1 Samiyɛli 10 - Ala la kitabuenu Mɔgɔfin kuma tɔ

¹ Samiyɛli ka tulu bitira lanma dɔndɔ jigan, a ka a bɔn Sayulu kuŋɛ ma. A ka a sunbu, a ka a fɔ a ye, a ko: «Alatala bata i masubɛ i ni ma a la jama latagamanná la.

² Ka i bɔɔta yan, i tini ke Sɛlisa saa tɔ min be Bunyamin bɔnsɛ la duge naaniŋɛ tɔ, i si kayi mɔgɔ fila taran ɲɔ Rakeli gabure kɛnna. Anu si a fɔ i ye: ‹Wo tagata sofali musenu minnu ɲinidula, anu bata yen. I baaba bata ɲina a la sofalenu la ko la, a be jusu makasa tɔ wole le la ko la kɔtɛ, a be a fɔla: ‹N si fen de ma n na deŋɛ la ko la?››

³ I tini bɔɔ ɲɔ, i ni taga ɲatɔ, han i ni ke Tabori lɔgɔ banba ma. I si kayi mɔgɔ saba taran kila la ɲɔla. Anu be tagala sarika bɔɔdula Ala ye Betɛli. Baa den saba be bitaren dɔndɛ bolo, dɛgɛ kuntu saba be wo doe bolo, a sabaɲɔgɛ, rɛsɛn je luulu dɔndɔ be wo tugun bolo.

⁴ Anu si i kɔntɔn ka i kende masa, anu si dɛgɛ fila dii i ma, i ni a labita.

⁵ I tini bɔɔ ɲɔ, i ni taga Gibeya-Elohimu, Filisiti kaanu la sɔɔri gale do be ka min na. I tini be donna ɲɔ saa tɔ, i si bɛn nabiyonmɛ kuruŋɛ la, minnu be bɔɔren sarika bɔɔdula tenteŋɛ do tɔ. Kɔndin botegelanu be tagamanna anu ɲatɔ, anun boote botegelanu, anun serede felanu, anun kɔra botegelanu, anu be Ala la kiila lakela.

⁶ Alatala Hakkile si jigi le i ma, wo bɛ le be naala Ala la kiila lakela, i be naala mala mɔgɔ gbɛtɛ la ɲɔ le.

⁷ Ka wo tɔnkumanu bata ma i ye, i si a lɔn de Ala be i kɔma. Wo wagate, i ka fɛrɛ sɔtɔ wale min yo ma koe la, i ni wo ma.

⁸ Wo butɔ, i fɔlɔ le be jigila Giligali. Wo tanbi kɔma nde si naa taga i dula alako n ni taga sarika bintannɛŋɛ nun kanunteya sarika bɔɔ. I be n kɔnɔnna le ɲɔla tele wɔrɔwila, han nde tini taga i dula; n tini ke i ma, n si naa a fɔ i ye i bɛnta i ni min ma.»

Tɔnkumanu ma koe Sayulu ye

⁹ Sayulu ka a kɔ sɔ Samiyɛli la anu ni fatan. Anu la fatandeŋɛ tun, Ala ka Sayulu ma mɔgɔ gbɛtɛ la. Wo tɔnkumanu bɛ mata a ye wo lun dɔndɛ le.

¹⁰ Anu be donna Gibeya saa tɔ yo, nabiyonmɛ kuruŋɛnu le mu ka, minnu be naren a labɛndula. Ala ka a Hakkile lajigi Sayulu ma, Sayulu tugun ka Ala la kiila lake anu tɛma.

¹¹ Minnu bɛ ka a fɔlɛ lɔn nun, anu naata a yen a be Ala la kiila lakela nabiyonmɛnu tɛma, anu tota a fɔla ɲɔgɔn tɛma, anu ko: «Bɔ, fen de be Kisu la den kayireŋɛ masɔtɔren? Ale Sayulu tugun be nabiyonmɛnu ɲaama ba?»

¹² Mɔgɔ do tugun be wo dula tɔ, a ko: «Wo doenu go, ɲɔmɔ le mu wonu kan karamɔgɔ la?» Kɛ sanda kuma fɔ koe fɔlɔta wo lun de, a fɔla «Yaga, Sayulu tugun be nabiyonmɛnu ɲaama ba?»

¹³ Sayulu to banta Ala la kiila lakela, a ka a kun sɔ sarika bɔɔ dula la tenteŋɛ tɔ.

¹⁴ A la kereŋɛ ɲɔ, a baaba dɔgɔmaŋɛ ka a fɔ a nun a la kamareŋɛ ye, a ko: «Wole tagata mina le?» Sayulu ka a jaabi: «Mɔ tagata sofale musenu le ɲinidula, kɔnɔ mɔ ma fenfen yen. Mɔ naata taga Samiyɛli dula.»

¹⁵ A baaba dɔgɔmaŋɛ ko: «Samiyɛli ka min fɔ wo ye, a fɔ n ɲɛ ba.»

¹⁶ Sayulu ka a jaabi, a ko: «A ka a fɔ le mɔ ye a beeyareŋɛ la, aa sofale musenu bata yen.» Kɔnɔ Samiyɛli ka mansaya min na ko fɔ nun, Sayulu ma fenfen yita wo kan na ko tɔ.

Sayulu ma koe mansa la

¹⁷ Wo koenu tanbi kɔma, Samiyɛli ka jama bɛ makele, anu ni na kunbɛn Alatala ɲakɔtɔ Misipa.

¹⁸ Isirayila kaanu la madɛndeŋɛ, a ka a fɔ anu ye, a ko: «Alatala, bani Isirayila kaanu la Ala be kɛ-lɛ fɔren, a ko aa a ka wole Isirayila kaanu labɔɔ le Misira duge tɔ, ka wo bɔɔ Misira kaanu bolo, anun jamanɛ gbɛtɛ minnu bɛ be sigiren wo kɔɛ tɔ nun.

¹⁹ Bi nɔn, wole le be wo la Ala aɲɛla, min ka wo lakisi tɔɔrɛ nun wo la ɲagankata bɛ ma. Wo be a fɔla a ye bi aa mansa ni sigi wo kunma. Awa, wo na sɔ Alatala ɲakɔtɔ ba, a bɔnsɔ bɔnsɔ kɛɲa ma, a gabila gabila kɛɲa ma.»

²⁰ Samiyɛli ka Isirayila bɛ madon ka to bɔnsɔ bɔnsɔ, tonbola ni mansa masubɛ anu tɛma. Tonbola nata Bunyamin bɔnsɛ yita.

²¹ Samiyɛli ka Bunyamin bɔnsɛ madon ka to gabila gabila. Tonbola nata Matiri gabila yita. Wo gabila butɔ, a nata Sayulu yita, Kisu la den kayireŋɛ. Anu ka a ɲini, kɔnɔ anu ma a yen.

²² Wo butɔ, anu ka Alatala maɲininka, anu ko: «Bɔ, Sayulu ma na yan ba?» Alatala ka anu jaabi, a ko: «A be dogonden kotenu sɔngɔ.»

²³ Anu tagata bori la tagala Sayulu kɔma, ka ke ɲɔ, anu ka a nati. Anu nata a sɔ jama bɛ tɛma, a taranta a kayan anu bɛ ko: mɔgɔ tɔɛnu bɛ sɔdaŋɛ be danna a gabakunkuŋɛ tɔ le.

²⁴ Samiyɛli ka a fɔ jama bɛ ye, a ko: «Wo a fɛlɛ ba: Alatala be min masubɛren, ale le mu ka. Kɛ jama bɛ tɛma, mɔgɔ yo bele min be toren iko ale.» Jama bɛ ka sɔnkɛ layɛlɛ ɲagaliŋɛ butɔ, anu ka a fɔ: «Ala mu simaya diila kɛ mansa ma!»

²⁵ Wo kɔma, Samiyɛli ka koenu fɔ minnu be ladagɛren mansa ye anun mansa bɛnta minnu mala. A ka wonu bɛ sɛbɛ kan dɔndɔ, a tagata wo sɛbɛre sa Alatala ɲakɔtɔ. A nata a fɔ jama ye, bɛ ni saagi a bata.

²⁶ Sayulu tugun saagita a bata Gibeya saa tɔ. Ŋarinte donu tagata a masɔdula, Ala ka wo natá sa anu juse tɔ nun.

²⁷ Kɔnɔ mɔgɛ sondon koroŋɛ donu tugun be nun, anu be a fɔla, anu ko: «Bɔ kɛ-lɛ be wo mɔ lakisila ba?» Anu yota a ma, anu ma fenfen nati a buuɲa la. Kɔnɔ Sayulu haju ma to wo tɔ.