1 Samiyɛli 12 - Ala la kitabuenu Mɔgɔfin kuma tɔ

Samiyɛli la kuma tɔɛ Isirayila kaanu ye

¹ Samiyɛli ka a fɔ bani Isirayila kaanu bɛ ye: «Wo ka a lɔn, wo ka min fɔ n ɲɛ, n ka a bɛ lamɔɛ le: n ka mansa sɔ le wo kunma.

² Kɔtɛ, mansa le ka min be wo latagamanna. Nde bata kɔtɔya, n kuŋɛ bata fuga. N na deŋɛnu kan be wo tɛma. N bata wo latagaman bɔɔla n kamarendeŋɛ la han bi.

³ Awa, nde le mu ka. Wo ni n na ko koroŋɛ seedeɲɔgɔya bɔɔ ba Alatala ɲala, anun a be mansa min masubɛren wo ye. Mɔgɔ miniman be yan, n bata ninge bɔɔ min bolo, ka wo ma sofale? Mɔgɔ miniman be yan n ka min tɔɔrɔ ka fondo bosi a bolo? N ka ɲɔmɔ le lakasara? N ka ji sige kiiti koroŋɛ miniman de sa n ni ko tiɲalá mabutin? Wo a fɔ n ɲɛ ba. Ka n ka wo ma le, n ni a sɔŋɛ lasaagi wo ma.»

⁴ Isirayila kaanu ka a jaabi, anu ko: «I ma mɔ tɔɔrɔ feu ka fondo bosi mɔ bolo, i ma mɔgɔ yo lakasara, i ma sɔn mɔgɔ yo la ji sige la.»

⁵ Wo butɔ, Samiyɛli ka a fɔ anu ye, a ko: «Alatala le mu seede la bi luŋɛ, anun a be mansa min masubɛren wo ye, ka a fɔla wo bele n nakɔrɔsiren fenfen na ko la.» Jama ka a fɔ, anu ko: «Iyon, anu mu a seede la.»

⁶ Samiyɛli ka a fɔ jama ye: «Alatala le ka Musa nun Harona sɔ wo kunma nun, a naata wo benbanu labɔɔ Misira duge tɔ.

⁷ Awa kɔtɛ, wo na sɔ yanna ba, n ni wo lakiiti Alatala ɲakɔtɔ, n ni wo talɔn betunna ko ɲinmanu la, a be minnu bɛ maren wole nun wo benbanu ye.

⁸ Yaguba na kɔma Misira duge tɔ, wo benbanu naata na anu kulɛ labɔɔ Alatala ma a ni na anu dɛman. Alatala ka Musa nun Harona lasanba anu ma, minnu ka wo benbanu labɔɔ Misira, anu nata anu lasabati kɛ duge tɔ.

⁹ Kɔnɔ, anu ɲinata Alatala la ko ma, anu la Ala. Wolo mu, a ka anu sa Sisera sagoe tɔ, Hasori la sɔɔri kuntige, anun Filisiti kaanu nun Mowaba kaanu, wonu ka anu kɛlɛ.

¹⁰ Anu mɛn ka anu kulɛ labɔɔ Alatala ma, anu ko a ma: ‹Mɔ bata junube ma, bayi mɔ bata Alatala boloka, mɔ ka Baali kuye nun Asitoroti kuye batu. Yandi, i ni mɔ bɔɔ mɔ jaguenu bolo kɔtɛ, mɔ si i batu le.›

¹¹ Wo butɔ, Alatala ka Yerubaali lasanba anu ma, anun Bedan, nun Yefite, nun nde Samiyɛli. Wonu sabu la, Alatala ka wo bɔɔ wo jaguenu bolo minnu be wo lamilinden, alako wo ni sigi jususa butɔ.

¹² Awa, wo to ka a yen Nahasi, Amoni kaanu la mansa be nala wo kɛlɛdula, wo ka a fɔ n ɲɛ, wo ko: ‹Kɛ bata kun mɔ ye! Mɔ be diren mansa ni sɔ mɔ kunma kɔtɛ.› Adun, wo Marige Alatala le ɲan mu wo la mansa la!

¹³ Awa, wo ka mansa min masubɛ, wo dita mansa min ye nun, Alatala bata wo sɔ wo kunma. Ale le mu ka.

¹⁴ Ka wo kilanta Alatala la, wo ka a batu, wo ka wo tolomasɔ a la, wo mɛn ma murutɛ a la kuma ma, ka wo tota wo Marige Alatala sagona koe tɔ, wo nun mansa min be wo kunma, awa wo si bɛn de han!

¹⁵ Kɔnɔ, ka wo ma wo tolomasɔ Alatala le la, wo murutɛta a la kuma ma, Alatala la dumɛŋɛ si jigi le wo ma, iko a jigita wo benbanu ma ki min na.

¹⁶ Awa, wo na sɔ yanna, wo ni a fɛlɛ Alatala be ko belebele min mala wo ɲala.

¹⁷ Hali sangi na wagate to ma ka, n be Alatala mataranna le, a ni sange nun sangi bulanu lana. Ka wo ka wo yen, wo si lɔn sɔtɔ a ma ka a fɔla wo to ka mansa ɲini, wo be ko koron belebele le maren Alatala ɲakɔtɔ wo la.»

¹⁸ Samiyɛli ka a kulɛ labɔɔ Alatala ma wo lun dɔndɛ tɔ, Alatala ka sangi je lana kisan, anun a bula la. Wo koe ka jama bɛ lakilan koola Alatala nun Samiyɛli la.

¹⁹ Jama bɛ nata a fɔ Samiyɛli ye, anu ko: «I Marige Alatala mataran mɔ ye, mɔle i la joŋɛnu, alako mɔ kana faga. Bayi mɔ ka junube min bɛ ma nun, mɔ ka kɛ ko koroŋɛ tugun sa a kunma ka i maɲininka i ni mansa sigi mɔ kunma.»

²⁰ Samiyɛli ka a fɔ jama ye: «Hali wo ma kilan. Tɔɲa le, wo bata wo ko koroŋɛnu bɛ ma. Kɔnɔ kɔtɛ, wo kana bɔɔ Alatala la kila kɔma bitugun, fɔ wo ni Ala batu wo hanige beeyareŋɛ la.

²¹ Wo kana bɔɔ Alatala kɔma de! Ka wo ma, a si taran de wo be sɔren ko fufafuenu le kɔma, munanfan yo bele minnu tɔ, min te mɔgɛ lafulen, bayi ko tɛsɛŋɛnu le mu anu la.

²² Alatala bata a natá wo ni ma a la jama la. A te naa wo aɲɛ a tɔgɔ banba la ko la.

²³ Nde tugun, n te sɔn feu junube sɔtɔla Alatala la a mataran baliya la wo ye. N si to wo karanna ko ɲinma nun kila telendeŋɛ le la.

²⁴ Kɔnɔ wole kan, fɔ wo ni kilan Alatala la, wo ni a batu wo hanige beeyareŋɛ le la. Wo ni wo mira ko banbanu ma, a be minnu maren wo ɲala.

²⁵ Kɔnɔ, ka wo nɔn tagata ko koroŋɛ ma, wo si bɔnɔ le, wole nun wo la mansa.»