Zacharie 9 - Ma Zhiklè

Juda a gi a ngul mayamhi na

¹ Ma kita Ndo nzi pèc pècèk a géɗ kokwar Hadrac, a da ngu ma a Damas. Aman kokwarhi Syrie a ndohi te verzi Israel tèlèba, ta a Ndo nzi pèc pècèk.

² Hamath, sam man a tsagi nengaʼa ba; Tyr a Sidon, man maya tengaʼa a zhè.

³ A vava Tyr a zlazlar nengaʼa mbiaʼa; a ta ɓiceda suli ara wyak a pa, a guro ara kos-kosi a civèɗ.

⁴ Aman Bi Zhiklè a da hilèʼa, a wushedaussa ava iyam mbiaʼa, a vogwa a ndi kokwar nengaʼa.

⁵ Askalon a da rkaʼa, a gi zlau. Gaza ba a gudzai. Ekron ba; aman skwi man ta gsa va a vna, klèng ma. Bi Gaza asaɓai, ndo a te Askalon ɓai.

⁶ Te Asdod, nzlazlau ndohi Juif ta nzi te pa, a i gedassa nfi va ndohi Philistie.

⁷ I cko na pombaz auda te ma, a i cko na mali auda te zlèʼèn. Tenga a ta da nzi a nshèffè a sam Zhiklè nga. Tenga ba ta gi a ndohi te verzi Juda; ndo Ekron a gi lèmèlèmè ara ndo Jébus.

⁸ A i woya a i tèuda gi ga a pa, a i ɓir gai, a i ɓirèʼa te ri ndohi man ta bizhè a pa, a ta shkè a deɓa a ngwai, ndo a di a slaha a nʼnga ta matakwan asaɓai; aman i rka matakwan tengaʼa a di ga.

Bi Sion

⁹ Kokwar Sion, slu dimèsh a mwuffè! Kokwar Jérusalem, wuffa! Na haha bi ngaya a shkè a sam ngaya: Zuraʼa, ngul ndo. A manda gèɗ a hai, a dè a deɓ kɗèh, a deɓ gol kɗèh.

¹⁰ A da ndiv kiki var te Ephraim, a plèshi te Jérusalem, a lèkèɗ ba. A da tsi gumai a sam ndohi herkeda tèlèba. Kokwar bi nengaʼa a hinè a ma woyam ngiɗè, a ndè a ma woyam ngiɗè, a ndè a verzi herkeda.

Sion ntila zaʼa

¹¹ I helka ta ndohi dangai ngaya auda te vèvèɗ, man iyam a te pa ɓai, a géɗ pombaz nderzlè-ma nga.

¹² Vo-washkè a deɓa a sam ndakmaʼa, kinè ndohi dangai, man kin zhèrèʼa! A patsna ba i gaɗa kinè: Te di matakwan kinè staɗ, i va kinè pombi cèw.

¹³ I mana lèkèɗ ga, nengaʼa Juda. I pi sulom a pa, nengaʼa Ephraim. I poko ta gèɗ auda a wudahi ngaya, Sion, a ta gi var a ndohi Javan, a i ge ka a tsakwal ngul ndo.

¹⁴ Tsam-tsam te deɓaʼa Ndo nzi pèc pècèk a di a gudko ta va a dai, a sulom nengaʼa ara ntsi iyam. Bi Zhiklè a da tsi tolom, a hakaɗi ara kozlar te verzi gai.

¹⁵ Zhiklè bi mbiaʼa a da ɓer ta, a ta da fen ta, a ta mbatsaha kwa man ta pi a vangava. Ta da si pombaz tengaʼa ara barassa, a ta zlama ta daʼai a ta bazl ta, ara man ta keɗa zluèɗ a sam mvi skwi a Zhiklè.

¹⁶ Ndo nzi pèc pècèk, Zhiklè tengaʼa, a da takaha ta a pats nasa, a da war ta ndohi na ara man a wèr tambakihai, a sam herkeda nengaʼa.

¹⁷ Mwuffè a zhè, a gi amba! Dau a zom a zhè a pa. Golahi a dalahi ta ara kwahi mbelaʼa man ta si dai.