1 Samiyɛli 1 - Ala la kitabuenu Mɔgɔfin kuma tɔ

Elikana anun a la musu fila la ko

¹ Kaye do le be nun, a tɔgɔ Elikana. A be sabatiren Ramatayimu saa tɔ, Sufuya duge tɔ, Efirayimu kɔnkɛ do kunma. Yerohamu la deŋɛ le mu a la, Elihu kan mamareŋɛ, Tohu la denbaya, Sufu bɔnsɛ. Efarata kaa le mu a la.

² A ka musu fila le sigi: dɔndɛ tɔgɔ Hana, doe tɔgɔ Penina. Penina le be deŋɛnu sɔtɔren. Kɔnɔ Hana kan bele den yo sɔtɔren.

³ San yo san, Elikana be bɔɔla le a bata saa tɔ, a ni yɛlɛ Silo saa tɔ, Alatala dunuya bɛ da Mansa be batula dula min tɔ, a ni sujudu ɲɔ, a mɛn ni sarikanu bɔɔ a ye ɲɔ. Eli la den fila le be ɲɔ, Hofuni nun Finehasi, minnu be maren Alatala la sarika lakelánu la.

⁴ Ka Elikana be a la sarika bɔɔla lun min na, sarika tini ban bɔɔla a la, a si a la muse Penina nun a la deŋɛnu bɛ mafanna don de anu bolo.

⁵ Kɔnɔ a la musu Hana kan, a be sigi fila le donna wo bolo, bayi wo la ko kanunteya kolo a ye, hali Alatala to bele den sɔtɔ koe lagiriren a ye.

⁶ Wagate yo wagate a siina be a nanila, alako a ni dumɛn, Alatala to bele den sɔtɔ koe lagiriren a ye.

⁷ San yo san ɲɔgɔnna le: Hana tini taga Alatala be batula dula min tɔ, Penina be a nanila ɲɔgɔnna le. Lun do, wo to mata, Hana tota dila le tun, a ma sɔn a daɲinila.

Hana la Ala mataraŋɛ

⁸ Wo butɔ, a la kaye Elikana ka a maɲininka, a ko: «Hana, i bele sɔnden i daɲinila fenna, fɔ i ni to dila? Fende be i juse makasaren? Nde ma fisa i ye ba den kayiren tan ko?»

⁹ Mɔgɛnu to banta anu daɲinila ka je min Silo saa tɔ, Hana wulita, a tagata Alatala be batula ka min na. Wo ka taran, Eli sarika lakelá be majigiren ɲɔ a la tintiŋɛ tɔ bonda kɛnna.

¹⁰ Jusu makasa butɔ, Hana ka a da ladi Alatala ma, ka to dila han.

¹¹ A ka lahire jigan Alatala ye, a ko: «Alatala dunuya bɛ da Mansa, nde i la jon muse be tɔɔrɛ min tɔ, i ni i ɲa lajigi n ma, i ni n na ko talɔn, i kana ɲina nde i la jon muse ma. Ka i ka den kayiren dɔndɔ dii nde i la jon muse ma, n si a dii le i ma a la simaya bɛ butɔ. A kuŋɛ te sii ma.»

¹² Hana to yanfayata Alatala mataran koe la, Eli kan be a ɲa sɔren a da le tun na.

¹³ Hana be kumala a juse le tɔ. A da bole le tun be lamagala, kɔnɔ a kulɛ kan bele mɔɛla. A be toren Eli ye iko a be siisiren de.

¹⁴ A ka a fɔ a ye, a ko: «I la kɛ siise te bɔɔ i ma ba? Taga i la siise bɔɔ i ma dula gbɛtɛ.»

¹⁵ Hana ka a jaabi, a ko: «Ade n marige, n bele minfen yo minden, n bele beeri yo minden. Muse le mu n na, min be suunuren a juse tɔ. N be n jusu butɔ koe bɛ le sala Alatala ɲakɔtɔ nun.

¹⁶ I kana nde i la jon muse mira mɔgɔ sɔnkoroŋɛ la. N na kɔntɔfili banba anun suunɛ min be n juse tɔ, wolo ka a ma han n ka n na Ala mataraŋɛ layanfaya.»

¹⁷ Eli ka kuma jigan, a ko: «Awa, taga jususa butɔ. I ka Isirayila Marige Ala maɲininka min na, a ni i kɔ wo la.»

¹⁸ Hana ka a fɔ, a ko: «Ee, n ba, nde i la jon muse be diren de n na ko ɲan ni diya i ye wagate bɛ!» Wo kɔma, a tagata, a ka a daɲini. A ɲakɔtɔ bele lasiisiren bitugun.

Samiyɛli la sɔtɛ

¹⁹ Wo lun tabantaka saguma piri, Elikana nun a la denbaya wulita, anu tagata sujudu Alatala ye, anu saagita anu bata Rama. Wo kɔma, Elikana nun a la muse Hana kafuta. Alatala hinnɛta Hana la:

²⁰ wo saŋɛ butɔ le, Hana ka bue labɛn, a nata den kayireŋɛ sɔtɔ. Wo butɔ, a ko: «N to bata Alatala táran kɛ deŋɛ la ko la, wolo mu n be a tɔgɔ sala ‹Samiyɛli›.»

²¹ Awa, wagati do latanbireŋɛ, Elikana mɛn tayɛlɛta Silo saa tɔ, a nun a la denbaya bɛ, anu ni sarika bɔɔ Alatala ye iko anu darita a mala ki min na san yo san, a mɛn ni a la lahiri lakamali a ka min jigan nun.

²² Kɔnɔ Hana kan ma yɛlɛ. A ka a fɔ a la kaye ye, a ko: «N be a tola le han n ni deŋɛ singi bɔɔ, n ni naa a doni Silo n ni a dantɛgɛ Alatala ye, a ɲan be tola ɲɔ le kudai.»

²³ A la kaye ka a fɔ a ye: «Min diyata i ye, wo ma. To yan han i ni a singi bɔɔ. Alatala ni a la kuma lakamali.» Awa, Hana tota boŋɛ tɔ, a ka a la den kayireŋɛ lasusu han a ka a singi bɔɔ.

²⁴ A to ka a singi bɔɔ a tagata a fɛ Silo, Alatala be batula dula min tɔ, a ka tuura san saba doni a fɛ, anun farin kilo tan, anun rɛsɛn je luulu dɔndɔ. Wo ka a taran, deŋɛ dɔgɔ.

²⁵ Anu la kereŋɛ Silo, anu ka tuura kannatɛgɛ, anu naata ale deŋɛ dantɛgɛ Eli ye.

²⁶ Hana ka a fɔ Eli ye, a ko: «N marige hakkɛ to n ɲɛ. Muse min nata yan nun i dula, a be Alatala mataranna, nde le mu nun. N bata n kali wo la i ɲala.

²⁷ N be a táranna kɛ den kayireŋɛ le la ko la nun. N ka min táran Alatala ma nun, a bata n kɔ wo la.

²⁸ Nde tugun be diren n ni a dii Alatala ma. A la simaya bɛ butɔ, a be tola Alatala le sagoe tɔ.» A la wo kuma fɔreŋɛ kɔma, anu sujuduta Alatala ye.