1 Samiyɛli 13 - Ala la kitabuenu Mɔgɔfin kuma tɔ

Isirayila nun Filisiti kaanu la kɛlɛ sabue

¹ Sayulu la simaya la kereŋɛ kan do, a sɔta mansa la bani Isirayila jama kunma. A la mansaya san filaɲɔgɛ,

² Sayulu ka bani Isirayila jama madɛn, a ka kayi wulu saba masubɛ anu tɔ. Mɔgɔ wulu fila tota a bolo Mikimasi anun Betɛli kɔnkɛ kunma, mɔgɔ wulu dɔndɔ tota a la den Yonatan bolo Gibeya saa tɔ, Bunyamin bɔnsɛ la duge tɔ. A ka jama tɔmanu lasaagi anu bata.

³ Lun do, Yonatan ka Filisiti kaanu la gali mansa faga, min be nun Geba saa tɔ. Filisiti kaanu ka wo mɔɛ. Sayulu ka yamɔre sa bina ni fe Isirayila duge bɛ butɔ, bayi a ko: «Fɔ n na jama Hebure kaa bɛ ni a lamɔɛ.»

⁴ Isirayila bɛ ka a mɔɛ, anu be a fɔla aa Sayulu bata Filisiti kaanu la gali mansa faga, Isirayila bɔnsɛ bata a yɛtɛ lasɛɛya Filisiti kaanu ye wo la. Wo butɔ, kiila tagata Isirayila duge tɔ, a fɔ koe la jama bɛ ni madɛn Giligali saa tɔ Sayulu kɛnna, wo kɔma anu madɛnta ɲɔ.

⁵ Filisiti kaanu madɛnta Isirayila kɛlɛ koe la. Sarɛti kɛlɛ mafeŋɛ wulu bi saba le be anu bolo nun, soo tige kɛlɛ malanu mɔgɔ wulu wɔɔrɔ. Wo jama siyata iko mɛɲɛn kole minnu be ba dala. Anu nata daaka Mikimasi, Beti-Aweni tele bɔɛ tɔ.

⁶ Bani Isirayila kaanu juse maɲakuta anu ma, bayi anu ka a yen anu bata lakɛtɛn. Wo butɔ, anu tagata dogon. Donu dogonta kɔnkɛnu tɛma, donu dogonta fanmɛnu tɔ, donu dogonta fatanu tɛma, donu dogonta dinkanu butɔ, donu dogonta dogondula mɔɔle doenu tɔ.

⁷ Hebure donu ka Yurudɛn kɔɛɛ tɛgɛ, anu tagata Gadi anun Galadi dugenu tɔ. Kɔnɔ han bi Sayulu kan be Giligali. Jama min bɛ tota a kɛnna, wonu bɛ be sɛrɛnna kilaŋɛ la.

Sayulu la tantaŋɛ sarika bɔɔ koe la

⁸ Sayulu ka Samiyɛli kɔnɔn han a ka tele wɔrɔwila luŋɛ min na ko fɔ a ye. Kɔnɔ Samiyɛli ma na Giligali, jama lansanta a kunma, anu yanfayata a la.

⁹ Awa, Sayulu ka a fɔ, a ko: «Wo ni sarika bintannɛŋɛ nati n ɲɛ, anun kanunteya sarika!» Anu to ka a nati, a ka wo sarika bintannɛŋɛ bɔɔ betun.

¹⁰ A be wo banna bɔɔla wagate min tɔ, Samiyɛli nata. Sayulu tagata a labɛndula, a ni taga a kɔntɔn.

¹¹ Samiyɛli ka a fɔ, a ko: «I be fen de maren?» Sayulu ka a jaabi, a ko: «N to ka a yen jama be malansanna n kunma, adun i ma na a wagate, Filisiti kaanu tugun bata na madɛn Mikimasi,

¹² wo butɔ n ka a mira n ko: ‹Filisiti kaanu si jigi le n ma Giligali yan, n nun bele Alatala mataranden!› Wolo mu n ka a fɔ n ko n te nɔ kɔnɔŋɛ mala bitugun, a fɛrɛ bele fɔ n ni sarika bintannɛŋɛ bɔɔ n yɛtɛ la.»

¹³ Samiyɛli ka a fɔ Sayulu ye, «I bata hakkilibɔnɔya wale ma. I Marige Alatala ka i yamɔri i ni koe min ma, i ma a labatu. Alatala be i la mansaya lasabatila le nun Isirayila kunma kudai,

¹⁴ kɔnɔ kɔtɛ, i la mansaya te sabati bitugun. Alatala bata mɔgɔ do masubɛ a be diren min ye, a ni wo tigi ma a la jama latagamanná la, bayi i bele i hakkile toren yamɔre ma, a ka min don i bolo.»

¹⁵ Wo butɔ, Samiyɛli wulita, a bɔɔta Giligali, a tagata Gibeya saa tɔ, Bunyamin bɔnsɛ la duge tɔ. Sayulu ka kɛlɛ malanu kɔnti minnu be a kɛnna. Fayida kayi mɔgɔ kɛmɛ wɔɔrɔ le be ɲɔ.

Filisiti kaanu la matabɛŋɛ kɛlɛ ma koe la

¹⁶ Sayulu yo, a la den kayiren Yonatan yo, anun jama tɔɛ, wonu sɔta a kɛlɛ ma kɛɲa ma Geba, Bunyamin bɔnsɛ la duge tɔ. Filisiti kaanu tugun tagata daaka Mikimasi.

¹⁷ Filisiti kaanu la kɛlɛ malá ɲinma kuruŋɛ do bɔɔta anu la daaka tɔ ka taga tiɲare madula. Anu ka wo kuruŋɛ tafatan sigi saba la, wonu dɔndɔ dɔndɔ bɛ ni taga tugu Isirayila saanu la. Kurun fɔlɛ ka a kun sɔ Ofira kila ye, Suwali duge mafanna.

¹⁸ Doe tagata Beti-Horon kila mafanna. A sabaɲɔgɛ tagata naaniŋɛ mafanna, min be jigila Seboyimu fole dula, janfue kɛnna.

¹⁹ Wo wagate nun, numu yo te yen Isirayila duge bɛ tɔ, bayi Filisiti kaanu ka a fɔ le, aa Hebure kaanu kana kɛlɛmafeŋɛnu ɲiɲa, iko faŋɛ ka wo ma tanba.

²⁰ Wo butɔ, Isirayila kaanu bɛ be kɛnɛ tagala nun Filisiti kaanu le dula, anu la nɛgɛmafeŋɛnu ladiyadula, iko sarin, tɛgɛraŋɛ, kere anun nɛgɛmafen gbɛtɛnu.

²¹ Filisiti numɛnu be sɔn bɛlɛŋɛ le sala nɛgɛ latugu sɔŋɛ la: sarin nun kere latugu sɔŋɛ be maren kaalise giramu sagin de la, tɛgɛraŋɛ nun nɛgɛmafen gbɛtɛnu latugu sɔŋɛ be maren kaalise giramu naani le la.

²² Wolo ka a ma kɛlɛ ma luŋɛ, jama bɛ min tota Sayulu kɛnna, faŋɛ nun tanba ma to anu bolo. Fɔ ale nun a la den kayireŋɛ Yonatan, kɛlɛmafeŋɛ be ande len bolo.

²³ Awa, Filisiti kaanu la gale do bɔɔta anu la daaka banba tɔ. Kila min be tagala Mikimasi kɔnkɛnu tɛma, anu tagata daaka ɲɔ kunma, anu ni a kanta.