹ Kɔnɔ Sayulu to be jule yɛlɛren a ye, a ko a yɛtɛ ma: «N ni a dii a ma, alako a ni ma jule la, Filisiti kaanu bole ni sa a ma.» Wo butɔ, Sayulu mɛn ka a fɔ Dauda ye a filaɲɔgɛ la, a ko: «Bi kan, i si ma le n bitaŋɛ la.»

²² Sayulu ka yamɔre dii a la walilanu ma, a ko: «Wo a fɔ Dauda ye gundo tɔ, wo ko: ‹A fɛlɛ, i bata diya mansa nun a kɛnnasɔlanu bɛ ye. Awa i ni sɔn ma koe la mansa bitaŋɛ la.›»

²³ Sayulu la walilanu ka wo kumanu bɛ matanbi Dauda ma. Dauda ka anu jaabi, a ko: «A be toren wole ye, ko dɔgɔman de mu wo la, ma koe mansa bitaŋɛ la? Fondobɔnɛ le mu n na, n sɔdula ma kolo.»

²⁴ Sayulu la walilanu tagata Dauda la kumanu ɲamakaran a ye.

²⁵ Sayulu ka a fɔ, a ko: «Wo be kɛ-lɛ fɔla Dauda ye: ‹Mansa bele diren koto sigi koe le ye, a be diren de i ni Filisiti kaanu kayi mɔgɔ kɛmɛ kayiya kuŋɛ kuntu, i ni a nati a ye, alako a ni a tɛŋɛ yɔgɔ a jaguenu ma.›» Wo butɔ, Sayulu be fɛrɛ le ɲinila alako a ni Dauda sa Filisiti kaanu bole tɔ.

²⁶ Sayulu la walilanu ka wo kuma bɛ lake Dauda ma, a sɔnta mala mansa bitaŋɛ la. Yannun wagate ni ke min fɔta,

²⁷ Dauda nun a la sɔɔrenu wulita anu tagata Filisiti kaa kaye mɔgɔ kɛmɛ fila faga. Dauda ka anu kayiya kuŋɛ kuntu, a ka anu nati mansa ye, alako a ni ma mansa bitaŋɛ la. Kɔnte kamalita. Wo butɔ, Sayulu ka a la den musereŋɛ Mikali dii Dauda ma, a ni ma a la muse la.

²⁸ Sayulu ka a fɛlɛ, a bata a lɔn Alatala be Dauda fɛ, a la den musereŋɛ Mikali tugun be Dauda kanuren.

²⁹ Wo butɔ, Sayulu be tagala kilanna le tun Dauda la. Wolo ka a ma, a la simaya tɔɛ bɛ butɔ, a ka Dauda jaguya.

³⁰ Wo wagate, Filisiti sɔɔri kuntigenu be kɛnɛ nala le nun Isirayila digii ma kɛlɛ ma koe la. Dauda kan, kɛlɛ yo kɛlɛ be sɔnɔyaren de a ye Sayulu la sɔɔre doenu bɛ ko. Wo butɔ, Dauda tɔgɛ tota mayɛlɛla koola.