Zacharie 8 - Ma Zhiklè

Jérusalem ntila zaʼa

¹ Ma Zhiklè bi mbiaʼa a mshkè a sam ga, a ngaɗa:

² Zhiklè bi mbiaʼa a goɗ arsa: I gi srak a géɗ Sion a vata, ndav a dzayè a géɗ nengaʼa kumba.

³ Ndo nzi pèc pècèk a gaɗa: I dè deɓa a Sion, a i nzi a ndev kokwar Jérusalem. A ta baha na kokwar Jérusalem ‘kokwar nlèɓèslèa’, a za Zhiklè bi mbiaʼa ‘za nkezlaʼa’.

⁴ Zhiklè bi mbiaʼa a goɗ arsa: Ngurhi a ngwozi nhalaʼa ta nzi a gaba dai te Jérusalem, ta tèlèba a gada sulai te rai.

⁵ Dal kokwar nʼndhaʼa a golahi a dalahi man ta mbèh-walai.

⁶ Zhiklè bi mbiaʼa a goɗ ar haha. Aman skwi haha skwi nrkedi a sam di njèkèɗi ndohai, – a sam di ga skwi nrkedi za ɗè? Zhiklè bi mbiaʼa a gaɗa.

⁷ Zhiklè bi mbiaʼa a ngaɗa: Na haha, i woy a i mbel ta ndohi ga, a hünko te civèɗ mvèng pats, a ndè a civèɗ nkèl pats.

⁸ I woya a i de ta a deɓa a ngwai, a ta nzi a Jérusalem, a ta ndi a ndohi ga, a i gi a Zhiklè tengaʼa, nlèɓèslèa a nzuraʼa.

Skwi mpshè ma

⁹ Zhiklè bi mbiaʼa a gaɗa: Kin gu zlau ɓai, kinè man kin tsena ma haha a sam ndohi nhadka ma a patsna, a pats man ta pu verzi gi Zhiklè bi mbiaʼa, a ta gu gi nengaʼa.

¹⁰ Aman ga ta gi arsa, ta pa na suli a ndo mizlinè ɓai, ko kɗèh man a zhüɓ skwai, a nzuɓa skwi ɓai. Ndohi man ta beza a pa, ta nza a gumi ɓai te ri ma-yamhi ta; i pra ta ndohi a ta gu mayam a va ta.

¹¹ Aman antanta i gi ara zlèzlèʼa azɓai, a sam njèkèɗi ndohi haha, Zhiklè bi mbiaʼa a gaɗa.

¹² Aman antanta i tsi gumai. Skwi te gi wof barassa a zhè, herkeda a yi skwai, giɗfek a prè minmèn. Njèkèɗi ndohi ta ngècè skwi haha tèlèba a skwi ta.

¹³ Ndohi gi Juda a ndohi gi Israel: nzlembaɗ kinè skwi mphomdaʼa a sam ndohi herkeda te va nasa; anai i da mbél kinè, a kin gi a skwi mpshè ma. Kin gu zlau ɓai, va-nzala ri kinè!

Mwoy ndo, gumai

¹⁴ Aman Zhiklè bi mbiaʼa a gaɗa: Te va man babhi kinè ta pokoy gèɗ ndav auda, i huro, i ga kinè skwi man ambaɓai, a i ngwoda gèɗ ga ɓai.

¹⁵ A patsna i hur i ga ta skwi man amba a Jérusalem a ndohi gi Juda. Kin gu zlau ɓai!

¹⁶ Va-gu skwi haha! Vo-goɗ ma nzuraʼa, ngiɗè a sam ngiɗè; va-gu kita zuraʼa tè kokwar kinè!

¹⁷ Kin hur skwi man ambaɓai a géɗ nsla-magi kinè te ndav ɓai! Mʼmbèɗ ncèkèlma da ambaha kinè ɓai! Aman skwi haha tèlèba i woya ɓai, Zhiklè bi mbiaʼa a gaɗa.

¹⁸ Zhiklè bi mbiaʼa a ngaɗayè:

¹⁹ Zhiklè bi mbiaʼa a goɗ ar haha: Njèkè skwi nʼndai a ki mafaɗaʼa, mazlamaʼa, matsaraɗaʼa, makulaʼa, da gu a skwi mwuffè a sam ndohi gi Juda, a ngolala mwuffè. Gar haha va-woy ma nzuraʼa, va-woy gumai!

Zhiklè bi mbia a te Jérusalem

²⁰ Zhiklè bi mbiaʼa a gaɗa: Ndohi herkeda ngiɗè a di ta shkè, a ndohi kokwar kumba.

²¹ Ndohi kokwar ngiɗè ta dè a kokwar ngiɗè, a ta gaɗa: ngo-dokoya, ngo-tsokoy ri a Ndo nzi pèc pècèk, ngo-woyokoy Zhiklè bi mbiaʼa! I ba i dè!

²² Ndohi herkeda kumba, a kokwar-bihi mbiaʼa ta shkè a ta woy Zhiklè bi mbiaʼa te Jérusalem, a ta tsi ri a Ndo nzi pèc pècèk.

²³ Zhiklè bi mbiaʼa a gaɗa: A pats nasa ndohi kula te verzi ndohi man daʼai ta tsaɗ, ta da gshè va a maslaka ndo Juif staɗ, a ta gaɗa: Nga woy a nga dè a verzi kinè! Nga suna, Zhiklè a zhè a nda kinè.