1 Samiyɛli 14 - Ala la kitabuenu Mɔgɔfin kuma tɔ

Yonatan la Filisiti kaanu kɛlɛ koe

¹ Lun do, Yonatan, Sayulu la den kayireŋɛ ka a fɔ a la kamareŋɛ ye, min be kɛnɛ a la kɛlɛ mafeŋɛnu mayadɛla, a ko: «Na ba mɔ ni ma ka tanbi Filisiti kaanu la daaka dula, ɲɔ le mu wo la kaala.» Kɔnɔ, Yonatan ma a baaba lalɔn.

² Wo wagate, Sayulu be daakaren nun Gibeya saa la baŋɛ tɔ, lɔgɛ do kɔtɔ min wole tɔgɔ gerenadi, min be sɔren nun Migirɔn, ale nun a la jama kayi mɔgɔ kɛmɛ wɔɔrɔ.

³ Alatala la sarika lakelá tugun be Sayulu kɛnna, wo tɔgɔ le Ahiya. A be Ala sago lɔn koe feŋɛnu donila a fɛ. Ahiya baaba le mu Ahitubu la, min dɔgɛ mu Ikabodi la. Ahiya mankayi le mu Finehasi la, a tolobita le be tabɛnden Eli ma, min be maren sarika lakelá la nun Alatala ye Silo. Mɔgɔ yo ma a lɔn, ka a fɔla Yonatan bata taga nun.

⁴ Yonatan katata tanbi koe la ka min na, taga koe la Filisiti gale la daaka dula, fata da ŋaɲamanu be ɲɔ, sɔngɔ nun sɔngɔ. Dɔndɛ tɔgɔ le Bosese, doe tugun tɔgɔ nun Sene.

⁵ Wo ɲin dɔndɛ be lasɔren tele bɔɛ bolo mara mafanna, Mikimasi tabɛŋɛ tɔ, ɲiŋɛ doe tugun be sɔren a bolo ɲinma mafanna, Geba tabɛŋɛ tɔ.

⁶ Yonatan ka a fɔ a la kamareŋɛ ye, min be kɛnɛ a la kɛlɛmafeŋɛnu mayadɛla a ye, a ko: «Mɔ ma ba han kɛ bilakorenu be daakaren ka min na. Tumado Alatala si kɛnu lajarabi le mɔ ye, bayi Alatala si nɔ malakise mala mɔgɛ donden sabu la, iko a mɛn to si nɔ a mala mɔgɔ siyama sabu la.»

⁷ A la kɛlɛmafen mayadɛlá ka a jaabi, a ko: «I juse bata min bɛ jigan, i ni taga wo bɛ ma. N si to i fɛ kɛɲa bɛ la.»

⁸ Yonatan ka a fɔ, a ko: «Awa, mɔ ni ma han anu dula, mɔ ni mɔ yɛtɛ labɔɔ anu ma.

⁹ Ka anu ka a fɔ: ‹Wo sɔ ɲɔ, han mɔ ni ke wo ma›, mɔ be sɔla ɲɔ le, mɔ te taga anu dula.

¹⁰ Kɔnɔ, ka anu ka a fɔ: ‹Wo na yan›, wo butɔ mɔ si yɛlɛ, bayi wolo si ma mɔ ye tɔnkuma la ka a fɔla Alatala bata anu sa mɔ bole tɔ.»

¹¹ Anu fila bɛ tagata anu yɛtɛ labɔɔ Filisiti kaanu ma. Filisiti kaanu ka a fɔ, anu ko: «Bɔ, a fɛlɛ ba, Hebure kaanu be bɔɔla dinkanu tɔ anu be dogonden ka min na nun.»

¹² Filisiti sɔɔrenu minnu be kantare tɔ ɲɔ, wonu ka anu kulɛ labɔɔ Yonatan nun a la kɛlɛmafeŋɛ mayadɛlá ma, anu ko: «Wo na yan, mɔ ni ko do fɔ wo ye!» Yonatan ka a fɔ a la kɛlɛ mafeŋɛnu mayadɛlá ye, a ko: «N jokki mɔ ni yɛlɛ, bayi Alatala bata kɛnu sa Isirayila kaanu bole tɔ.»

¹³ Awa, Yonatan ka ɲɔ karafu, a la kɛlɛ mafeŋɛ mayadɛlá tugun ka a jokki. Filisiti kaanu jarabita Yonatan ye, anun min be a la kɛlɛ mafeŋɛnu mayadɛla wo tugun ka mɔgɔ siyama faga a kɔma.

¹⁴ Yonatan nun a la kɛlɛmafeŋɛ mayadɛlá la wo kɛlɛ fɔlɛ butɔ, anu ka Filisiti mɔgɔ mugan anun do faga, wondelen lafontita dula lakɛtɛndeŋɛ tɔ.

¹⁵ Jusu bɔɛ mata Filisiti kaanu la daaka bɛ tɔ, anun jama min bɛ be ɲɔ lamiliŋɛ tɔ. Filisiti sɔɔrenu minnu be kantare mala, anun kɛlɛ malá ɲinmanu minnu tagata tiɲare madula nun, wonu bɛ bu butɔ ɲatadonta. Duge sɛrɛnta, bu butɔ ɲatadoŋɛ le mu nun, min be fatanden Ala la.

Filisiti kaanu la bore Isirayila kaanu la

¹⁶ Sayulu la kila fɛlɛlanu minnu be nun Gibeya, Bunyamin bɔnsɛ la duge tɔ, wonu ka a yen, Filisiti jama siyama bata ɲatadon, anu be borila ka taga sɔngɛ bɛ la.

¹⁷ Awa, Sayulu ka a fɔ jama ye: «Wo sɔɔrenu bɛ madɛn ba wo ni kɔnte ma, alako wo mɔ ni a lɔn ka do bele bɔɔren wo mɔ ɲaama.» Anu to ka kɔnte ma anu ka a yen, Yonatan nun a la kɛlɛmafeŋɛ mayadɛlá bele jama ɲaama.

¹⁸ Wo butɔ, Sayulu ka a fɔ Ahiya ye, a ko: «Ala la seedeɲɔgɔya kankira madon.» Bayi wo lun, Ala la lahiri seedeɲɔgɔya kankira be nun Isirayila kaanu la daaka tɔ.

¹⁹ Sayulu be kumala nun wagate min tɔ sarika lakelá ye, do le tun be sala ɲatadoŋɛ kunma Filisiti kaanu la daaka dula. Sayulu ka a fɔ sarika lakelá ye: «A to ɲɔ.»

²⁰ Wo kɔma, Sayulu ka a la jama bɛ makele, anu tagata han kɛlɛ dula tɔ. Anu tagata a taran, Filisiti kaanu bɛ be anu ɲamatelenden a kafuɲɔgɛ ma, anu be ɲɔgɔn kɛlɛla. Filisiti kaanu ɲaminta kilaŋɛ la han.

²¹ Mɔgɔ donu be ɲɔ, Heburenu le mu minnu be Filisiti kaanu tɛma nun anu la daaka tɔ, anun anu lamiliŋɛ tɔ. Wonu sata anu nɛɛnɛdɔndɛnu Isirayila kaanu kunma minnu be Sayulu nun Yonatan kɔma.

²² Isirayila kaa minnu bɛ be dogonden nun Efirayimu kɔnkɛnu tɔ, wonu to ka a mɔɛ, aa Filisiti kaanu be borila Isirayila la, ande tugun bɔɔta anu be ka min na, anu be anu beela ka anu kɛlɛ.

²³ Alatala ka Isirayila jama lakisi wo lun. Kɛlɛ yajɛta han Beti-Aweni saa tɔ.

Yonatan ka min ma a to ma a baaba la dankare mɔɛ

²⁴ Isirayila kaanu be lakɛtɛnden nun wo lun koola, bayi Sayulu bata kɛ dankare ma jama bɛ ɲala, a ko: «Danka be mɔgɛ ye min yo ka a daɲini han wura la, han n ni n tɛŋɛ yɔgɔ n jaguenu ma.» Jama hali mɔgɔ dɔndɔ ma dɔmɛ nɛmunɛmu.

²⁵ Jama bɛ donta wula la, kumɛ siyama be ɲɔ nun han a be bɔnden duge tɔ.

²⁶ Jama to keta wula butɔ, anu ka kumɛ yen sulenna lenbenu tɔ, kɔnɔ mɔgɔ dɔndɔ ma a nɛmunɛmu, bayi anu bɛ be kilanden dankare la.

²⁷ Kɔnɔ, Sayulu be kɛ dankare mala wagate min tɔ, wo ka a taran Yonatan ma a mɔɛ. A ka a la lɔgɛ lajigi kumɛ lenbe tɔ, a ka a ladon a da tɔ, a ɲanu latenseta a ma.

²⁸ Awa, jama mɔgɔ do ka a kulɛ labɔɔ a ma, a ko: «I baaba ka jama ladanka le, a ka a fɔ: ‹Danka be mɔgɛ ye, min yo ka a daɲini bi.›» Adun jama bata kori nun.

²⁹ Yonatan ka a fɔ, a ko: «N baaba be tɔɔrɛ sigila jamanɛ kunma. Wo a fɛlɛ ba, n ɲanu be latenseren ki min na bɔɔla n ka kɛ kumɛ nɛmunɛmu.

³⁰ N be laaren a la, ka jama ka kɛlɛ tɔnɛ dɔmɔ le nun anu ka min sɔtɔ anu jaguenu bolo, Filisiti kaanu la bɔnɛ si koloya le nun tanbi kɛ la.»

³¹ Wo lun, Isirayila kaanu ka Filisiti kaanu botege ka bɔɔ Mikimasi ma han Ayalɔn. Wo ka a taran, jama bata kori kɔfu.

Jama la sube dɔmɔ koe a base fɛ junube

³² Wo butɔ, anu nata tugu anu jaguenu kɛɛ la. Anu ka saakanu, baanu anun ningenu jigan, sa ningi deŋɛnu kunma, anu ka wonu kannatɛgɛ duge tɔ, jama ka a dɔmɔ a base fɛ.

³³ Anu tagata wo koe matanbi Sayulu ma, aa jama be junube mala Alatala la ka sube dɔmɔ a base fɛ. Sayulu to ka wo mɔɛ, a ko: «Janfante le mu wo la! Wo ni kuru belebele do latallɛ n kɛnna yan.»

³⁴ A mɛn ka yamɔre sa, a ko: «Wo ni a lalantan jama bɛ la, wo ko: ‹Bɛ ka ninge min jigan, ka wo ma saakadeŋɛ, a ni a tɔɛnu nati, a ni naa a kannatɛgɛ yan, wo kɔma wo ni a dɔmɔ. Wolo si a ma wo te junubu ma Alatala la bitugun subu dɔmɔ koe la a base fɛ.›» Awa, wo sue tɔ le, bɛ ka a la kolofeŋɛ doni a fan na ɲɔ alako anu ni a kannatɛgɛ ɲɔla.

³⁵ Sayulu ka sarika bintandula sɔ Alatala ye ɲɔla, ɲɔ le mata a la sarika bintandula fɔlɛ la a ka min sɔ Alatala ye.

Jama la Yonatan kunka koe Sayulu bolo

³⁶ Sayulu ka a fɔ, a ko: «Wo mɔ ni jigi kɛ sue tɔ Filisiti kaanu kɔma ka anu bolofeŋɛnu jigan han ɲɔlakɛnɛ fɛ, wo mɔ kana mɔgɔ yo balureŋɛ to.» Anu ka a fɔ a ye: «A ma iko i be diren a ye ki min na.» Kɔnɔ sarika lakelá ka a fɔ: «Wo mɔ ni Ala maɲininka yan betunna.»

³⁷ Wo butɔ, Sayulu ka Ala maɲininka, a ko: «N ni jigi Filisiti kaanu kɔma ba? I si anu to Isirayila sagoe tɔ ba?» Kɔnɔ jaabi yo ma sɔtɔ wo lun.

³⁸ Sayulu ka a la gali kuŋɛnu bɛ makele. A ko: «Wo wo mira ba, ka wo si nɔ a lɔnna, junube min be maren bi.

³⁹ Bayi n bata n kali Alatala la, min be Isirayila jama lakisila: hali n na den Yonatan de mu kɛ koe sabu la, fɔ a ni faga tekku.» Jama bɛ tɛma, mɔgɔ yo ma a jaabi.

⁴⁰ Wo butɔ, a ka a fɔ Isirayila sɔɔrenu bɛ ye: «Wo sɔ sɔngɔ dɔndɔ, nde nun n na den Yonatan tugun ni to sɔngɔ dɔndɔ.» Jama ka a fɔ a ye: «A ma iko i be diren a ye ki min na.»

⁴¹ Sayulu ka a fɔ Alatala ye: «Bani Isirayila kaanu la Ala, tɔɲa yita tonbola la.» Tonbola naata Sayulu nun Yonatan yita, jama le bele bitaren.

⁴² Sayulu mɛn ka a fɔ, a ko: «Nde nun Yonatan tɛma, n na den kayireŋɛ, tonbola ni a yita min mu.» Tonbola naata Yonatan yita.

⁴³ Sayulu ka a fɔ Yonatan ye, a ko: «I la tiɲare fɔ n ɲɛ ba.» Yonatan ka a fɔ a ye, a ko: «N ka kumɛ donden de jigan n na lɔgɛ la, min be bitaren nun n bole la, n ka a nɛwu. Nde le mu ka, n be sɔnden n ni faga.»

⁴⁴ Sayulu ka a fɔ, a ko: «N bata n kali Ala la, ka n ma Yonatan faga, Ala ni n bita a bɛlɛma la. Yonatan, fɔ i ni faga tekku.»

⁴⁵ Jama ka a fɔ Sayulu ye, anu ko: «Yonatan min mata sabue la bani Isirayila ni kisi a jaguenu bolo, aa wo ni faga ba? Mɔ bata mɔ kali Alatala la, Yonatan kunsigi kolo dɔndɔ te ke duge tɔ, bayi bi teleŋɛ a be min maren a nun Ala le mu nun.» Jama ka Yonatan kunka ɲɔgɔnna le.

⁴⁶ Sayulu ka Filisiti kaanu bee koe dan, wo kɔma a tasaagita a bata. Filisiti kaanu tugun tagata anu bata.

Sayulu nɔta a jaguenu minnu la

⁴⁷ Sayulu to banta mansaya jiganna Isirayila, a ka kɛlɛ sɔ a jaguenu bɛ ye. Anu nun min yo bɛnta, a be wo tigi kunma: Mowaba kaanu ba, Amoni kaanu ba, Edɔmi kaanu ba, Soba mansanu ba, Filisiti kaanu ba.

⁴⁸ A sɛnbɛ koloyata, a ka Amaleki botege, a ka Isirayila lafulen mɔgɛnu bolo minnu be kɛnɛ nala nun anu ni anu bolofeŋɛnu bɛ jigan.

Sayulu la denbaya

⁴⁹ Sayulu la den kayireŋɛnu tɔgɛ le mu ka: Yonatan, Yisiwi, anun Malikisuwa. A la den musereŋɛnu kan, a fɔlɛ tɔgɔ le Merabu, wo kɔmatafɛlɛ tɔgɔ Mikali.

⁵⁰ Sayulu la muse tɔgɔ le nun Ahinoyamu, Ahimaasi do la den musereŋɛ. A la sɔɔri mansa mu Abineri le la, Neri la den kayireŋɛ, Sayulu baaba dɔgɔmaŋɛ.

⁵¹ Abiyeli la deŋɛnu le be tabɛnden Sayulu baaba Kisu, anun Abineri baaba Neri ma.

⁵² Sayulu la simaya bɛ butɔ, a nun Filisiti kaanu be fɔrɔntiŋɛ le tun tɔ nun. Sayulu tini mɔgɔ yo yen min sɛnbɛ kolo, a suusɛta, a be wo tigi ladonna le a la galideŋɛnu ɲaama.